Category: परोपकार

वैशाख १२, गौरादह /  पहिलो पाइला नेपाल गौरादह शाखाको आयोजनामा बृहत निःशुल्क स्वास्थ्य शिविर सम्पन्न भएको छ। गौरादह नगरपालिका वडा नं. ८ को आर्थिक सहयोग तथा कोपिला फर्टिलिटी एण्ड वुमन क्लिनिक, आमा डेन्टल र अस्मिता फार्मेसी दमकको प्राविधिक सहयोगमा कार्यक्रम सञ्चालन गरिएको हो।

शाखा अध्यक्ष भुपेन्द्र निरौलाको अध्यक्षतामा सम्पन्न कार्यक्रममा द्वितीय उपाध्यक्ष बाबुराम अधिकारी संयोजक रहेका थिए। कार्यक्रमको उद्घाटन वडा नं. ८ का वडाध्यक्ष गणेश कुमार राजवंशीले व्यानर वाचन गरी गरेका थिए। कार्यक्रममा विशिष्ट अतिथिको रूपमा शाखा प्रतिनिधि दिवस खतिवडा उपस्थित रहेका थिए भने सदस्य पोसङ्का बास्तोलाले स्वागत मन्तव्य व्यक्त गरेका थिए।

कार्यक्रममा आमा डेन्टलका प्रोप्राइटर अर्जुन कुमार श्रेष्ठ, कोपिला फर्टिलिटी एण्ड वुमन्स क्लिनिककी डा. सीता राई, अस्मिता फार्मेसीका जीवस शाह, समाजसेवी भरत निरौला लगायतको उपस्थिति रहेको थियो। शाखा प्रतिनिधि दिवस खतिवडाले संस्थाका विभिन्न सामाजिक अभियानबारे जानकारी गराउँदै गौरादह शाखाले उत्कृष्ट कार्यक्रम गर्दै आएको बताए। त्यस्तै, प्राविधिक सहयोगी संस्थाका प्रतिनिधिहरूले आगामी दिनमा पनि सहकार्य गर्ने प्रतिबद्धता व्यक्त गरेका थिए।

शिविरमा १०१ जना सेवाग्राहीहरूले दन्त सेवा, फिजिसियन सेवा, हाडजोर्नी सेवा तथा महिला विशेषज्ञ सेवा लिएका थिए। कार्यक्रमकै अवसरमा अस्पताल टोलीहरू र समाजसेवी भरत निरौलालाई सम्मानपत्र प्रदान गरिएको थियो भने वडा कार्यालयलाई मायाको चिनो हस्तान्तरण गरिएको थियो।

कार्यक्रममा प्रथम उपाध्यक्ष निशा पौडेल दहाल, कोषाध्यक्ष सुस्मिता भुजेल, सदस्यहरू यमुना खत्री, भुवन कटुवाल, चाहना योगी, लोकनाथ रेग्मी तथा स्काउटका सदस्यहरू नेश्मा प्रसाईं र मनिषा कार्कीको उपस्थिति रहेको थियो। कार्यक्रमको सञ्चालन सचिव प्रदीप धमलाले गरेका थिए।

चैत १९, दमक / दमक–६ स्थित श्री पञ्चमुखी हनुमान मन्दिरको आयोजनामा बिहीबार श्री हनुमान जन्मजयन्ती भव्य रूपमा मनाइएको छ। पञ्चमुखी हनुमान मन्दिर समितिका अध्यक्ष तथा व्यवसायी अजय अग्रवालको अध्यक्षतामा आयोजित औपचारिक कार्यक्रममा दमक नगरपालिकाका प्रमुख रामकुमार थापा प्रमुख अतिथिका रूपमा उपस्थित रहेका थिए।

कार्यक्रमपश्चात् दमकका विभिन्न चोकहरूमा भक्तजनहरूले धार्मिक र्याली निकालेका थिए। र्यालीमा स्थानीयवासीको उत्साहजनक सहभागिता देखिएको थियो।

उक्त कार्यक्रममा दमक–६ का वडाध्यक्ष टेकबहादुर थापा, दमक–९ का वडाध्यक्ष कुबेर भट्टराई लगायत विभिन्न राजनीतिक दलका प्रतिनिधि, सामाजिक संघसंस्थाका अगुवा, व्यवसायी, धार्मिक व्यक्तित्व तथा श्रद्धालु भक्तजनहरूको उल्लेखनीय उपस्थिति रहेको थियो। कार्यक्रमको सञ्चालन दमक बहुमुखी क्याम्पसका प्राध्यापक परसमणि आचार्यले गरेका थिए।

माघ २१, दमक / इलाका प्रहरी कार्यालय दमकले ३० वर्षे सेवा अवधि पूरा गरी अनिवार्य अवकाश प्राप्त गर्नु भएकी प्रहरी नायव निरीक्षक (सई) सुजाता सुवेदीको विदाई तथा प्रहरी हवल्दारबाट प्रहरी वरिष्ठ हवल्दार पदमा पदोन्नति हुनु भएकी संगिता देवी निरौला श्रेष्ठलाई दज्र्यानी चिन्ह प्रदान गरेको छ।
कार्यालय परिसरमा सम्पन्न कार्यक्रममा अनिवार्य अवकाश प्राप्त सई सुवेदीलाई कार्यक्रमका प्रमुख अतिथि तथा इलाका प्रहरी कार्यालय दमकका प्रमुख प्रहरी नायव निरीक्षक किशोर लम्सालले प्रशंसा पत्र प्रदान गर्नुभयो। सो अवसरमा बोल्दै कार्यालय प्रमुख लम्सालले सुवेदीले प्रहरी संगठनमा पुर्‍याएको योगदानको उच्च कदर गर्दै अवकाशपछिका दिनमा पनि नेपाल प्रहरी संगठनलाई निरन्तर सहयोग गर्ने विश्वास व्यक्त गर्नुभयो।
यसैगरी दज्र्यानी चिन्ह प्राप्त गर्नु भएकी प्रहरी वरिष्ठ हवल्दार संगिता देवी निरौला श्रेष्ठलाई बधाई दिँदै कार्यालय प्रमुख लम्सालले पदोन्नतिसँगै जिम्मेवारी पनि बढेकाले इमान्दारिताका साथ कर्तव्य निर्वाह गरी उदाहरणीय प्रहरी बन्न निर्देशन दिनुभयो।
विदाई मन्तव्य राख्दै सई सुवेदीले आफ्नो ३० वर्षे सेवा अवधिमा भोगेका अनुभवहरू साझा गर्नुभयो। संगठनमा रहँदा विभिन्न कठिन परिस्थिति, दुःख–सुख, बाधा–बेहोरनाका बाबजुद अग्रज तथा सिनियर अधिकृतहरूको साथ, सहयोग र मार्गदर्शनका कारण लामो समयसम्म प्रहरी संगठनको गरिमा कायम राख्न सफल भएको बताउनुभयो।

सेवा अवधिभर कुनै पनि कारबाहीमा नपर्न पाएकोमा गर्व लागेको उहाँले उल्लेख गर्नुभयो। कार्यक्रमको अन्त्यमा इलाका प्रहरी कार्यालय दमकका सम्पूर्ण प्रहरी परिवारले सई सुवेदीलाई सहसम्मान विदाई गर्दै प्रहरी भ्यानमार्फत घर पठाएको कार्यालयले जनाएको छ।