Category: महत्वपूर्ण जानकारी

चैत २८, दमक / जीवन चक्र समाज नेपालको आयोजनामा नयाँ वर्ष २०८३ को शुभकामना आदानप्रदान तथा सचेतना कार्यक्रम सम्पन्न भएको छ।कार्यक्रममा विभिन्न क्षेत्रका सरोकारवालाहरूले सवारी दुर्घटना न्यूनीकरण, सिटी सफारी व्यवस्थापन तथा सामाजिक उत्तरदायित्वका विषयमा आ–आफ्ना धारणा व्यक्त गरेका थिए।दमक ट्राफिक प्रहरी प्रमुख मनोज कुमार खड्गाले सिटी सफारी चालकहरूमा बढ्दो लापरबाहीले दुर्घटना वृद्धि भइरहेको उल्लेख गर्दै अनिवार्य रूपमा लाइसेन्स लिनुपर्नेमा जोड दिए। उनले सबैलाई सवारी नियम पालना गर्न आग्रह गरे।

यसैगरी इलाका प्रहरी कार्यालय दमकका प्रमुख किशोर लम्सालले नयाँ वर्ष २०८३ मा दुर्घटना नघट्ने वातावरण बनोस् भन्ने शुभकामना व्यक्त गर्दै सवारी दर्ता, कर तिर्ने व्यवस्था र इन्सुरेन्स अनिवार्य हुनुपर्ने बताए। सिटीमार्फत चोरी तथा लागूऔषध ओसारपसारका घटनाहरू बढ्दै गएको उल्लेख गर्दै कडाइका साथ कानुन कार्यान्वयन गरिए सिटीको संख्या आधा घट्न सक्ने बताए। उनले दमकमा करिब १४०० सिटी सञ्चालनमा रहेको र व्यवस्थापनका लागि एप्रन आवश्यक रहेको धारणा राखे।समाजसेवी मदन बोहोराले विगतमा करेन्ट लागेर हात गुमाएको आफ्नो अनुभव सुनाउँदै दुर्घटना हुनुअघि नै सचेत रहन सबैलाई आग्रह गरे। उनले समाज र परिवार समृद्ध बनाउन व्यक्तिगत जिम्मेवारीबाट सुरुवात गर्नुपर्ने बताए।

सिटी चालक सूर्य बहादुर सोडारीले लाइसेन्स प्रक्रिया सहज बनाउनुपर्ने र सिटी सफारीका कागजपत्र नियमित जाँच हुनुपर्ने धारणा व्यक्त गरे। संस्थाका प्रतिनिधि टिकाराम अधिकारीले संस्थाको सिद्धान्त र सकारात्मक भूमिकाबारे प्रकाश पारे। पत्रकार बिमल लामिछानेले समाजमा घट्ने घटनाबाट सिक्नुपर्ने आवश्यकता औंल्याउँदै व्यक्तिगत सचेतनाले दुर्घटना न्यूनीकरण गर्न सकिने बताए। समाजसेवी केदार चापागाईंले सवारी दुर्घटनाबाट जोगिन स्वयं सचेत हुनुपर्ने, जीवनको मूल्य बुझ्नुपर्ने र सवारीका संकेत बत्तीहरू चुस्तदुरुस्त राख्नुपर्नेमा जोड दिए। साहित्यकार बिन्दु मुखदर्शकले सिटी सफारी धेरैका लागि बाध्यता भएको उल्लेख गर्दै सरकारले रोजगारी सिर्जना गर्नुपर्ने बताए। साथै, लाइसेन्स प्रणाली स्थानीय तहमै उपलब्ध भए सहज हुने धारणा व्यक्त गरे।

कार्यक्रम संस्थाका अध्यक्ष गणेश गौतमको सञ्चालनमा सम्पन्न भएको थियो भने स्वागत मन्तव्य वरिष्ठ उपाध्यक्ष बेनुराज प्रसाईंले राखेका थिए। कार्यक्रमको संयोजन डाक्टर लेखनाथ न्यौपानेले गरेका थिए। कार्यक्रममा सिटी सफारी चालक, यातायात व्यवसायी, मजदुर तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको संस्थाका प्रवक्ता सिद्धार्थ दाहालले जानकारी दिए।

माघ २३, दमक / आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै दमकका राजनीतिक दलहरूले निर्वाचन आचारसंहिता पूर्ण रूपमा पालना गर्ने सामूहिक प्रतिबद्धता जनाएका छन्। शुक्रबार दमक नगरपालिकामा आयोजित छलफल कार्यक्रममा सहभागी दल तथा उम्मेदवारहरूले घृणा फैलाउने अभिव्यक्ति बन्द गर्दै शान्तिपूर्ण, मर्यादित र स्वच्छ निर्वाचन सम्पन्न गर्न आफूहरू तयार रहेको साझा धारणा व्यक्त गरे।

कार्यक्रममा बोल्दै दमक नगरपालिकाका प्रमुख राम थापाले निर्वाचन नागरिकको अभिमत प्रकट गर्ने लोकतन्त्रको सुन्दर प्रक्रिया भएकाले यसलाई शान्तिपूर्ण रूपमा सम्पन्न गर्नु सबैको साझा दायित्व रहेको बताउनुभयो। उहाँले झापा क्षेत्र नम्बर ५ सबैको चासोको क्षेत्र भएकाले यहाँ स्वस्थ राजनीतिक प्रतिस्पर्धा देखिनुपर्ने धारणा व्यक्त गर्नुभयो। त्यस्तै, इलाका प्रशासन कार्यालय दमकका प्रमुख विश्वराज नेपालले निर्वाचन आचारसंहिता पालनाको अवस्था सूक्ष्म रूपमा अनुगमन भइरहेको जानकारी दिँदै आचारसंहिता उल्लङ्घन भएमा उम्मेदवारीसमेत खारेज हुन सक्ने भन्दै सबै दललाई सजग रहन आग्रह गर्नुभयो।

छलफलमा नेकपा एमाले दमक नगर अध्यक्ष राम पौडेल, नेपाली कांग्रेस दमक नगर कार्यवाहक सभापति प्रेम भट्टराई, नेपाली कम्युनिस्ट पार्टी नगर अध्यक्ष रवि बस्नेत, राष्ट्रिय स्वतन्त्र पार्टी नगर सभापति तीर्थ लामिछाने, राष्ट्रिय प्रजातन्त्र पार्टी नगर अध्यक्ष हेम सुवेदी, उद्योग वाणिज्य सङ्घका अध्यक्ष गोपाल गुरागाई लगायत धार्मिक तथा सामाजिक क्षेत्रका अगुवाहरूको उपस्थिति रहेको थियो।

कार्यक्रममा सहभागीहरूले जेलबाट फरार कैदी तथा अवैध हतियार नियन्त्रणका लागि एआई (कृत्रिम बुद्धिमत्ता) प्रविधि प्रयोगमा सरकारलाई सहयोग गर्ने प्रतिबद्धतासमेत जनाएका छन्।दलहरूले आचारसंहिता विपरीत गतिविधिमा संलग्न आफ्ना कार्यकर्तालाई आफैं कारबाही गर्ने र निर्वाचनलाई उत्सवका रूपमा सम्पन्न गर्ने साझा निष्कर्ष निकालेका छन्।

माघ ८, दमक / दमक ट्राफिक प्रहरी कार्यालयको भवनमा सवारी दुर्घटना न्यूनीकरणसम्बन्धी अन्तरक्रिया कार्यक्रम सम्पन्न भएको छ। कार्यक्रम ने.प्र.रा.सु. तथा ट्रा.व्य.का. इटहरी, सुनसरीका कार्यालय प्रमुख प्रहरी उपरीक्षक दिपक गिरीको प्रमुख आतिथ्यतामा सम्पन्न भएको हो।

कार्यक्रममा दमक ट्राफिक प्रहरी कार्यालयका कार्यालय प्रमुख प्रहरी नायब निरीक्षक विजय राई, दमक नगरपालिका वडा नं. २ का वडा अध्यक्ष प्रजापति सापकोटा , लायन्स क्लब तथा लियो क्लबका विभिन्न पदाधिकारीहरू, बस व्यवसायी संघ, अटो तथा ई–रिक्सा संघका अध्यक्षहरू, मझौला ट्याक्सी स्टेन्डका अध्यक्ष, यातायात तथा ट्राफिक व्यवस्थापन समितिका प्रतिनिधि, स्थानीय जनप्रतिनिधि, समाजसेवी तथा भद्रभलाद्मीहरूको उल्लेखनीय सहभागिता रहेको थियो।

अन्तरक्रियामा सवारी दुर्घटनाका कारण, न्यूनीकरणका उपाय, ट्राफिक नियमको प्रभावकारी कार्यान्वयन, चालक तथा यात्रुको सचेतना अभिवृद्धि र सरोकारवालाबीचको समन्वयलाई थप मजबुत बनाउने विषयमा छलफल गरिएको थियो। सहभागीहरूले दुर्घटना न्यूनीकरणका लागि संयुक्त प्रयास आवश्यक रहेको धारणा व्यक्त गरेका थिए।

कार्यक्रमबाट ६५ जना सहभागीहरू प्रत्यक्ष रूपमा लाभान्वित भएका छन्। आयोजकले यस्ता कार्यक्रमले सडक सुरक्षा प्रवर्द्धनमा महत्वपूर्ण योगदान पुर्‍याउने विश्वास व्यक्त गरेका छन्।

सुजन गाैतम / पुष २९, दमक /नेपालकै नम्बर–१ ब्रान्ड भनेर प्रचार गरिँदै आएको बर्जर पेन्ट्स दमकमा गम्भीर विवादमा फसेको छ। उपभोक्तालाई ठग्ने, गल्ती लुकाउन लाखौँ रुपैयाँको अफर गर्ने र सत्य बाहिर ल्याउन खोज्दा कुटपिटसम्म गर्ने आरोपसहित बर्जर पेन्ट्सको कथित ‘लुट धन्दा’ सार्वजनिक भएको हो।

दमक नगरपालिका–४ का अनूप कटुवालले आफ्नो घरमा १० वर्ष टिक्ने वारेन्टीसहित लगाइएको भनिएको बर्जर पेन्ट्स मात्र २० दिनमै खुुइलिन थालेपछि कम्पनीको वास्तविकता उजागर भएको बताए। घरको बाहिरी तथा भित्री भागको रंग बिग्रिएर सम्पूर्ण घर नै कुरुप बने अवस्थ भएको अनुप कटुवालको भनाइ छ। कटुवालका अनुसार उजुरी गरेपछि समस्या समाधान गर्नुको सट्टा कम्पनी पक्षले “मिडियामा नलैजानू” भन्दै करिब २० लाख रुपैयाँ दिने प्रस्ताव गर्‍यो। उनले रंगको गुणस्तर खराब भएको विषय सार्वजनिक गर्ने अडान लिएपछि भने कम्पनीबाट आएका करिब ७ जना व्यक्तिहरु दादागिरी शैलीमा घर वरिपरि आएर गएका पनि थिए।

आफ्नो गल्ती लुकाउन बर्जर पेन्ट्सका कथित ‘सलाहकार’ भन्दै ९८५१०९८०९२ नम्बरबाट पटक–पटक फोन गरी लाखौँ रुपैयाँ दिन्छौँ, चुप लाग भन्ने दबाब दिइएको कटुवालले खुलासा गरेका छन्। तर पैसा लिएर भाग्नुको सट्टा सत्य बाहिर ल्याउनु नै उचित ठानेको उनले बताए। घटना दमक–५ बेलडाँगी रोडमा रहेको बर्जर पेन्ट्सको एक डिलरबाट खरिद गरिएको पेन्ट प्रयोग गरेपछि भएको पीडितको दाबी छ। तर आश्चर्यजनक रूपमा कम्पनीले आफ्नो आधिकारिक पत्रमार्फत “उक्त घरमा बर्जर पेन्ट्स प्रयोग नै भएको छैन” भन्ने दाबी गर्दै उल्टै उपभोक्तामाथि नै दोष थोपरेको छ।

यसै विषयमा दमक–५ बेलडाँगी रोडमै रहेको विशपति सिरेमिक एन्ड कलर हाउसका सञ्चालक बिलास बरालले आफ्नो पसलमार्फत बिक्री हुने पेन्ट कम्पनीबाटै आउने र कम्पनीकै निर्देशनअनुसार ग्राहकलाई उपलब्ध गराइने स्पष्ट पारेका छन्। यसले बर्जर पेन्ट्सको आधिकारिक दाबीमाथि गम्भीर प्रश्न खडा गरेको छ। मंगलबार दमकमा आयोजित पत्रकार सम्मेलनमा पीडित अनूप कटुवालले बर्जर पेन्ट्सको ठगी, दबाब, धम्की र हिंसाको श्रृंखला सार्वजनिक गर्दै उपभोक्तामाथि कम्पनीले निषेधाज्ञा जस्तै मुद्दा हालेर आतंक मच्चाएको सम्म बताउनुभयो ।नेपालभर गुणस्तरको नाममा बजार कब्जा गर्दै आएको बर्जर पेन्ट्सको यो प्रकरणले साधारण उपभोक्ताको सुरक्षा कति कमजोर छ? भन्ने गम्भीर प्रश्न उठाएको छ।