पशुपति आधारभूत विद्यालय व्यवस्थापन समितिको अध्यक्षमा अर्जुन धिमाल

साउन २७, दमक / सानो बाह्रघरेस्थित श्री पशुपति आधारभूत विद्यालयमा नयाँ विद्यालय व्यवस्थापन समिति चयन गरिएको छ। अर्जुन धिमालको अध्यक्षतामा नौ सदस्यीय समिति गठन गरिएको हो। अभिभावक तर्फबाट अर्जुन धिमाल, विजय धिमाल, लक्ष्मी लिम्बु र कल्पना लम्जेल चयन भएका छन्। वडाबाट वडा प्रतिनिधि रबिन्द्र माखिम, विद्यालयबाट सदस्य–सचिव प्रधानाध्यापक सिताराम निरौला, शिक्षक प्रतिनिधि तिर्थराज मिश्र, तथा मनोनित सदस्यका रूपमा योगेश्वर ढकाल (विनोद) र दिलकुमारी धिमाल रहेका छन्।

विगत चार कार्यकालसम्म विद्यालय व्यवस्थापन समितिमा सदस्यका रूपमा रहेर अनुभव हासिल गरेका अर्जुन धिमाल यसपटक सर्वसम्मत अध्यक्षमा चयन भएका हुन्। समिति चयनपछि आयोजित कार्यक्रममा प्रधानाध्यापक सिताराम निरौला, शिक्षक प्रतिनिधि तिर्थराज मिश्र र दमक नगरपालिका-१० का वडा प्रतिनिधि कार्य बाहाक अध्यक्ष रबिन्द्र माखिमले अबिर जात्रासहित नयाँ समितिलाई बधाई तथा शुभकामना दिएका थिए।

अध्यक्षमा चयन भएपछि अर्जुन धिमालले भने, “यो जिम्मेवारीलाई म सेवाभावका साथ निर्वाह गर्नेछु। विद्यालयको शैक्षिक गुणस्तर उकास्ने, पारदर्शिता कायम गर्ने र सदस्य, शिक्षक, अभिभावक तथा स्थानीय बुद्धिजीवीसँग सहकार्य गर्दै सबै गतिविधि अघि बढाउने मेरो प्राथमिकता हुनेछ।”

त्यसैगरी वडा प्रतिनिधि कार्यबाहक अध्यक्ष रबिन्द्र माखिमले भने, “विद्यालयको प्रगतिको आधार नै राम्रो व्यवस्थापन हो। नयाँ समितिले सहकार्य र पारदर्शितालाई प्राथमिकता दिँदै शिक्षा क्षेत्रको स्तर वृद्धि गर्नेमा हाम्रो पूर्ण सहयोग रहनेछ।”