झापाको दमक नगरपालिका–२ स्थित रहेको रोयल स्पोर्टिङ क्लबको आयोजनामा लागूऔषध दुव्र्यसनविरुद्ध जनचेतना फैलाउने उद्देश्यले १ महिने निःशुल्क खेलकुद प्रशिक्षण कार्यक्रम बुधबारदेखि औपचारिक रूपमा शुभारम्भ भएको छ।

रोयल स्पोर्टिङ क्लबको अध्यक्ष राजु खडकाको अध्यक्षतामा भएको कार्यक्रमको दमक नगरपालिकाका प्रमुख रामकुमार थापा प्रमुख अतिथिको रूपमा उपस्थित कार्यक्रममा इलाका प्रमुख ,ट्राफिक प्रमुख पहिलो पाइला अध्यक्ष राजु निरौला ,डिपिएल अध्यक्ष दिवस खतिवडा क्ल्ब हिमालयन टाइगरको अध्यक्ष रेबत चन्द्र भण्डारी विभिन्न सामाजिक संघ–संस्था, खेलप्रेमी, युवा तथा स्थानीयवासीहरूको उल्लेखनीय सहभागिता रहेको थियो।

दमक–४ स्थित RNS फुटसल ग्राउण्डमा सञ्चालन हुने उक्त प्रशिक्षण कार्यक्रममार्फत युवालाई खेलकुदतर्फ आकर्षित गर्दै लागूऔषध दुव्र्यसनबाट टाढा राख्ने र स्वस्थ समाज निर्माणमा योगदान पुर्‍याउने उद्देश्य राखिएको आयोजकले जनाएको छ।

१ महिने खेलकुद बिधामा बक्सिङ ,जिम ,फुटसल साथै लगायत जनचेतनामुलक कार्यक्रम समेत रहेको बताइएको छ।

कार्यक्रममा उपस्थित अतिथि, सहभागी तथा सहयोगी सम्पूर्णप्रति आयोजक रोयल स्पोर्टिङ क्लबले आभार व्यक्त गर्दै आगामी दिनमा पनि यस्ता सामाजिक तथा खेलकुदमूलक कार्यक्रमलाई निरन्तरता दिने प्रतिबद्धता जनाइएको कार्यक्रम को सन्चालन सचिब खगेन्द्र बजगाइले गरेका थिए।

झापा, कमल गाउँपालिका / कमल गाउँपालिका–स्थित मंगलबारे बजारको पूर्वाधार विकास तथा स्तरोन्नतिका लागि संघीय सरकारले रु. ३ करोड बजेट विनियोजन गरेको छ। उक्त बजेटबाट बजार क्षेत्रको भौतिक पूर्वाधार निर्माण, बजार व्यवस्थापन तथा कृषि उपजको सहज किनबेचका लागि आवश्यक संरचना विकास गरिने अपेक्षा गरिएको छ।
कमल गाउँपालिकाका अध्यक्ष हुकुम सिंह राईले मंगलबारे बजार कमल गाउँपालिकाको प्रमुख कृषि बजार भएकाले यसलाई आधुनिक, व्यवस्थित र किसानमैत्री बजारका रूपमा विकास गर्न संघीय सरकारको यो बजेट महत्वपूर्ण उपलब्धि भएको बताए।
उनले भने, “संघीय सरकारले विनियोजन गरेको यो बजेटले मंगलबारे बजारलाई व्यवस्थित र आधुनिक बनाउन ठूलो टेवा पुग्नेछ। यसबाट किसानले आफ्ना उत्पादनको उचित बजार पाउनेछन् भने व्यापारीलाई पनि व्यवसाय सञ्चालनमा सहज हुनेछ। दीर्घकालीन रूपमा यसले स्थानीय आर्थिक गतिविधि विस्तार गर्न महत्वपूर्ण भूमिका खेल्नेछ।”
अध्यक्ष राईका अनुसार बजेट कार्यान्वयनपछि स्थानीय किसानले उत्पादन गरेको कृषि उपज बिक्री–वितरण गर्न थप सहज हुने, व्यापारीलाई व्यवसाय सञ्चालनका लागि आवश्यक सुविधा उपलब्ध हुने तथा समग्र स्थानीय अर्थतन्त्रलाई गति मिल्ने विश्वास लिइएको छ।
गाउँपालिकाले विनियोजित बजेटलाई प्रभावकारी रूपमा कार्यान्वयन गर्दै मंगलबारे बजारलाई स्थानीय कृषि उत्पादनको प्रमुख तथा व्यवस्थित व्यापारिक केन्द्रका रूपमा विकास गर्ने लक्ष्य लिएको जनाएको छ।

दमक नगरपालिका–१ सिरपाली चोकका ४२ वर्षीय धनबहादुर दर्जी र उनकी ४२ वर्षीया श्रीमती विजयकुमारी दर्जीको उपचारका क्रममा मृत्यु भएको इलाका प्रहरी कार्यालय दमकले जनाएको छ।

प्रहरीका अनुसार बुधबार दिउँसो करिब २ बजे श्रीमान–श्रीमतीबीच सामान्य कुरामा विवाद भएको थियो। सोही विवाद बढ्दै जाँदा धनबहादुरले श्रीमती विजयकुमारीमाथि खुकुरी प्रहार गरेका थिए। खुकुरी प्रहारबाट विजयकुमारीको टाउको र बायाँ हातमा गम्भीर चोट लागेको थियो।

श्रीमतीमाथि आक्रमण गरेलगत्तै धनबहादुरले घरकै अर्को कोठामा गएर सिलिङ पंखामा सलको पासो लगाई आत्महत्याको प्रयास गरेका थिए। सोही क्रममा उनकी २५ वर्षीया छोरीले बुबालाई झुण्डिएको अवस्थामा देखेपछि तत्काल पासो काटेर भुइँमा झारेकी थिइन्।

घटनाको जानकारी पाउनासाथ प्रहरी निरीक्षक प्रमोद खड्काको नेतृत्वमा इलाका प्रहरी कार्यालय दमकबाट खटिएको टोली घटनास्थल पुगेको थियो। प्रहरीले घाइते दुवै जनालाई तत्काल उद्धार गरी उपचारका लागि दमक अस्पताल पठाएकोमा उपचारकै क्रममा दुवैको मृत्यु भएको हो।

घटनाको कारणबारे थप अनुसन्धान भइरहेको इलाका प्रहरी कार्यालय दमकले जनाएको छ।

बेलबारी । मोरङको सुन्दरहरैँचा–१० स्थित सुकुना माध्यमिक विद्यालयमा छात्रामाथि अमर्यादित व्यवहार गरेको आरोपमा पक्राउ परेका चारै जनालाई जिल्ला अदालत मोरङले पाँच दिन हिरासतमा राखेर अनुसन्धान गर्न अनुमति दिएको छ।
जिल्ला प्रहरी कार्यालय मोरङका अनुसार विद्यालयका बस चालक प्रदीप भट्टराई, विज्ञान शिक्षक किशोरलाल गच्छदार, लेखापाल तथा शिक्षक अविरल मास्के र नृत्य प्रशिक्षक भीमप्रसाद नेपाललाई बालबालिकाविरुद्धको कसुरअन्तर्गत अनुसन्धानका लागि अदालतबाट पाँच दिनको म्याद थप गरिएको हो।
प्रहरीका अनुसार घटनासम्बन्धी उजुरी तथा सामाजिक सञ्जालमार्फत सार्वजनिक भएका गुनासोका आधारमा अनुसन्धान अघि बढाइएको थियो।
अनुसन्धानका क्रममा प्राप्त प्रमाण, पीडित तथा अन्य व्यक्तिको बयान र थप सूचनाका आधारमा चारै जनाको संलग्नता देखिएपछि नियन्त्रणमा लिइएको जनाएको छ।पछिल्लोपटक पक्राउ परेका भीमप्रसाद नेपाल झापाको बुद्धशान्ति गाउँपालिका–७ निवासी हुन्।