Blog

झापा, १५ साउन–झापाको शिबसताक्षीको दुधेमा अन्तर्राष्ट्रिय आमन्त्रण नकआउट महिला फुटबल प्रतियोगिता हुने भएको छ । दूधेस्थित रंगशालामा कार्तिक १५ देखि २२ गतेसम्म अन्तर्राष्ट्रिय आमन्त्रण नकआउट फुटबल प्रतियोगिता हुने भएको हो ।

झापा महिला गोल्ड कपले आयोजना गरेको अन्तर्राष्ट्रिय आमन्त्रण नकआउट फुटबल प्रतियोगिताका बारेमा आज दुधेमा पत्रकार सम्मेलन गरेको छ । महिला फुटबलको विकास, प्रवर्द्धन र ग्रामीण क्षेत्रका महिला खेलाडी उत्पादनमा टेवा पुर्याउने उद्देश्यसहित प्रतियोगिता आयोजना गरिएको पत्रकार सम्मेलनमा आयोजक संस्था झापा महिला गोल्ड कपले जनाएको छ ।

नेपालमै सर्वाधिक पुरस्कार राशीको तयारी
प्रतियोगिताको विजेता टिमलाई नेपालमै सर्वाधिक पुरस्कार राशी प्रदान गरिने आयोजकको तयारी छ । प्रतियोगितामा उत्कृष्ट गोलकिपर, डिफेन्डर, मिडफिल्डर, प्रशिक्षक तथा हरेक खेलको प्लेयर अफ दी म्याचलाई नगदसहित ट्रफी प्रदान गरिनेछ ।

प्रतियोगितामा आयोजकको एक टिमसहित नेपालका तीन विभागीय टिम (नेपाल आर्मी, नेपाल एपीएफ, नेपाल पुलिस), भारत र भुटानबाट एक–एक टिम तथा नेपालकै ए डिभिजनका दुई टिम गरी कुल आठ टिमको सहभागिता रहने आयोजनले जनाएको छ । यद्यपी अहिले पुरस्कार राशी कति हुने भन्ने खुलाइएको छैन ।

आयोजकको अनुसार नेपालमा सञ्चालित महिला गोल्डकपमा राखिने गरेको राशी भन्दा माथि हुने जनाएको छ । आयोजकले अब फेरी गरिने पत्रकार सम्मेलनमा पुरस्कार राशी खुलाइने जनाएको छ ।

दुधे रंगशालाको स्तरोन्नति, अत्याधुनिक प्याराफिट निर्माण र मैदान तयारीसहित प्रतियोगिता सञ्चालनमा करिब एक करोड रुपैयाँ खर्च हुने अनुमान गरिएको छ।

अन्तराष्टिय आमन्त्रण महिला फुटबल प्रतियोगितालाई भव्य र सफल बनाउन उद्योगी, व्यवसायी, व्यापारी महासंघ, पत्रकार तथा मिडिया हाउसहरूको सहकार्यको अपिल गरिएको छ।

दमक, साउन १६ – रोटरी क्लब अफ दमक र रोट्र्याक्ट क्लब अफ दमकको सहकार्यमा “सर्पदंश सचेतना कार्यक्रम” सम्पन्न भएको छ। उक्त कार्यक्रम रोटरी क्लब अफ काठमाडौं मिड-टाउनको आयोजनामा नेपाल रेडक्रस सोसाइटीको सहकार्यमा सम्पन्न भएको हो।

सर्पदंशका कारण हुने ज्यान जोखिमका घटनालाई न्यून गर्न समुदायमा चेतना फैलाउने उद्देश्यले सञ्चालन गरिएको यस कार्यक्रममार्फत सहभागीहरूलाई सर्पदंशसम्बन्धी जोखिम, पूर्वसावधानीका उपायहरू, र पहिलो उपचार विधिबारे जानकारी प्रदान गरिएको थियो।कार्यक्रमले जीवनरक्षक ज्ञान प्रदान गर्दै समुदायमा स्वास्थ्य सचेतना अभिवृद्धि गर्ने महत्वपूर्ण पहलको रुपमा आफूलाई स्थापित गरेको छ।

रोटरी तथा रोट्र्याक्ट क्लब अफ दमकले यस महत्वपूर्ण कार्यक्रममा सहयोग पुर्‍याउनु भएकोमा रोटरी क्लब अफ काठमाडौं मिड-टाउन, रेडक्रस दमक तथा प्रशिक्षकहरू रोटेरियन निर्मल रिजाल, भीम उदास, इसाबेल खड्का, कल्पना पराजुली र पुनम दासप्रति हार्दिक धन्यवाद ज्ञापन गरेका छन्।

साउन २० , दमक — झापाको दमक नगरपालिकामा सिटी सफारी सवारी साधनको अव्यवस्थित सञ्चालन रोकथामका लागि नियमित अनुगमन सुरु गरिएको छ। दमक नगरपालिका वडा नम्बर २ का वडाध्यक्ष तथा यातायात व्यवस्थापन समितिका संयोजक प्रजापति सापकोटाको नेतृत्वमा मङ्गलबारबाट अनुगमन कार्य सुरु गरिएको हो।

वडाध्यक्ष सापकोटाका अनुसार पछिल्ला वर्षहरूमा दमक नगर क्षेत्रमा सिटी सफारीको चाप अत्यधिक बढेकोले दुर्घटना न्यूनीकरण र यातायात व्यवस्थापनको लागि निरन्तर अनुगमन आवश्यक रहेको छ। “सिटी सफारी अव्यवस्थित सञ्चालनका कारण दुर्घटनाको जोखिम बढिरहेको छ,” उहाँले भन्नुभयो, “अबबाट नियमित अनुगमन गरेर व्यवस्थापन गरिनेछ।”

नगरपालिकाको सहकार्यमा दमक नगर प्रहरी, इलाका प्रहरी कार्यालय, ट्राफिक प्रहरी कार्यालय लगायत निकायको टोलीले संयुक्त रूपमा अनुगमन थालेको छ। दमक नगर प्रहरी प्रमुख रुद्रजंग कार्कीले सवारी पार्किङ व्यवस्थापन, एकतर्फे सञ्चालन र दुर्घटना न्यूनीकरणका लागि नगर प्रहरीले विशेष अभियान सञ्चालन गरिरहेको जानकारी दिनुभयो।

अनुगमनको क्रममा दमक नगरपालिका वडा नम्बर १ फागुनन्द चोकस्थित ४५ वटा र वडा नम्बर ६ गोल्डेन गेट क्षेत्रका ७५ वटा गरी कुल १२० वटा सिटी सफारीलाई चेकजाँच गरिएको यातायात व्यवस्थापन शाखाका व्यवस्थापक भूवन दाहालले बताउनुभयो। कारबाहीमा परेका मध्ये ७१ वटा सिटी सफारीलाई रसिद काटि कारबाहीको दायरामा ल्याइएको छ। दमक क्षेत्रमा बाहिरबाट सिटी सफारी प्रवेश गर्ने क्रम बढेपछि सवारी व्यवस्थापनका लागि यो कदम चालिएको छ।

साउन २० , दमक / शिबसताक्षी–७ फाक्तेपस्थित बालसेवा आधारभुत विद्यालय व्यवस्थापन समितिको अध्यक्षमा पुनः गोविन ल्वागुन चयन भएका छन् ।

आज (सोमबार) अभिभावकहरुको भेलाले पत्रकारसमेत रहनुभएका युवा नेता ल्वागुनलाई बालसेवा आधारभुत विद्यालय व्यवस्थापन समितिको अध्यक्षमा सर्वसम्मत चयन गरेका हुन् ।
पत्रकारितासंगै राजनीतिक र सामाजिक सेवामा सक्रिय ल्वागुन यसअघिको व्यवस्थापन समितिको अध्यक्ष हुन् । उनी लामो समयदेखि विद्यालय व्ग्यवस्थापन समितिका सदस्य पदमा रहेर जिम्मेवारी पुरा गरिआएका छन् ।

ल्वागुन समाजवादी प्रेष संगठन, नेपाल झापाका अध्यक्ष हुन् भने सताक्षी प्रेष क्लब शिबसताक्षीका वरिष्ठ उपाध्यक्ष हुन् । उनी बालसेवा आधारभुत विद्यालयका विद्यार्थी हुन् ।
विद्यालय व्यवस्थापन समितिका सदस्यहरुमका प्रेम रोक्का, पवित्रा तामाङ, सृजना रेग्मी, भुवनकुमारी शेर्मा, दुर्गाप्रसाद फुयाल चयन भएका छन् । विद्यालयका प्रधानध्यापक वेनुप्रसाद कार्कीका अनुसार व्यवस्थापन समितिमा शिक्षक प्रतिनिधि गणेशराज कटुवाल रहनुभएको छ ।

त्यस्तैं, आजै विद्यालयमा आयोजित अभिभावक र शिक्षकहरुको भेलाले हेमा खड्गीको अध्यक्षतामा शिक्षक अभिभावक संघ गठन गरिएको प्रधानध्यापक कार्कीले जानकारी दिनुभयो ।

साउन २५ , दमक / दमक मोबाइल व्यवसायी सङ्घले एवाई मोबाइलका सञ्चालक प्रदिप राईज्यूकी श्रीमतीलाई आर्थिक सहयोग प्रदान गरेको छ। केही दिनअघि हात्तीको आक्रमणबाट गम्भीर रूपमा घाइते भएकी उहाँको हाल बिराटनगर न्युरो हस्पिटलमा उपचार जारी छ।

उपचारको क्रममा आवश्यक परेको तत्काल आर्थिक सहयोगको आवश्यकता बोध गरी, सङ्घका वरिष्ठ उपाध्यक्ष रेवती दाहालज्यूको अगुवाइमा संकलन गरिएको रु १,००,००० (एक लाख रुपैयाँ) आज बिराटनगर न्युरो हस्पिटलमा पुगेर उहाँलाई हस्तान्तरण गरिएको हो।

सङ्घले यस सहयोगमा साथ दिने सम्पूर्ण व्यवसायी साथीहरू प्रति हार्दिक आभार व्यक्त गर्दै, अझै पनि सहयोग गर्न चाहने महानुभावहरूले सङ्घमार्फत वा व्यक्तिगत रूपमा सहयोग गर्न सकिने जानकारी समेत सार्वजनिक गरेको छ।

यस सहयोग कार्यक्रमले व्यवसायीबीचको सहकार्य, मानवीय भावना र सामाजिक उत्तरदायित्वप्रतिको गहिरो प्रतिबद्धता प्रकट गरेको छ।

साउन २६, दमक / साउन महिनाभरि प्रत्येक सोमबारको अवसरमा दमक–५ स्थित धनेश्वर मन्दिरमा रोटरी क्लव अफ दमक, रोट्रयाक्ट क्लव अफ दमक, र इन्ट्रयाक्ट क्लव अफ जेम्सको संयुक्त आयोजनामा विशेष सामाजिक सेवा कार्यक्रम सम्पन्न भएको छ।
“शिव उत्सव” नाम दिइएको उक्त कार्यक्रम अन्तर्गत चार सोमबार लगातार मन्दिरमा आउने भक्तजनहरूलाई चिया, फलफुल तथा प्रसाद वितरण गरिएको थियो। कार्यक्रममा करिब हजारभन्दा बढी भक्तजनले सेवा प्राप्त गरेका छन्।

कार्यक्रमका माध्यमबाट रोटरी तथा रोट्रयाक्ट क्लवको सामाजिक उत्तरदायित्वलाई समुदायमा चिनाउने प्रयास गरिएको र भजन कीर्तनसहित भक्तिभावपूर्ण वातावरण सिर्जना गरिएको रोट्रयाक्ट क्लव अफ दमकका अध्यक्ष दिवाकर पाँचकोटीले जानकारी दिए।
यस सामाजिक अभियानमा उषा चापागाईं फाउण्डेशन, आरसी फर्निचर र शुभ इम्पेक्सले मुख्य सहयोग प्रदान गरेका थिए।

फाउण्डेशनका संरक्षक तथा रोटरी क्लव अफ दमकका पूर्वअध्यक्ष सन्दिप ‘दिपु’ चापागाईं र हालका अध्यक्ष केशव अग्रवालको व्यवसायिक प्रतिष्ठान आरसी फर्निचर तथा शुभ इम्पेक्सको विशेष योगदान रहेको कार्यक्रम संयोजक तथा रोट्रयाक्ट क्लव अफ दमकका सर्भिस चेयर युवराज पराजुलीले जानकारी दिए ।

साउनको अन्तिम सोमबारको दिन, धनेश्वर मन्दिर संरक्षण समितिले पनि कार्यक्रम सञ्चालनमा सहयोग गरेको थियो ।समितिले रोटरी, रोट्रयाक्ट र इन्ट्रयाक्ट क्लवका प्रतिनिधिहरुलाई प्रशंसा पत्र प्रदान गर्दै धन्यवाद प्रकट गरेको छ। सामाजिक सेवामा सक्रिय यी क्लवहरूको यो पहलले धार्मिक अवसरलाई सेवा–प्रेरित उदाहरणका रूपमा प्रस्तुत गरेको छ।

साउन २८, दमक / राष्ट्रिय प्रजातन्त्र पार्टी (राप्रपा) दमक नगर समितिले आज पत्रकार सम्मेलन आयोजना गरी पार्टीलाई व्यवस्थित, मर्यादित र प्रभावशाली ढंगले अघि बढाउने प्रतिबद्धता व्यक्त गरेको छ।

दमक नगर अध्यक्ष हेम सुवेदीले पत्रकार सम्मेलनमा बोल्दै पार्टीलाई चलायमान राख्दै हरेक क्षेत्र तथा स्थानमा सशक्त उपस्थिति जनाउने आफ्नो लक्ष्य रहेको बताए। उनले आगामी निर्वाचनमा पार्टीका उम्मेदवारलाई प्रत्येक पदमा विजयी बनाउन योजनाबद्ध र रणनीतिक रूपमा काम अघि बढाइने स्पष्ट पारे।

सुवेदीका अनुसार, पत्रकार सम्मेलनको उद्देश्य प्रेस तथा मिडियासँगको सम्बन्धलाई अझ प्रगाढ बनाउने रहेको छ। कार्यक्रममा राप्रपाका जिल्ला सदस्य तथा दमक उद्योग वाणिज्य संघका वरिष्ठ उपाध्यक्ष राजु खड्का, युना एन युनिस्टेड सप्लायर्सका सञ्चालक हरि तिवारी, भुवन ढकाल र विभिन्न वडाध्यक्षहरूको समेत उपस्थिति थियो।