झापा, साउन १३ – झापाको दमक नगरपालिका–९ शान्ति मार्गस्थित एमाले पार्टी कार्यालय नजिकैको खोल्सोमा एक पुरुष मृत अवस्थामा फेला परेका छन्। इलाका प्रहरी कार्यालय दमकका अनुसार मृतक दमक–९ निवासी ४५ वर्षीय रमेश दर्जी रहेका छन्।
बुधबार बिहान स्थानीयले खोल्सोमा शव देखेपछि प्रहरीलाई खबर गरेका थिए। सूचना प्राप्त हुनासाथ प्रहरी टोली घटनास्थल पुगेर मुचुल्का उठाई अनुसन्धान सुरु गरेको थियो। प्रारम्भिक अनुसन्धानपछि मृतकको पहिचान खुलेको प्रहरीले जनाएको छ।
हालसम्म मृत्युको कारण खुल्न नसकेको प्रहरीले जनाएको छ। शवलाई आवश्यक कानुनी प्रक्रिया पूरा गरी पोस्टमार्टमका लागि पठाइएको छ भने घटनाको वास्तविक कारण पत्ता लगाउन थप अनुसन्धान भइरहेको इलाका प्रहरी कार्यालय दमकले जनाएको छ।