झापा । नेपाली कांग्रेसको १५औँ महाधिवेशनअन्तर्गत झापा क्षेत्र नं. ३ बाट सदिक्षा खड्का महाधिवेशन प्रतिनिधिमा चयन भएकी छन्। ३५ वर्षमुनिका महिला प्रतिनिधित्व गर्दै अघि बढेकी खड्का युवा तथा महिला सहभागिताको विषयलाई प्राथमिकतामा राख्दै राजनीतिक यात्रामा सक्रिय रहेकी छन्।
बाह्रदशी क्षेत्रमा सामाजिक तथा नेतृत्व विकासका गतिविधिमा सक्रिय खड्का बाह्रदशी जेसीजको नेतृत्वमा समेत रहेकी छन्। शिक्षा, युवा नेतृत्व तथा सामाजिक सेवाका क्षेत्रमा काम गर्दै आएकी उनलाई कांग्रेसको महाधिवेशन प्रतिनिधिका रूपमा चयन गरिएको हो।
खड्काले नयाँ पुस्ताको आवाजलाई पार्टीको नीति तथा नेतृत्व तहसम्म पुर्याउने, युवाको अर्थपूर्ण सहभागिता बढाउने तथा महिलाको राजनीतिक सहभागितालाई थप प्रभावकारी बनाउने विषयलाई आफ्नो प्राथमिकतामा राखेकी छन्।
गौरीगञ्ज । झापाको गौरीगञ्जमा लागुऔषध दुर्व्यसनविरुद्ध सचेतनामूलक कार्यक्रम सम्पन्न भएको छ। पहिलो पाईला नेपाल, गौरादह शाखाको आयोजना तथा इलाका प्रहरी कार्यालय गौरीगञ्जको सहकार्यमा गौरीगञ्ज बहुमुखी क्याम्पसमा कार्यक्रम आयोजना गरिएको हो।
पहिलो पाईला नेपाल, गौरादह शाखाका अध्यक्ष भुपेन्द्र निरौलाको अध्यक्षतामा सम्पन्न कार्यक्रममा संस्थाका केन्द्रीय सचिव तथा गौरादह शाखा प्रतिनिधि दिवस खतिवडा प्रमुख अतिथिका रूपमा सहभागी थिए। कार्यक्रममा क्याम्पस प्रमुख भक्त भण्डारी, इलाका प्रहरी कार्यालय गौरीगञ्जका प्रमुख कैलाशकुमार अधिकारी र स्ववियु सभापति रोशन यादव अतिथिका रूपमा उपस्थित थिए।
कक्षा ११ र १२ मा अध्ययनरत करिब ८०–९० जना विद्यार्थी सहभागी कार्यक्रममा प्रहरीले लागुऔषध दुर्व्यसनका कारण हुने व्यक्तिगत, पारिवारिक तथा सामाजिक असरका विषयमा जानकारी गराएको थियो। साथै लागुऔषधबाट बच्ने उपाय, यसको रोकथाम तथा विद्यार्थीहरूले अपनाउनुपर्ने सावधानीका विषयमा समेत सहजीकरण गरिएको थियो।
कार्यक्रममा क्याम्पस प्रमुख भक्त भण्डारी, केन्द्रीय सचिव दिवस खतिवडा र इलाका प्रहरी कार्यालय गौरीगञ्जका प्रमुख कैलाशकुमार अधिकारीले लागुऔषध दुर्व्यसन नियन्त्रणका लागि विद्यार्थी, अभिभावक, शैक्षिक संस्था र सुरक्षा निकायबीच सहकार्य आवश्यक रहेको बताएका थिए।
कार्यक्रममा सदस्य दीक्षा भण्डारीले अतिथि सत्कार गरेकी थिइन् भने सचिव प्रदीप धमलाले कार्यक्रम सञ्चालन गरेका थिए।
दमक । झापाको दमकमा आगामी असोज १५ गतेदेखि आयोजना हुने कोशी प्रदेश जिल्ला स्तरीय फुटबल प्रतियोगिताको तयारी तीव्र पारिएको छ।
दमक भेट्रान फुटबल क्लबको आयोजनामा हुने प्रतियोगिता दमक–२, बेलडाँगीस्थित खेलमैदानमा सञ्चालन हुने क्लबका अध्यक्ष गजेन्द्र देवानले जानकारी दिनुभयो। प्रतियोगिता सम्पन्न गर्न करिब ७ लाख रुपैयाँ खर्च हुने अनुमान गरिएको छ।
प्रतियोगितामा कोशी प्रदेशका विभिन्न जिल्लाबाट १२ वटा टोलीको सहभागिता रहने आयोजकले जनाएको छ। प्रतियोगिताको विजेताले नगद १ लाख रुपैयाँ तथा उपविजेताले ५० हजार रुपैयाँ पुरस्कार प्राप्त गर्नेछन्।
त्यसैगरी उत्कृष्ट खेलाडी, उत्कृष्ट गोलरक्षक, सर्वाधिक गोलकर्ता लगायत विभिन्न विधामा उत्कृष्ट प्रदर्शन गर्ने खेलाडीलाई समेत पुरस्कार प्रदान गरिने क्लबका सचिव विरेन राईले जानकारी दिनुभयो।
क्लबका अध्यक्ष देवानका अनुसार पछिल्लो समय खेलकुद गतिविधिमा कमी आएको अवस्थामा खेलाडीमा उत्साह र उत्प्रेरणा बढाउने तथा स्थानीयस्तरमा फुटबल खेलको विकास गर्ने उद्देश्यले प्रतियोगिता आयोजना गर्न लागिएको हो।
आयोजकले प्रतियोगितालाई व्यवस्थित र सफल बनाउन आवश्यक तयारी तथा समन्वयलाई तीव्रता दिएको जनाएको छ।
