वैशाख ३१, शिवसताक्षी / शिवसताक्षी १ स्थित लक्ष्मी नारायण माध्यमिक विद्यालय ले २०८२ सालको माध्यमिक शिक्षा परीक्षा (SEE) मा शिवसताक्षी नगरपालिकाभर उत्कृष्ट नतिजा हासिल गर्दै नगरकै प्रथम विद्यालय बन्न सफल भएको छ ।
राष्ट्रिय परीक्षा बोर्डले गएको सोमबार राति सार्वजनिक गरेको SEE २०८२ को नतिजाअनुसार देशभर ६५.९८ प्रतिशत विद्यार्थी उत्तीर्ण भएका छन् । यही क्रममा शिवसताक्षी नगरपालिकाका विभिन्न विद्यालयहरूले उल्लेखनीय नतिजा ल्याइरहेका बेला लक्ष्मी नारायण माध्यमिक विद्यालय नगरकै उत्कृष्ट विद्यालय बन्न सफल भएको हो ।
विद्यालयबाट SEE परीक्षामा सहभागी ३५ जना विद्यार्थीमध्ये ३४ जना उत्कृष्ट अंकसहित उत्तीर्ण भएका छन् भने केवल १ जना विद्यार्थी मात्रै अनुत्तीर्ण भएको विद्यालयका प्रधानाध्यापक खगेन्द्र बहादुर लम्जेल ले जानकारी दिए ।
प्रधानाध्यापक लम्जेलले विद्यालयले नगरमै धेरै विद्यार्थी उत्तीर्ण गराउन सफल हुँदा आफूहरू गर्वान्वित भएको बताए ।
“यो सफलता विद्यालय व्यवस्थापन समितिको कुशल नेतृत्व, शिक्षकहरूको लगनशीलता, विद्यार्थीहरूको अथक मेहनत तथा अभिभावकहरूको निरन्तर साथ र मार्गदर्शनको प्रतिफल हो,” सहायक प्रधानाध्यापक कुमार बुढाथोकी ले बताए ।
विद्यालय स्थापना भएयता SEE परीक्षामा प्राप्त यो नतिजा दोस्रो ऐतिहासिक तथा उत्कृष्ट रहेको विद्यालयले जनाएको छ । यस उपलब्धिले सामुदायिक विद्यालयहरू पनि निजी विद्यालयसरह उत्कृष्ट नतिजा दिन सक्षम हुन्छन् भन्ने सन्देश दिएको विद्यालय व्यवस्थापन समितिका अध्यक्ष निराज राईले बताए ।
शिवसताक्षी नगरपालिकाभित्र सञ्चालनमा रहेका १२ वटा सामुदायिक माध्यमिक विद्यालयमध्ये ११ वटा विद्यालयलाई पछि पार्दै लक्ष्मी नारायण माध्यमिक विद्यालय प्रथम बन्न सफल भएको नगर शिक्षा तथा खेलकुद शाखाद्वारा जारी सूचनामा उल्लेख गरिएको छ ।
शिवसताक्षीमा ८०.०९ प्रतिशत विद्यार्थी उत्तीर्ण
शिवसताक्षी नगरपालिका मा २०८२ सालको माध्यमिक शिक्षा परीक्षा (SEE) को नतिजा उत्साहजनक देखिएको छ । नगरका सामुदायिक तथा संस्थागत विद्यालयबाट सहभागी विद्यार्थीमध्ये ८०.०९ प्रतिशत विद्यार्थी उत्तीर्ण भएका छन् ।
यस वर्ष नगरका सामुदायिक विद्यालयबाट ६४४ र संस्थागत विद्यालयबाट ४५० गरी कुल १०९४ विद्यार्थी SEE परीक्षामा सहभागी भएको शिवसताक्षी नगरपालिका शिक्षा, युवा तथा खेलकुद शाखाले जनाएको छ ।
जसमध्ये सामुदायिक विद्यालयतर्फ ४३१ तथा संस्थागत विद्यालयतर्फ ४२९ जना गरी कुल ८६० विद्यार्थी उत्तीर्ण भएका छन् ।
यस वर्ष सामुदायिक विद्यालयतर्फ दुई विद्यार्थीले उत्कृष्ट ४ जिपिए प्राप्त गर्न सफल भएका छन् । भानु माध्यमिक विद्यालय लालझोडा का कञ्चन काफ्ले तथा भानु माध्यमिक विद्यालय पाराबारी का मञ्जिल नेपाल ले ४ जिपिए ल्याएका हुन् ।
त्यसैगरी सामुदायिक विद्यालयमध्ये SEE परीक्षामा सहभागी विद्यार्थीहरूमा लक्ष्मी नारायण माविले धेरै विद्यार्थी उत्तीर्ण गराएर नगरमा प्रथम स्थान हासिल गरेको हो । त्यस्तै संस्थागत विद्यालयतर्फ रेडरोज एकाडेमी का आभार तिम्सिनाले ३.९६ जिपिए प्राप्त गरेको विद्यालय प्रशासनले जनाएको छ ।
