Blog

काठमाडौँ / अमेरिकाबाट थप १९ जना नेपाली डिपोर्ट भएका छन् । अध्यागमन विभागका महानिर्देशक गोविन्द रिजालका अनुसार, २५ जेठमा ३७ नेपाली डिपोर्ट भएर आएयता नियमित जसो एक÷दुई जना नेपाली डिपोर्ट भएर आइरहेका छन् ।

उनका अनुसार, त्यसपछिको अवधिमा १९ जना डिपोर्ट भएर आइसकेको विवरण विभागमा रहेको जनाइएको छ । अमेरिकी राष्ट्रपतिमा डोनाल्ड ट्रम्प निर्वाचित भएसँगै त्यहाँको प्रशासनले कडा अध्यागमन नीति अख्तियार गरेको थियो । त्यसपछि सामान्य कसुरमा पक्राउ परेका केही व्यक्ति पनि डिपोर्ट भएका छन् ।

नेपाल आएका अधिकांश चाहिँ तल्लो बाटो हुँदै अवैध रुपमा अमेरिका प्रवेश गर्न खोज्नेहरू छन् । विभागका अनुसार, ट्रम्प निर्वाचित भएयता मात्र अमेरिकाबाट डिपोर्ट हुनेको सङ्ख्या १९७ पुगिसकेको छ ।

दमक / अख्तियार दुरूपयोग अनुसन्धान आयोगले सिरहाको कल्याणपुर नगरपालिकाका मेयर रामपुकार साहलाई एक लाख रुपैयाँ घुससहित नियन्त्रणमा लिएको छ।

मेयर साहलाई एक लाख घुससहित अख्तियारको टोलीले बुधबार कार्यालयबाटै नियन्त्रणमा लिएको हो।
उनलाई उपभोक्ता समितिबाट गैरकानुनी रूपमा रकम लिँदै गरेको अवस्थामा नियन्त्रणमा लिइएको अख्तियार स्रोतले जानकारी दिएको छ।

उनी गत स्थानीय तह निर्वाचनमा एमालेबाट मेयर निर्वाचित भएका थिए।

दमक / झापाको दमकमा निर्मित १८ तले दमक भ्यू टावर बिहिवार देखि सर्वसाधारणका लागि खुला गरिने भएको छ।

शहरी विकास तथा भवन निर्माण विभाग सघन शहरी तथा भवन निर्माण आयोजनाले सूचना जारी गरी दमक नगरपालिका वडा नं ३ दापगाछीस्थित दमक भ्यू टावर (दमक व्यापारिक कम्प्लेक्स) भोलिदेखि सर्वसाधारणको लागि स–शुल्क प्रवेश तथा अवलोकन खुला गरिने जनाएको छ । सो भ्यूटावर बिहान १० बजेदेखि बेलुका ५ बजेसम्म परिसर खुला गरिने भएको छ ।

भ्यूटावर अवलोकन गरेको शुल्क प्रतिव्यक्ति सय रुपैयाँ तोकिएको छ । त्यस्तै पार्किङ शुल्क हलुका सवारीका लागि रु.२५ , बसका लागि ५० र मोटरसाइकलको लागि रु.१० तोकिएको छ ।

काठमाडौँ । सिरहामा एक जना युवकले प्रेम विवाहपछि ठुलो परिमाणमा दाइजो मागेर पत्नीलाई यातना दिएको घटना सार्वजनिक भएको छ । अर्नमा गाउँपालिका–२ ब्रम्हपुरी घर भएका २४ वर्षीय मुकेश प्रधान सुडी र उनको परिवार मिलेर २३ वर्षीया मनीषा कुमारी गामीलाई यातना दिएका हुन् ।

प्रेम विवाह गर्दा मुकेशले ‘दाइजो लिन्न’ भनेको पीडित मनीषाको भनाई छ । तर, विवाह गरेसँगै ६० लाख नगद, २० तोला सुन, कार र राजमार्गमा पर्ने बन्दिपुर भन्ने ठाउँमा जग्गा खरिद गरिदिन दबाब दिएपछि उनले प्रहरीकहाँ जाहेरी दिइन् ।

प्रहरीले अनुसन्धान सकेर सो मुद्दा अदालतमा दर्ता गरेको छ । २०८२ जेठ ७ मा मनीषाले दाइजो विरुद्धको कसुरमा श्रीमान्, सासू र ससुरालाई विपक्षी बनाएर जाहेरी दिइन् । मुलुकी अपराध संहिता २०७४ को दफा– १७४ अनुसार दाइजो लिन पाइँदैन । तर, आफूलाई दाइजो मागेर यातना दिएको मनीषाले रातोपाटीलाई बताइन्, उनले भनिन्, ‘विवाहको बेला मेरो बुवाले १० लाख नगद र ७ लाखको सामान दिनुभएको थियो, त्यतिले पुग्दैन भनेर मलाई यातना दिइरहनुहुन्छ ।’

मनीषाको जाहेरी दर्ता गरेर प्रहरीले ४८ वर्षीया ललिता कुमारी प्रधान सुडीलाई पक्राउ गरेर अनुसन्धान गरेको थियो । अदालतको आदेशले उनी १ लाख धरौटीमा रिहा भएकी छन् । प्रहरीले ५० वर्षीय गौरी शङ्कर प्रधान सुडी, ४८ वर्षीया ललिता कुमारी प्रधान सुडी, २४ वर्षीय मुकेश प्रधान सुडीलाई प्रतिवादी कायम गरेको छ ।

मनीषाको माइतीघर कर्जन्हा नगरपालिका–२ बन्दिपुर हो । ललितपुरमा ब्याचलर अफ सिभिल इन्जिनियरिङको सातौँ सेमेस्टरमा अध्ययनरत मुकेश प्रधान सुडी र उनका बुवा गौरीशंकर प्रधान सुडी विरुद्ध अदालतले पक्राउ पुर्जी जारी गरेको छ । तर, उनीहरू पक्राउ परेका छैनन् ।

दमक / झापा अर्जुनधाराकी गंगा राई मृत्यु घटना सम्बन्धमा चार जनामाथि आत्महत्या दुरुत्साहन मुद्दामा कारबाही अगाडि बढाइएको छ । सामूहिक कुटाइबाट मृत्यु भएको पुष्टि नभएपछि उनीहरूमाथि आत्महत्या दुरुत्साहन मुद्दा दर्ता गरिएको हो । गत असार २४ गते राति अर्जुनधारा-४ भाङवारी घर भई हाल वडा नं ८ शनिश्चरे क्याम्पसनजिक प्रकाश गिरीको घरमा डेरा गरी बस्ने २२ वर्षीया राईको मृत्यु भएको थियो ।

सो घटनाका सम्बन्धमा भोजपुर रामप्रसादलाई गाउँपालिका-६ वैकुण्ठे घर भई अर्जुनधारा-८ बस्ने विश्व चौधरीको घरमा डेरा गरी बस्ने वर्ष ३१ वर्षीय रमेश भुसाल, उनकी श्रीमती ३२ वर्षीया सुस्मिता भुसाल, सोही ठाउँ बस्ने ५४ वर्षीया मैयाँ भनिने डम्बरकुमारी श्रेष्ठ र २४ वर्षीया मेनुका पाँचकोटेलाई पक्राउ गरी आत्महत्या दुरुत्साहनको मुद्दा दायर गरिएको हो । असार २५ गते पक्राउ परेका उनीहरूमाथि अदालतबाट ७ दिनको म्याद थप गरी अनुसन्धान भइरहेको इलाका प्रहरी कार्यालय बिर्तामोडका डीएसपी विजय श्रेष्ठले जानकारी दिएका छन् ।

दमक । झापाको दमक नगरपालिका–१० जहदा टोलस्थित भित्री सडक खण्डमा भएको सवारी दुर्घटनामा गम्भीर घाइते भएका एक वृद्धको उपचारका क्रममा मृत्यु भएको छ ।

मिति २०८२ साल असार २९ गते राति करिब ८:३० बजे मे.७ प.३७८९ नम्बरको स्कुटीले पैदल हिँडिरहेका ७७ वर्षीय देव बहादुर श्रेष्ठलाई ठक्कर दिँदा उनी गम्भीर घाइते भएका थिए । श्रेष्ठको टाउकोमा गम्भीर चोट लागेको, दाहिने हात भाँचिएको र दुबै खुट्टा तथा अनुहारमा समेत चोट लागेको प्रहरी स्रोतले जानकारी दिएको छ ।

घाइते श्रेष्ठ बोल्न नसक्ने अवस्थामा रहेकाले तत्काल दमकस्थित निम्स अस्पतालमा प्रारम्भिक उपचारपछि थप उपचारका लागि बिराटनगरस्थित बिराट टिचिङ अस्पताल रेफर गरिएको थियो ।
विराटनगरमा भेन्टिलेटरमा राखेर उपचार भइरहेका श्रेष्ठलाई परिवारजनले घर लैजाने क्रममा स्वास्थ्य अवस्था झनै गम्भीर भएपछि पुनः दमक अस्पताल ल्याइएको थियो । अस्पतालमा इ सि जि परीक्षण गर्दा राति चिकित्सकले श्रेष्ठलाई मृत घोषित गरेका हुन् ।

स्कुटी चालक १६ वर्षीय अर्चन खापुङ रहेका छन्, जो तेह्रथुमको म्याङलुङ घर भई हाल दमक–१० मा बसोबास गर्दै आएका छन् । उनलाई प्रहरीले नियन्त्रणमा लिई आवश्यक अनुसन्धान अगाडि बढाएको इलाका प्रहरी कार्यालय दमकले जनाएको छ ।

दुर्घटना पछि बुधबार प्रहरी अधिकृतको टोली घटनास्थलमा खटिएको थियो । कानुनी प्रक्रिया पूरा गरी मृतक श्रेष्ठको शव पोष्टमार्टमपछि उनका छोरा सुरेश कुमार श्रेष्ठलाई बुधबार दिउँसो अन्तिम संस्कारका लागि जिम्मा दिइएको प्रहरी स्रोतले जनाएको छ ।

दमक / दमकमा व्यवसायीको हक हितमा निरन्तर आवाज उठाउँदै आउनुभएका राजु खड्का आगामी दमक उद्योग वाणिज्य संघको अध्यक्ष पदमा उम्मेदवारी दिनुभएको छ।

वर्तमानमा संघका वरिष्ठ उपाध्यक्ष रहनुभएका खड्का एक दर्जनभन्दा बढी संघ–संस्थामा आबद्ध हुनुहुन्छ। युवाशक्ति, अनुभव र जोशले भरिपूर्ण खड्काले अहिलेसम्म संघको कुनै पनि चुनावमा हार व्यहोर्नु परेको छैन।

पार्टीको तर्फबाट औपचारिक उम्मेदवारी घोषणा भएसँगै खड्काले व्यवसायी हितका विविध पक्षलाई समेट्दै आफ्नो कार्ययोजना सार्वजनिक गर्नुभएको छ।

उहाँको मुख्य एजेन्डा यसप्रकार छन्:

सदस्यता विस्तार र शुल्क परिमार्जन: संघको वार्षिक शुल्क परिमार्जन गरी नयाँ व्यवसायीलाई आकर्षित गर्दै सदस्यता वृद्धि गरिनेछ।

साना व्यवसायीको व्यवस्थापन: सडकमा मकै पोल्ने, जुत्ता सिलाउने, चटपटे बेच्नेजस्ता साना व्यवसायीलाई व्यवस्थित गरेर सहज व्यावसायिक वातावरण तयार पारिनेछ।

व्यवसायिक हितकोषको प्रभावकारिता: संघद्वारा सञ्चालित व्यवसायिक हितकोषको माध्यमबाट क्यान्सर, मुटुरोग, मृगौला पीडित व्यवसायीलाई उपचार खर्च स्वरूप निश्चित सहयोग प्रदान गरिनेछ।

अव्यवस्थित बजार नियन्त्रण: बजार क्षेत्रमा लागू पदार्थ सेवन, चन्दा उठाउने, ठगी गर्नेजस्ता गतिविधि नियन्त्रण गर्न स्थानीय प्रहरी र नगरपालिका सँग समन्वय गर्दै कठोर कार्यान्वयन गरिनेछ।

घुमन्ते व्यापारको नियन्त्रण: अनधिकृत रूपमा साइकल, सिटी सफारीमा सामग्री बिक्री गर्ने पोके व्यापारलाई कर प्रणालीमा ल्याई निश्चित स्थानमा मात्रै कारोबार गर्न दिने व्यवस्था गरिनेछ।

राजु खड्काले आफ्नो उम्मेदवारी घोषणासँगै भनेका छन्, “बोलेर भन्दा पनि गरेर देखाउने मेरा कार्यशैली हुन्। व्यवसायीको हक, अधिकार र सुरक्षाका लागि मैले बोकिएको एजेन्डालाई कार्यान्वयन गर्नेछु।”

आफ्नो उम्मेदवारी कुनै व्यक्तिको विरोधमा नभई व्यवसायीको हक र हितका लागि भएको स्पष्ट पारेका छन्।

खड्काले उद्योग वाणिज्य सङ्घ कुनै राजनीतिक दलको काम गर्ने थलो नभएको उल्लेख गर्दै, “यो सङ्घ व्यवसायीका समस्या समाधान गर्ने साझा संस्था हो, यसलाई राजनीतिक रंग दिनु अनुचित हुन्छ,” भन्ने धारणा व्यक्त गरे।

उहाँका अनुसार व्यवसायीहरूबीच एकता र सहकार्यको खाँचो रहेको अहिलेको समयमा आफूले उम्मेदवारी दिएर व्यवसायी हितमा दृढ भूमिका खेल्ने लक्ष्य लिएको बताउनुभयो। “व्यवसायीका समस्या र अधिकारका पक्षमा बलियो आवाज उठाउने बेला आएको छ,” उहाँले भन्नुभयो।

उहाँले दमकका सम्पूर्ण व्यवसायीहरूप्रति समर्थनको अपेक्षा व्यक्त गर्दै आगामी निर्वाचनमा सक्दो साथ र सहयोगको अपेक्षा राखेको जनाउनुभयो।

दमकका व्यवसायीमाझ लोकप्रिय नाम बनिसक्नुभएका खड्काको उम्मेदवारीसँगै आगामी चुनाव प्रतिस्पर्धात्मक र नीतिगत बहसमा केन्द्रित हुने अपेक्षा गरिएको छ।