भदौ २०, दमक / झापाको दमक–६ स्थित आदर्श सहकारी संस्थाको २९औं वार्षिक साधारणसभा शनिबार सम्पन्न भएको छ। संस्थाका अध्यक्ष विजयकुमार राईको अध्यक्षतामा सम्पन्न सभामा जिल्ला सहकारी संघ झापाका अध्यक्ष प्रेमकुमार कोइरालाको प्रमुख आतिथ्य रहेको थियो।
उद्घाटन सत्रमा दमक–६ का वडाध्यक्ष टेकबहादुर थापा, संघका लेखा संयोजक चुडामणी ओझा, राष्ट्रिय सहकारी बैंकका प्रबन्धक अर्जुन कार्की, पहिलो पाइला नेपाल दमक शाखा अध्यक्ष राजु निरौला लगायतको उपस्थिति रहेको थियो।
अध्यक्ष राईले वार्षिक प्रतिवेदन प्रस्तुत गर्दै सहकारीलाई सुदृढीकरण गर्दै ग्रामीण विकासमा संयोजनकारी भूमिका निर्वाह गर्ने नीतिसहित बचत परिचालन र लगानी अभिवृद्धिमा संस्थाले प्राथमिकता दिएको स्पष्ट पार्नुभयो। उहाँले शेयरसदस्यमुखी कार्यलाई निरन्तरता दिने प्रतिबद्धता पनि व्यक्त गर्नुभयो।
लेखा समितिका संयोजक राजेश रिजालले प्रस्तुत गरेको वित्तीय प्रतिवेदनअनुसार, चालु आर्थिक वर्षमा संस्थाको शेयरपूँजी १ करोड ३७ लाख ४२ हजार रुपैयाँ, कोषमा ६२ लाख रुपैयाँ, नाफा १७ लाख २ हजार रुपैयाँ, बचत ८ करोड १४ लाख ६७ हजार रुपैयाँ, कर्जा ७ करोड २४ लाख ३१ हजार रुपैयाँ र वसुलात १० करोड ६४ लाख रुपैयाँ रहेको छ।
कार्यक्रममा उत्कृष्ट कारोबार गर्ने २५ जना शेयरसदस्यलाई सम्मान गरिएको थियो। त्यस्तै, SEE मा उत्कृष्ट अंक ल्याउने युनिस आचार्यलाई नगद ५ हजारसहित सम्मान गरियो भने उत्कृष्ट कर्मचारी तथा प्रतिनिधि टीका बस्नेतलाई दोसल्ला, प्रमाणपत्र, मायाको चिनो र नगदसहित सम्मान प्रदान गरिएको संस्थाका प्रबन्धक रुद्र खतिवडाले जानकारी दिनुभयो। कार्यक्रममा स्वागत मन्तव्य उपाध्यक्ष फडिन्द्र गर्तौलाले दिनुभएको थियो भने सञ्चालन सदस्य झरेन्द्र खतिवडाले गर्नुभएको थियो।
Leave a Reply