विराटनगर, असोज २१ / हालैको अविरल वर्षापछि इलाम जिल्लामा आएको बाढी र पहिरोबाट प्रभावित परिवारका लागि कोशी प्रदेश सरकारले हेलिकप्टरमार्फत राहत सामग्री पठाएको छ।
प्रदेश सरकारका मुख्यमन्त्री हिम्मत कुमार कार्कीले राहत कार्यलाई तीव्र गतिमा अघि बढाउने र मृतकका परिवारलाई सहयोग पुर्याउने कार्यलाई प्रभावकारी बनाउन निर्देश दिएका छन्।
प्रदेशको आन्तरिक मामिला तथा कानुन मन्त्रालयले नेपाली सेनाको हेलिकप्टरमार्फत बिहानै राहत सामग्री पठाएको हो। स्थलमार्ग अवरुद्ध भएका कारण तत्कालका लागि हवाई मार्ग प्रयोग गरिएको मुख्यमन्त्री कार्कीले जानकारी दिनुभयो।
मन्त्रालयका सचिव रामप्रसाद आचार्यका अनुसार प्रदेश सरकारले दैनिक उपभोग्य सामग्री—चामल, दाल, आलु, तेल, नुन, बेसारसँगै ब्ल्याङ्केट, सिरानी, म्याट्रेस र त्रिपाललगायतका राहत सामग्री इलामका विभिन्न प्रभावित क्षेत्रमा पठाएको हो।
पहिलो चरणमा इलामको माङ्सेबुङ गाउँपालिका र इलाम सदरमुकाममा राहत पुगेको छ भने थप सामग्री पठाउने तयारी भइरहेको मन्त्रालयले जनाएको छ। असोज १७ र १८ गतेको अविरल वर्षाका कारण इलामका विभिन्न ठाउँमा ठूलो जनधनको क्षति भएपछि प्रदेश सरकारले उद्धारपछि राहत कार्य सुरु गरेको हो।
बाढी–पहिरोबाट सूर्योदय नगरपालिका, इलाम नगरपालिका, सन्दकपुर गाउँपालिका, माङ्सेबुङ गाउँपालिका, माईजोगमाई गाउँपालिका, देउमाई नगरपालिका र फाकफोकथुम गाउँपालिकामा मानवीय तथा भौतिक क्षति पुगेको छ।
प्रदेश सरकारले इलामलाई उच्च प्राथमिकतामा राखेर राहत वितरण कार्यलाई निरन्तरता दिने जनाएको छ।
Leave a Reply