माघ २८, दमक / उज्यालो नेपाल पार्टीका अध्यक्ष कुलमान घिसिङले दमकमा नारा–जुलुससहित र्याली निकाल्दै कोणसभा आयोजना गर्नुभएको छ। सो क्रममा निर्वाचन आचारसंहिता उल्लङ्घन भएको आरोप लागेको छ।
निर्वाचन आचारसंहिता अनुसार फागुन ४ गतेदेखि मात्र झण्डासहितको र्याली तथा कोटसभा गर्न पाइने व्यवस्था रहेको छ। तर उक्त मिति अगावै र्याली निकालिएको छ।
दमकमा आयोजित कोणसभालाई सम्बोधन गर्दै अध्यक्ष घिसिङले आफू नेपाल विद्युत प्राधिकरणको नेतृत्वमा रहँदा देशबाट लोडसेडिङ अन्त्य गरिएको र घाटामा रहेको संस्थालाई नाफामा ल्याइएको दाबी गर्नुभयो। नेपालमा उत्पादन गरिएको विद्युत भारत र चीनसम्म निर्यात गरिएको तथा देशका विभिन्न भूभागमा विद्युत आपूर्ति विस्तार गरिएको उहाँले बताउनुभयो।
उहाँले नेपालको राजनीतिमा “दुर्गन्धको लोडसेडिङ, भ्रष्टाचारको लोडसेडिङ र सुशासनमा लोडसेडिङ” रहेको टिप्पणी गर्दै भ्रष्टाचारमुक्त र लोडसेडिङमुक्त नेपाल निर्माणका लागि उज्यालो नेपाल पार्टी स्थापना गरिएको बताउनुभयो। आफूहरू भाषणभन्दा काममा विश्वास गर्ने र परिणाम देखाएर अघि बढ्ने नेता भएको उहाँको भनाइ थियो।
अध्यक्ष घिसिङले राष्ट्रिय परिवर्तन पार्टी र उज्यालो पार्टी एकीकृत भएर उज्यालो नेपाल पार्टी स्थापना भएको जानकारी दिँदै हालका नयाँ भनिएका दलहरू वास्तविक अर्थमा नयाँ नभएको टिप्पणी गर्नुभयो। उज्यालो नेपाल पार्टी सबैभन्दा कान्छो र वैकल्पिक शक्ति भएको उहाँले दाबी गर्नुभयो।
उहाँले मतदातालाई परम्परागत दल त्यागेर पार्टी र मत दुवै परिवर्तन गरी उज्यालो नेपाल पार्टीलाई मतदान गर्न आग्रह गर्नुभयो। देश परिवर्तनका लागि एक मत निर्णायक हुने उल्लेख गर्दै पाँच वर्षपछि पनि आफूलाई पुनः नेतृत्वमा ल्याउने वातावरण बनाउनुपर्ने उहाँले बताउनुभयो।
यस विषयमा निर्वाचन आयोग वा अन्य सरोकारवाला निकायले औपचारिक प्रतिक्रिया भने सार्वजनिक गरिसकेको छैन।
Leave a Reply