दमक / दमक बहुमुखी क्याम्पसअन्तर्गत साहित्यिक मञ्चको आयोजनामा “युवाशक्ति: देश परिवर्तनको चालक” भन्ने मूल नारासहित अन्तर संकाय वक्तृत्वकला प्रतियोगिता बिहीबार भव्य रूपमा सम्पन्न भएको छ।
कार्यक्रमको अध्यक्षता मञ्च अध्यक्ष पार्वत बस्नेतले गर्नुभएको थियो भने प्रमुख अतिथिका रूपमा दमक नगरपालिका वडा नं. ९ का अध्यक्ष कुबेर भट्टराईको उपस्थिति रहेको थियो। विशिष्ट अतिथि तथा सम्माननीय व्यक्तिका रूपमा स्ववियु दमक बहुमुखी क्याम्पसका अध्यक्ष भुपेन्द्र बस्नेत, सचिव राकेश खड्का तथा कोषाध्यक्ष प्रीति मगर सहभागी थिए।
निर्णायक मण्डलमा सहायक प्रमुख रामप्रसाद भण्डारी र प्राध्यापक डा. व्यञ्जना शर्मा रहेका थिए। प्रतियोगितामा १० जना भन्दा बढी विद्यार्थीहरूको सहभागिता रहेको थियो।
प्रतिस्पर्धामा +२ विज्ञान संकायका अंशु बिष्ट प्रथम, बिबिएस संकायका शान राई द्वितीय तथा +२ व्यवस्थापन संकायका निकेस विश्वकर्मा तृतीय स्थान प्राप्त गर्न सफल भए।
कार्यक्रमको अन्त्यतिर आयोजक मञ्चले प्रतियोगिता सफल पार्न सहयोग गर्ने सम्पूर्ण प्रतिस्पर्धी, निर्णायक मण्डल, दर्शक, आयोजक टिम तथा सहयोगी पक्षहरूलाई हार्दिक धन्यवाद तथा आभार प्रकट गरेको थियो।
यसै अवसरमा साहित्यिक मञ्चद्वारा स्ववियुका निर्वाचित पदाधिकारीहरू अध्यक्ष भुपेन्द्र बस्नेत, सचिव राकेश खड्का र कोषाध्यक्ष प्रीति मगरलाई सम्मान गर्दै सफल कार्यकालको शुभकामना पनि व्यक्त गरिएको थियो।
कार्यक्रमको समापनमा अध्यक्ष पार्वत बस्नेतले “कलाको सम्मान, साहित्यको सम्मान र युवा प्रतिभाको उजागर हाम्रो अभियान हो” भन्ने भावपूर्ण मन्तव्य प्रस्तुत गर्नुभएको थियो।
Leave a Reply