भदौ ७, दमक / सुन्दर समाज नेपालले दमक–२ खरखरेस्थित मानव उद्धार सेवा आश्रममा आश्रित रहेका बेसहारा, अशक्त र अनाथहरुका लागि खाद्यान्य सामग्री सहयोग गरेको छ। रोजगारका सिलसिलामा अमेरिका बसोबास गर्दै आएका आराध्य खनालको जन्मदिनको अवसरमा शुक्रबार आयोजित कार्यक्रममा आश्रमलाई खाद्यान्य सामग्री हस्तान्तरण गरिएको हो।
कार्यक्रममा दमक–२ का वडाध्यक्ष प्रजापति सापकोटा, सुन्दर समाज नेपालकी अध्यक्ष बिन्दु (लक्की) सिटौला, पूर्वअध्यक्ष रुपा सेलिङ, आराध्य खनाल, उनका बुबा–आमा, परिवारजन, आफन्त तथा आश्रम सञ्चालकहरूको उपस्थिति थियो।
हाल आश्रममा ५० जना बेसहारा, अशक्त र अनाथहरु आश्रित रहेका छन्। अध्यक्ष सिटौलाका अनुसार आश्रममा बस्नेहरुको दैनिक आवश्यकतामा खाद्यान्यको अभाव भएकाले उक्त सहयोग गरिएको हो। उनले जन्मदिनमा हुने अनावश्यक खर्चलाई सामाजिक सेवामा उपयोग गर्न पाउनु सकारात्मक रहेको बताइन्।
मानव उद्धार सेवा आश्रम स्थापना भएदेखि नै सिटौलाको अगुवाइमा विभिन्न रचनात्मक तथा सामाजिक कार्यक्रम हुँदै आएका छन्। कार्यक्रममा अध्यक्ष सिटौलाले जन्मदिन मनाउने आराध्य खनाललाई सुस्वास्थ्य र दीर्घायुजीवनको शुभकामना व्यक्त गरिन्।
Leave a Reply