Author: Multi Media

माघ २३, दमक / आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै दमकका राजनीतिक दलहरूले निर्वाचन आचारसंहिता पूर्ण रूपमा पालना गर्ने सामूहिक प्रतिबद्धता जनाएका छन्। शुक्रबार दमक नगरपालिकामा आयोजित छलफल कार्यक्रममा सहभागी दल तथा उम्मेदवारहरूले घृणा फैलाउने अभिव्यक्ति बन्द गर्दै शान्तिपूर्ण, मर्यादित र स्वच्छ निर्वाचन सम्पन्न गर्न आफूहरू तयार रहेको साझा धारणा व्यक्त गरे।

कार्यक्रममा बोल्दै दमक नगरपालिकाका प्रमुख राम थापाले निर्वाचन नागरिकको अभिमत प्रकट गर्ने लोकतन्त्रको सुन्दर प्रक्रिया भएकाले यसलाई शान्तिपूर्ण रूपमा सम्पन्न गर्नु सबैको साझा दायित्व रहेको बताउनुभयो। उहाँले झापा क्षेत्र नम्बर ५ सबैको चासोको क्षेत्र भएकाले यहाँ स्वस्थ राजनीतिक प्रतिस्पर्धा देखिनुपर्ने धारणा व्यक्त गर्नुभयो। त्यस्तै, इलाका प्रशासन कार्यालय दमकका प्रमुख विश्वराज नेपालले निर्वाचन आचारसंहिता पालनाको अवस्था सूक्ष्म रूपमा अनुगमन भइरहेको जानकारी दिँदै आचारसंहिता उल्लङ्घन भएमा उम्मेदवारीसमेत खारेज हुन सक्ने भन्दै सबै दललाई सजग रहन आग्रह गर्नुभयो।

छलफलमा नेकपा एमाले दमक नगर अध्यक्ष राम पौडेल, नेपाली कांग्रेस दमक नगर कार्यवाहक सभापति प्रेम भट्टराई, नेपाली कम्युनिस्ट पार्टी नगर अध्यक्ष रवि बस्नेत, राष्ट्रिय स्वतन्त्र पार्टी नगर सभापति तीर्थ लामिछाने, राष्ट्रिय प्रजातन्त्र पार्टी नगर अध्यक्ष हेम सुवेदी, उद्योग वाणिज्य सङ्घका अध्यक्ष गोपाल गुरागाई लगायत धार्मिक तथा सामाजिक क्षेत्रका अगुवाहरूको उपस्थिति रहेको थियो।

कार्यक्रममा सहभागीहरूले जेलबाट फरार कैदी तथा अवैध हतियार नियन्त्रणका लागि एआई (कृत्रिम बुद्धिमत्ता) प्रविधि प्रयोगमा सरकारलाई सहयोग गर्ने प्रतिबद्धतासमेत जनाएका छन्।दलहरूले आचारसंहिता विपरीत गतिविधिमा संलग्न आफ्ना कार्यकर्तालाई आफैं कारबाही गर्ने र निर्वाचनलाई उत्सवका रूपमा सम्पन्न गर्ने साझा निष्कर्ष निकालेका छन्।

माघ २२, दमक / लेखक तथा पशुपालन व्यवसायी ब्रिजकुमार शर्माले राजनीतिक स्थायित्व, सुशासन र समृद्धिको सन्देश बोकेर मेची–महाकाली पैदल यात्रा सुरु गर्नुभएको छ। यात्राका क्रममा उहाँले “स्थिर सरकार युगको आवश्यकता” भन्ने मूल नारासहित देशभर जनचेतना फैलाउने उद्देश्य लिएको बिहिबार दमकमा पत्रकारसँग भेटघाटका क्रममा बताउनुभएको छ।

यात्राको क्रममा प्रयोग गरिएको झोलामा उहाँको पुस्तक ‘आशा–सपना’ को तस्वीरसहित स्थिर सरकारको महत्व दर्शाउने सन्देश अंकित गरिएको छ। राजनीतिक अस्थिरताले विकास र सुशासनमा बाधा पुर्‍याएको उल्लेख गर्दै लेखक शर्माले स्थिर सरकार नै समृद्ध नेपालको आधार भएको धारणा राख्नुभएको छ।

उहाँका अनुसार पैदल यात्रामार्फत नागरिकसँग प्रत्यक्ष संवाद गर्दै राजनीतिक स्थायित्व, जिम्मेवार शासन प्रणाली र जनमुखी विकासबारे बहस सिर्जना गर्ने लक्ष्य रहेको छ। “राजनीतिक स्थायित्व बिना सुशासन सम्भव छैन, र सुशासन बिना समृद्धि हासिल हुँदैन,” उहाँले भन्नुभयो। मेचीदेखि महाकालीसम्मको यो पैदल यात्रा सामाजिक सन्देशमूलक अभियानका रूपमा अघि बढाइएको आयोजक पक्षले जनाएको छ।

माघ २१, दमक / इलाका प्रहरी कार्यालय दमकले ३० वर्षे सेवा अवधि पूरा गरी अनिवार्य अवकाश प्राप्त गर्नु भएकी प्रहरी नायव निरीक्षक (सई) सुजाता सुवेदीको विदाई तथा प्रहरी हवल्दारबाट प्रहरी वरिष्ठ हवल्दार पदमा पदोन्नति हुनु भएकी संगिता देवी निरौला श्रेष्ठलाई दज्र्यानी चिन्ह प्रदान गरेको छ।
कार्यालय परिसरमा सम्पन्न कार्यक्रममा अनिवार्य अवकाश प्राप्त सई सुवेदीलाई कार्यक्रमका प्रमुख अतिथि तथा इलाका प्रहरी कार्यालय दमकका प्रमुख प्रहरी नायव निरीक्षक किशोर लम्सालले प्रशंसा पत्र प्रदान गर्नुभयो। सो अवसरमा बोल्दै कार्यालय प्रमुख लम्सालले सुवेदीले प्रहरी संगठनमा पुर्‍याएको योगदानको उच्च कदर गर्दै अवकाशपछिका दिनमा पनि नेपाल प्रहरी संगठनलाई निरन्तर सहयोग गर्ने विश्वास व्यक्त गर्नुभयो।
यसैगरी दज्र्यानी चिन्ह प्राप्त गर्नु भएकी प्रहरी वरिष्ठ हवल्दार संगिता देवी निरौला श्रेष्ठलाई बधाई दिँदै कार्यालय प्रमुख लम्सालले पदोन्नतिसँगै जिम्मेवारी पनि बढेकाले इमान्दारिताका साथ कर्तव्य निर्वाह गरी उदाहरणीय प्रहरी बन्न निर्देशन दिनुभयो।
विदाई मन्तव्य राख्दै सई सुवेदीले आफ्नो ३० वर्षे सेवा अवधिमा भोगेका अनुभवहरू साझा गर्नुभयो। संगठनमा रहँदा विभिन्न कठिन परिस्थिति, दुःख–सुख, बाधा–बेहोरनाका बाबजुद अग्रज तथा सिनियर अधिकृतहरूको साथ, सहयोग र मार्गदर्शनका कारण लामो समयसम्म प्रहरी संगठनको गरिमा कायम राख्न सफल भएको बताउनुभयो।

सेवा अवधिभर कुनै पनि कारबाहीमा नपर्न पाएकोमा गर्व लागेको उहाँले उल्लेख गर्नुभयो। कार्यक्रमको अन्त्यमा इलाका प्रहरी कार्यालय दमकका सम्पूर्ण प्रहरी परिवारले सई सुवेदीलाई सहसम्मान विदाई गर्दै प्रहरी भ्यानमार्फत घर पठाएको कार्यालयले जनाएको छ।

माघ २१, दमक / झापाको दमक नगरपालिका–१ बरगाछीस्थित भित्री सडक खण्डमा सवारी दुर्घटना हुँदा दुई युवाको ज्यान गएको छ। दमकबाट रामचोकतर्फ जाँदै गरेको मे १ ख २८८४ नम्बरको टिफर र दुर्गा मन्दिरबाट पेल्टीमारीतर्फ जाँदै गरेको प्र.१-०१-०१८ प ८३०३ नम्बरको मोटरसाइकल एकआपसमा ठोक्किँदा दुर्घटना भएको हो।

दुर्घटनामा मोटरसाइकल चालक जिल्ला इलाम चुलाचुली गाउँपालिका–४ निवासी २२ वर्षीय प्रवेश राई र पछाडि सवार सोही ठाउँका १९ वर्षीय जनम राई गम्भीर घाइते भएका थिए। दुवै जनालाई उपचारका लागि दमक अस्पताल ल्याइएकोमा उपचारकै क्रममा दिउँसो ३:५० बजे चिकित्सकले मृत घोषणा गरेका हुन्।

टिपर चालक जिल्ला उदयपुर त्रियुगा नगरपालिका–९ राटमाटे निवासी ३२ वर्षीय हिबराज राय रहेको प्रहरीले जनाएको छ। दुर्घटनापछि टिपर चालक, टिपर र मोटरसाइकललाई नियन्त्रणमा लिएर इलाका प्रहरी कार्यालय दमकमा राखिएको छ। मृतक दुवैको शव हाल दमक अस्पतालमै राखिएको छ भने घटनाबारे थप अनुसन्धान भइरहेको प्रहरीले जनाएको छ।