Author: Multi Media

माघ २१, दमक / नेपाली कांग्रेसले झापा क्षेत्र नम्बर–५ को निर्वाचनलाई लक्षित गर्दै केही सञ्चारमाध्यम र सामाजिक सञ्जालमार्फत भ्रामक तथा तथ्यहीन सामग्री प्रसारण भइरहेको भन्दै गम्भीर आपत्ति जनाएको छ।

कांग्रेस झापा–५ चुनाव प्रचार–प्रसार अन्तर्गतको सूचना सञ्जाल समन्वय समितिको आयोजनामा मंगलबार बिहान दमकमा आयोजित पत्रकार अन्तरक्रिया कार्यक्रममा नेताहरूले पत्रकारिताका सामान्य मूल्य–मान्यता, सिद्धान्त तथा निर्वाचन आचारसंहिता विपरीत सामग्री सार्वजनिक भइरहेको आरोप लगाएका हुन्। यस्ता समाचार तथा प्रचार सामग्रीले नागरिकको सत्य सूचना पाउने अधिकार हनन भएको कांग्रेसको ठहर छ।

कार्यक्रममा झापा–५ बाट कांग्रेसका उम्मेदवार मन्धरा चिमरिया पौडेलको उपस्थितिमा नेताहरूले विघटित संसदको सबैभन्दा ठूलो दल कांग्रेस भए पनि सञ्चारमाध्यमहरूले दल र उम्मेदवारको मर्यादा विपरीत सामग्री प्रस्तुत गरेको गुनासो गरे। अघिल्लो निर्वाचनमा निकट प्रतिस्पर्धी दलको हैसियत बनाएको कांग्रेसलाई बेवास्ता गर्दै चौथो–पाँचौँ दलका उम्मेदवारलाई प्राथमिकतामा राखेर समाचार सम्प्रेषण गरिएको भन्दै उनीहरूले निष्पक्षतामाथि प्रश्न उठाए।

कांग्रेस केन्द्रीय सदस्य सुरेश सुब्बाले सर्लाही र झापाका विषयलाई जोड्दै प्रविधिको दुरुपयोगमार्फत सामाजिक सञ्जालमा फैलाइएका प्रचारमा कुनै सत्यता नरहेको बताए। यस्ता गतिविधिले सञ्चार जगतको विश्वसनीयतामाथि नै प्रश्नचिन्ह खडा गरेको उनको टिप्पणी थियो।

“कल्पनामा आधारित सूचना सामग्री सामाजिक सञ्जालमा सार्वजनिक गर्नु अघि जिम्मेवारी र कर्तव्यबोध हुनुपर्छ,” उनले भने। साथै, कांग्रेसविरुद्ध भ्रम फैलाउने तत्वको पहिचान भइसकेको दाबी गर्दै कानुनी उपचार खोजिने चेतावनी दिए।

कांग्रेस झापाका कार्यवाहक सभापति शेरबहादुर भट्टराईले झापा–५ का विषयमा देश–विदेशबाट भ्रम फैलाउने प्रयास भइरहेको भन्दै नागरिकलाई सचेत रहन आग्रह गरे। कांग्रेसभित्र उम्मेदवारीलाई लिएर कुनै मतभेद नरहेको र पार्टी एकताबद्ध रूपमा चुनावी मैदानमा उत्रिएको उनको भनाइ थियो।

त्यस्तै, कांग्रेस झापा–५ का सभापति ढुण्डीराज भण्डारीले यसपटक झापा–५ मा गुमेको कांग्रेसको विरासत फर्काउने दृढ अठोटसहित नेता–कार्यकर्ता चुनावी अभियानमा सक्रिय रहेको बताए। विपक्षी दलहरूले कांग्रेस जितको नजिक पुगेको देखेपछि सामाजिक सञ्जालको दुरुपयोग र मतदाताको गोपनीयता भंग गर्ने जस्ता गैरजिम्मेवार गतिविधि गरिरहेको आरोप पनि उनले लगाए।

कार्यक्रममा नेताहरूले सञ्चारमाध्यमलाई निष्पक्ष र स्वतन्त्र पत्रकारिताको अभ्यास गर्न आग्रह गर्दै पत्रकारिताको मूल्य–मान्यता र सिद्धान्तअनुसार सबै दल र उम्मेदवारप्रति समान व्यवहार भए मात्र लोकतन्त्र सुरक्षित रहने धारणा व्यक्त गरे।

माघ २०, दमक / दमक नगरपालिकाले यस वर्ष पनि व्यवसाय अनुगमन तथा राजस्व संकलन अभियान सुरु गरेको छ। नगरपालिकाको राजस्व शाखा प्रमुख डम्बर बरालको नेतृत्वमा अभियान मङ्गलबारदेखि औपचारिक रूपमा सुरु गरिएको हो।
दमक–१ स्थित नगरपालिका गेट अगाडिबाट सुरु गरिएको यो अभियान नगरका सबै वडाभित्र सञ्चालन हुने जनाइएको छ। अभियानअन्तर्गत व्यापार–व्यवसायका फर्ममा पुगेर व्यवसायिक समस्या बुझ्ने, दर्ता तथा नवीकरण प्रक्रिया, राजस्व संकलनसम्बन्धी जानकारी दिने, व्यवसायिक संस्थागत विकासबारे सचेतना फैलाउने तथा बाँकी बक्यौता संकलन गर्ने कार्य गरिने राजस्व अधिकृत बरालले जानकारी दिनुभयो।
नगरपालिकाका अनुसार यो अभियान करिब ९० दिनसम्म सञ्चालन हुनेछ। दमक नगरपालिकाको १७औँ नगर सभाको निर्णयअनुसार अभियान सुरु गरिएको हो। नगर प्रमुख राम थापा, उपप्रमुख रेगिना भट्टराई प्रसाई तथा दमक–१ का वडाध्यक्ष हरि प्रसाद न्यौपाने लगायतले नगरभित्र रहेका उद्योगी तथा व्यवसायीलाई बाँकी बक्यौता तथा कर समयमै बुझाई नगरपालिकालाई सहयोग गर्न अपिल गर्नुभएको छ।
अभियानको पहिलो दिनमा ४४ हजार रुपैयाँ राजस्व संकलन भएको राजस्व अधिकृत बरालले बताउनुभयो। साथै, ६५ वटा व्यापार–व्यवसायको अनुगमन गरिएको र ६ वटा पसललाई बक्यौता असुलीका लागि पत्राचार गरिएको जनाइएको छ।

माघ २०, दमक / शिवसताक्षी नगरपालिका वडा नं. ११ स्थित श्री राष्ट्रिय रमणिय आदर्श माध्यमिक विद्यालयको ५६ औँ वार्षिकोत्सवको अवसरमा नि:शुल्क दन्त परीक्षण शिविर सम्पन्न भएको छ।
आमा डेन्टल केयर प्रा. लि. दमकको प्राविधिक सहकार्यमा आयोजित शिविरमा डा. मीरा आचार्य तथा डा. लक्ष्मी पोद्दारको टोलीले सेवा प्रदान गरेको थियो। शिविरमा विद्यार्थी, शिक्षक तथा अभिभावक गरी करिब ३०० जनाको दन्त परीक्षण गरिएको थियो। तीमध्ये ३० जनाको दाँत खोल्ने उपचार गरिएको छ भने आवश्यकताअनुसार औषधि पनि वितरण गरिएको आयोजकले जनाएको छ।
शिविरमा दन्त परीक्षण गराएका सेवाग्राहीहरूका लागि आमा डेन्टल केयरले विशेष सहुलियतको व्यवस्था गरेको छ। जसअनुसार स–परिवारका लागि नि:शुल्क ओपिडी सेवा, एक वर्षसम्म ५ प्रतिशतदेखि २० प्रतिशतसम्म उपचार छुट तथा एक महिनासम्म डिजिटल डेन्टल एक्स–रे सेवामा ५० प्रतिशत छुट उपलब्ध गराइने जानकारी दिइएको छ।
विद्यालय व्यवस्थापन समितिले स्वास्थ्य सचेतना अभिवृद्धिमा सहयोग पुर्‍याउने यस्ता कार्यक्रमलाई आगामी दिनमा पनि निरन्तरता दिने जनाएको छ।

माघ १९, गौरादह / पहिलो पाइला नेपाल गौरादह शाखाको आयोजनामा गौरादह–कुइनेटारस्थित खुडी क्षेत्रमा राष्ट्रिय झण्डा फहराउने कार्यक्रम सम्पन्न भएको छ।

कार्यक्रममा पहिलो पाइला नेपाल गौरादह शाखाका अध्यक्ष भुपेन्द्र निरौला, द्वितीय उपाध्यक्ष बाबुराम अधिकारी, सचिव प्रदीप धमला, सदस्य चाहना योगी, कुइनेटार पर्यटकीय क्षेत्रका सचिव शेरबहादुर राणा मगर तथा सदस्य रामकुमार दाहालको उपस्थिति रहेको थियो।

कार्यक्रममा मन्तव्य राख्दै कुइनेटार पर्यटकीय क्षेत्रका सचिव शेरबहादुर राणा मगरले गौरादहबाट आएर राष्ट्रिय झण्डा फहराइदिएकोमा पहिलो पाइला नेपाल गौरादह शाखाप्रति आभार व्यक्त गर्नुभयो। साथै, केही दिनभित्रै बाँकी स्थानहरूमा रहेका झण्डाहरू पनि फेरिसक्ने प्रतिबद्धता जनाउनुभयो।

कार्यक्रमको समापन मन्तव्यमा अध्यक्ष भुपेन्द्र निरौलाले सबै स्थानमा झण्डा फेर्दा पर्यटकीय क्षेत्र अझ आकर्षक देखिने उल्लेख गर्दै शौचालयलगायत अन्य व्यवस्थापकीय पक्षमा पनि सुधार गर्न आवश्यक रहेको सुझाव व्यक्त गर्नुभयो।

माघ १८, दमक / झापाको दमक नगरपालिका–४ स्थित चिया दोकान क्षेत्रमा रहेको न्यु पाथिभरा फर्निचर उद्योगमा काम गर्ने क्रममा एक जना कामदार गम्भीर घाइते भएका छन्।

मिति २०८२ साल १० महिना १७ गते बिहान करिब ०६:१५ बजे, मोरङको रतुवामाई नगरपालिका–४ निवासी वर्ष ४० का विर बहादुर ताजपुरिया काठ चिर्ने काम गरिरहेका बेला अचानक मेसिनले उनको बाँया हात काटिँदा (चुडिएको अवस्थामा) गम्भीर घाइते भएका हुन्।

घाइते ताजपुरियालाई तत्काल उपचारका लागि आम्दा अस्पताल दमक ल्याइएकोमा सामान्य उपचारपछि थप उपचारका लागि नोबेल अस्पताल विराटनगर रेफर गरिएको प्रहरीले जनाएको छ।

उक्त फर्निचर उद्योग दमक–४ निवासी युवराज बुढाथोकीले सञ्चालन गर्दै आएका छन्। घटनाबारे प्रहरी टोलीले थप अनुसन्धान गरिरहेको जनाएको छ।

माघ १६ दमक / झापाको दमक नगरपालिका–१, सुर्यदय टोलमा विद्युत सर्टका कारण आगलागी हुँदा दुईवटा कच्ची घर पूर्ण रूपमा जलेर नष्ट भएका छन्। शुक्रबार दिउँसो स्थानीय ५७ वर्षीय हर्कबहादुर कुमालको काठ र टिनले बनेको एकतले कच्ची घरमा विद्युत सर्ट भई आगलागी भएको हो। आगो नजिकै रहेको उनका ५० वर्षीय भाई हरिबहादुर कुमालको काठको संरचना र टिनको छानो भएको एकतले कच्ची घरमा समेत सल्किएपछि दुवै घर पूर्ण रूपमा जलेर नष्ट भएका छन्।

आगलागीबाट हर्कबहादुर कुमालको घरभित्र रहेको आधा तोला सुन, खाद्यान्न, लत्ताकपडा, फर्निचर लगायतका सामग्री जलेर करिब चार लाख रुपैयाँ बराबरको क्षति भएको छ। त्यस्तै, हरिबहादुर कुमालको घरमा रहेको खाद्यान्न, लत्ताकपडा र फर्निचर जलेर करिब तीन लाख रुपैयाँ बराबरको क्षति भएको प्रहरीले जनाएको छ।

दमक नगरपालिका, कमल गाउँपालिका र मोरङको उर्लाबारी नगरपालिकाबाट खटिएका दमकल, इलाका प्रहरी कार्यालय दमकको प्रहरी टोली, सशस्त्र प्रहरी बल तथा स्थानीयबासीको संयुक्त प्रयासमा आगो पूर्ण रूपमा नियन्त्रणमा लिइएको थियो। घटनाबारे थप अनुसन्धान भइरहेको प्रहरीले जनाएको छ।