Author: Multi Media

गाैरादह, कार्तिक ९ — पहिलो पाईला नेपाल गाैरादह शाखाकाे आयोजनामा गाैरादह–९ स्थित बैगुन्धुरा बजारमा बृहत् रक्तदान कार्यक्रम सम्पन्न भएको छ।

कार्यक्रमकाे अध्यक्षता पहिलो पाईला नेपाल गाैरादह शाखाका अध्यक्ष भुपेन्द्र निरौला र सह–काेषाध्यक्ष यलिजा भेट्वालकाे संयोजकत्वमा भएको थियो भने प्रमुख अतिथि गाैरादह–९ का वडाध्यक्ष उपेन्द्र निरौला रहनु भएको थियो।

कार्यक्रममा रेडक्रस जिल्ला उपमन्त्री प्रकाश खरेल, दमक रेडक्रसका प्रवर्तक सिद्दार्थ दहाल, गाैरादह रेडक्रसका प्रतिनिधि भरत गौतम, पहिलो पाईला नेपाल दमक शाखाका अध्यक्ष राजु निरौला, गतिशील युवा क्लबका अध्यक्ष किशोर परियार, अमर मावि बैगुन्धुराका प्र.अ. टी.बी. पौडेल, बैगुन्धुरा अंग्रेजी माविका प्र.अ., साना किसान बैगुन्धुराका पर्वतक सोम अधिकारी र दमक टाउनका सम्पादक डिकेन्द्र बस्नेत लगायतका अतिथिहरूको सहभागिता रहेको थियो।

कार्यक्रममा शाखा सदस्य पोसेङ्का बास्तोलाले स्वागत मन्तव्य राख्नुभएको थियो भने भरत गौतमले व्यानर पढेर कार्यक्रम उद्घाटन गर्नुभएको थियो। संयोजक यलिजा भेट्वालले कार्यक्रममाथि प्रकाश पार्नुभएको थियो।

उक्त कार्यक्रममा दमक रेडक्रसका प्रवर्तक सिद्दार्थ दहालले पहिलो पाईला नेपाल गाैरादह शाखा अध्यक्ष भुपेन्द्र निरौलालाई ब्लड बैंक हस्तान्तरण गर्नुभएको थियो। सोही क्रममा अध्यक्ष निरौलाले रक्तदान गरेर कार्यक्रमको औपचारिक उद्घाटन गर्नुभयो।

कार्यक्रममा उल्लेखनीय संख्यामा रक्तदाताको सहभागिता रहेको थियो। कार्यक्रममा ३० पिन्ट रगत सङ्कलन भएको थियो ।

कार्यक्रमका क्रममा नेपाल रेडक्रस दमक शाखा र गाैरादह शाखालाई सम्मानपत्र र माया चिनो प्रदान गरिएको थियो। साथै, सदस्यता प्रमाणपत्र लिन बाँकी रहनुभएका एकराज रेग्मीलाई सदस्यता प्रमाणपत्र प्रदान गरिएको थियो।

सोही अवसरमा रु १ कार्यक्रमको उद्घाटन प्रमुख अतिथि वडाध्यक्ष उपेन्द्र निरौलाले गर्नुभयो। उहाँले पहिलो पाईला नेपाल गाैरादह शाखाले समुदायका लागि उत्कृष्ट कार्य गर्दै आएको बताउँदै वडाको तर्फबाट निरन्तर साथ र सहयोग रहने प्रतिवद्धता व्यक्त गर्नुभयो।

कार्यक्रममा शाखा अध्यक्ष भुपेन्द्र निरौला, सचिव प्रदीप धमला, कोषाध्यक्ष सुस्मिता भुजेल, सह–कोषाध्यक्ष यलिजा भेट्वाल, सदस्यहरू लोकनाथ रेग्मी, पोसेङ्का बास्तोला, यमुना खत्री र एकराज रेग्मी लगायतको उपस्थित रहेको थियो।

कार्यक्रमको सञ्चालन पहिलो पाईला नेपाल गाैरादह शाखा सचिव प्रदीप धमलाले गर्नुभएको थियो।

दमक/ सर्वोदय इङ्ग्लिस बोर्डिङ अन्तर्गत रहेको सर्वोदय बाल क्लब र सर्वोदय स्काउट दलको संयुक्त आयोजनामा देउसी भैलो कार्यक्रम भव्यताका साथ सम्पन्न भएको छ। शुभ दीपावली २०८२ को अवसरमा आयोजना गरिएको उक्त कार्यक्रम काग तिहारदेखि लक्ष्मी पूजाको भोलिपल्टसम्म चार दिनसम्म सञ्चालन भएको थियो।

विद्यार्थीको नेतृत्व र व्यक्तित्व विकास गर्ने उद्देश्यले सञ्चालन गरिएको यस कार्यक्रममा सम्पूर्ण कार्यहरू स्वयं विद्यार्थीहरूले नै गरेका थिए। क्लबकी अध्यक्ष श्रीविना राईका अनुसार देउसी भैलोबाट संकलित रकम विद्यार्थीहरूको विपद् कोष र सामाजिक उत्तरदायित्व अन्तर्गतका कार्यक्रमहरूमा खर्च गरिनेछ। यस अन्तर्गत सामुदायिक विद्यालयमा “एक विद्यार्थी, एक कापी” उपहार कार्यक्रम, सचेतना कार्यक्रमलगायतका सामाजिक कार्यहरू सञ्चालन गरिने जनाइएको छ।

क्लबले विगतमा पनि मानव सेवा आश्रममा सहयोग, सडक कुकुरलाई खाना वितरण, मन्दिरमा सहयोग लगायतका सामाजिक कार्य गर्दै आएको सर्वोदय स्काउट ट्रुप लिडर श्रीविना राइले बताइन ।

कार्तिक ८, दमक / हेप्पी नेपालमा उपचारपछि स्वयंसेवकका रूपमा कार्यरत रहेका राजेन्द्र गुरुङ्ग २०८२ असोज २५ गतेदेखि हराइरहेका थिए। निरन्तर खोजतलास र विभिन्न निकाय, समुदायजन तथा सञ्चारमाध्यमहरूको सहयोगपछि उहाँ सुनसरीको धरानमा सुरक्षित अवस्थामा फेला परेका छन्।

हेप्पी नेपालका अध्यक्ष कुमार गुरुङ्ग स्वयं धरान पुगेर फेला परेका गुरुङ्गलाई सुरक्षित रूपमा ल्याई उहाँकी बहिनी मुना गुरुङ्गलाई औपचारिक रूपमा बुझाएको संस्थाले जनाएको छ।

गुरुङ्गको खोजीमा सहयोग र साथ प्रदान गर्ने प्रहरी प्रशासन, सञ्चारकर्मी, समाजसेवी, सामाजिक सञ्जालका प्रयोगकर्ता तथा सबै शुभेच्छुहरूलाई हेप्पी नेपाल परिवारले धन्यवाद व्यक्त गरेको छ।

दमक, कार्तिक ८ — तिहार सकिएलगत्तै हर्षोल्लासपूर्वक मनाइने छठ पर्वको तयारी यस वर्ष पनि तीव्र गतिमा अघि बढेको छ। मुख्यतः आदिवासी कोच समुदायले मनाउने यो पर्वका अवसरमा जिल्लाभर नदीकिनारका पूजास्थलहरू सिंगार्ने, सरसफाइ गर्ने तथा सजावटका कामहरू सुरु भएका छन्।

दमकसहित झापाका एक दर्जनभन्दा बढी स्थानमा यस वर्ष पनि छठ पर्व भव्य रूपमा मनाउने तयारी भइरहेको छ। दर्शनार्थीको भीड व्यवस्थापन गर्न ट्राफिक व्यवस्थापनलाई समेत बलियो बनाइने तयारी थालिएको दमक नगरपालिका–७ का वडाध्यक्ष भीम प्रसाद पौडेलले जानकारी दिए।

दमकको रतुवा खोला किनार विगतका वर्षझैँ यसपटक पनि भक्तजनहरूको मुख्य आकर्षण बन्ने भएको छ। यस स्थानमा मैथिली सेवा समाजको अगुवाइमा वृहत छठ पूजाको आयोजना हुँदैछ। करिब तीन सय पूजाघाट निर्माण गरिँदै छन्।

पक्की सिँढी निर्माण भएपछि घाटमा पुग्न र पूजा गर्न बृद्धबृद्धा तथा महिला भक्तजनलाई सहज हुने अपेक्षा गरिएको आयोजक समितिले जनाएको छ। अनुमान अनुसार यस वर्ष करिब ३० हजार भक्तजन पूजाअर्जा र अवलोकनका लागि दमक रतुवा घाट पुग्नेछन्।

यसैबीच, पछिल्ला वर्षहरूमा भद्रपुर तथा भारतको गलगलिया क्षेत्रका स्थानीयले पनि छठलाई समावेशी साझा पर्वका रूपमा लिन थालेका छन्। चार दिनसम्म मनाइने यस पर्वको पहिलो र दोस्रो दिन सरसफाइ तथा शुद्धताको कार्य हुन्छ। तेस्रो दिन बेलुका अस्ताउँदो सूर्यलाई अर्घ्य अर्पण गरेर पूजाको औपचारिक सुरूवात गरिन्छ भने चौथो दिन बिहान उदाउँदो सूर्यलाई अर्घ्य चढाएपछि पर्व सम्पन्न हुन्छ।

मैथिल समाजका पूर्वअध्यक्ष रमेशचन्द्र झाले जनकपुरपछि सर्वाधिक जनसहभागिता भद्रपुर क्षेत्रमा हुने बताएका छन्। उनका अनुसार मेची नदी किनारमा हुने पूजा अवलोकन गर्न नेपाल र भारतका गरी करिब एक लाख भक्तजन उपस्थित हुने अनुमान गरिएको छ।

दमक, ३ कार्तिक — आज नेपालभर कुकुर तिहार मनाइँदैछ । प्रत्येक वर्ष जस्तै यस वर्ष पनि नेपाली घर–आँगनदेखि सडकका कुकुरसम्मलाई टीका, माला लगाइ मीठा खानेकुरा खान दिई पूजा गर्ने परम्परा देखिएको छ । हिन्दू धर्मशास्त्रअनुसार कुकुरलाई यमराजका दूत र भगवान भैरवको वाहनका रूपमा वर्णन गरिएको छ । त्यसैले पनि प्रत्येक वर्षको कृष्ण चतुर्दशीका दिन कुकुरको विशेष रूपमा पूजा गरिन्छ ।

यस दिनलाई नरक चतुर्दशी पनि भनिन्छ । जनविश्वासअनुसार यस दिन “नर्के नुहाउने” चलनले सबै पाप नाश हुन्छ भन्ने मान्यता रहिआएको छ । साथै, मासको पातको साग खाने चलन पनि रहँदै आएको छ ।

तर पछिल्ला वर्षहरूमा कुकुर तिहार देखावटी रूपमा सीमित बन्दै गएको देखिन्छ । सडकका कुकुरहरूलाई एक दिन विशेष खाना खुवाइए पनि तिहार सकिएलगत्तै त्यही कुकुरप्रति समाजको दृष्टिकोण फेरिने गरेको छ । धेरैजसो मानिसले वर्षका बाँकी दिनमा सडकका कुकुरलाई लखेट्ने, डुङ्गा हान्ने, कुटपिट गर्ने जस्ता व्यवहार गर्ने गरेको पाइन्छ ।

धर्मशास्त्रमा कुकुरलाई सुरक्षाकर्मी र मोक्षद्वारका पहरेदारका रूपमा उल्लेख गरिएको छ । तर व्यवहारमा भने त्यो सम्मान केवल एक दिनमै सीमित देखिन्छ ।

विशेषज्ञहरूका अनुसार, “कुकुर तिहारको वास्तविक सार कुकुरप्रतिको माया, करुणा र सहअस्तित्व हो । त्यसैले यो भावना वर्षभर कायम राख्न सके मात्र यो पर्वको सार्थकता रहन्छ ।”

यस वर्ष पनि धेरै स्थानमा सडकका कुकुरलाई खोजी–खोजी माला र टीका लगाइ खानेकुरा खुवाउने दृश्य देखिए । यद्यपि, कुकुर तिहारको भावना केवल एक दिनमा सीमित नराखी वर्षभरै कुकुरप्रति दयालु व्यवहार गर्ने चेतना समाजमा फैलाउन आवश्यक देखिन्छ ।

कार्तिक ३ / गौरादा, झापा — झापाको गौरादा नगरपालिका–५ मा नवनिर्मित हिटीधारा समुद्घाटन गरिएको छ। सोमबार एक विशेष समारोहका बीच गौरादा–५ स्कुल चाैन माध्यमिक विद्यालय अगाडि आयोजित कार्यक्रममा गौरादा नगरपालिका वडा नं. ५ का वडाध्यक्ष जगन्नाथ खनालको प्रमुख आतिथ्यतामा हिटीधाराको समुद्घाटन गरिएको हो।

ज्ञानबहादुर कटुवाल र मुनिकादेवी कटुवालको आर्थिक सहयोगमा निर्मित उक्त हिटीधाराको नाम “चन्द्रमाया हिमालयन टाईगर धारा” राखिएको छ। स्वर्गीय पदमबहादुर कटुवाल र स्वर्गीय चन्द्रमाया कटुवालको स्मृतिमा धारा निर्माण गरिएको हो।

कार्यक्रमको आयोजना क्लब हिमालयन टाईगर गौरादा शाखाले गरेको थियो। कार्यक्रमका प्रमुख अतिथि वडाध्यक्ष खनालले गौरादामा मौलिकता झल्किने हिटीधारा जडान हुनु गौरवको विषय भएको बताउँदै आधुनिकता र परम्पराको सुन्दर समिश्रणका रूपमा यस कार्यलाई प्रशंसा गर्नुभयो।

त्यसैगरी, हिमालयन टाईगरका केन्द्रीय महासचिव राजु खड्काले विद्यालय क्षेत्र र बजार नजिकै यस्तो सार्वजनिक धारा निर्माण हुनु समाजका लागि उदाहरणीय योगदान भएको बताउँदै, संस्थाले देश–विदेशमा सहकार्य गर्दै सामाजिक कार्यमा सक्रिय रहेको जानकारी दिनुभयो।

स्कुल चाैन माध्यमिक विद्यालयका प्रधानाध्यापक गुरुदेव भण्डारीले विद्यालय क्षेत्रमै हिटीधारा जडान भएपछि विद्यार्थीहरूलाई शुद्ध पिउने पानी उपलब्ध हुने र वातावरणीय सौन्दर्यमा पनि वृद्धि हुने बताउनुभयो।

कार्यक्रमका अवसरमा ज्ञानबहादुर कटुवाल र मुनिकादेवी कटुवाललाई समाजसेवामा उदाहरणीय योगदानका लागि सम्मानपत्रद्वारा सम्मान गरिएको थियो।

उक्त कार्यक्रममा गौरादा नगरपालिका वडा नं. २ का वडाध्यक्ष गोपाल प्रसाद कोइराला, समाजसेवी पदम रावत, प्रकाश  कार्की लगायतको उपस्थिति रहेको थियो। कार्यक्रम निर्मला शर्माको संयोजनमा, सचिव निर्मला रिमालको सञ्चालनमा र सरिता कटवाल कार्कीको अध्यक्षतामा सम्पन्न भएको थियो।