Author: Multi Media

कार्तिक २, दमक / भुटानी शरणार्थी शिविर (बेलडागी क्याम्प)मा आइतबार ग्लोबल फाउन्डेसन अफ अमेरिकाका संस्थापक अध्यक्ष प्रजा धिताल तथा उनको टिमलाई स्वागत तथा सम्मान गरिएको छ।

पूर्व वस्ती व्यवस्थापन समितिको आयोजनामा भएको उक्त कार्यक्रममा धिताललाई दोसल्ला, नेपाली ढाका टोपी र सम्मानपत्र प्रदान गरिएको थियो। कार्यक्रमको अध्यक्षता पूर्वक्याम सचिव टि. भी. राईले गर्नुभएको थियो भने सञ्चालन मनोज राईले गर्नुभएको थियो।

ग्लोबल फाउन्डेसन अफ अमेरिकाले सन् २०२३ देखि बेलडागी क्याम्प दमक र पथरीस्थित बाल विकास केन्द्रमा स्वास्थ्य सेवा निरन्तर दिँदै आएको छ। फाउन्डेसनले स्थानीयहरूलाई निःशुल्क औषधि वितरण, महिलामुखी स्वास्थ्य सचेतना कार्यक्रम र सेनेटरी प्याड वितरणजस्ता गतिविधि गर्दै आएको छ।

कार्यक्रममा प्रमुख अतिथि प्रजा धितालले आगामी दिनमा पनि स्वास्थ्य सेवामा सहयोग निरन्तर रहने बताउँदै शिविरका लागि एम्बुलेन्स व्यवस्थापन गर्ने प्रतिबद्धता जनाउनुभयो।

विशिष्ट अतिथिहरूमा ग्लोबल फाउन्डेसन नेपालका अध्यक्ष भोला धिताल, राप्रपा क्षेत्र नम्बर ५ का सदस्य राजु बुढाथोकी, ग्लोबल फाउन्डेसन नेपालका सिइओ केजाङ घिसिङ, फाउन्डर मेम्बर गोविन्द कोइराला लगायतको उपस्थिति रहेको थियो।

कार्यक्रममा बोल्दै विशिष्ट अतिथिहरूले शिक्षा र स्वास्थ्य मानव जीवनका अनिवार्य पक्ष भएको बताउँदै ग्लोबल फाउन्डेसन अफ अमेरिकाले शरणार्थी समुदायको जीवनस्तर सुधारमा महत्वपूर्ण योगदान पुर्‍याउँदै आएको उल्लेख गर्नुभयो।

कार्यक्रममा स्वागत मन्तव्य पूर्व व्यवस्थापन समितिका सल्लाहकार देवीदास राईले गर्नुभएको थियो। अध्यक्ष टि. भी. राईले पनि ग्लोबल फाउन्डेसनको निरन्तर सहयोगप्रति आभार व्यक्त गर्दै आगामी दिनमा पनि सो सहयोग जारी रहने अपेक्षा व्यक्त गर्नुभयो।

कमल, १ कार्तिक — कमल गाउँपालिका–२ तोपगाछीस्थित कमल नगर अस्पतालमा आइतबार पनि नियमित रूपमा दन्त सेवा निरन्तर रूपमा सञ्चालन गरिएको छ।

दमक हस्पिटल एण्ड रिसर्च सेन्टरका विशेषज्ञ चिकित्सकहरूको टोलीले अस्पतालमा पुगेर निःशुल्क दन्त स्वास्थ्य सेवा प्रदान गरेको हो। दन्त परीक्षण, गिजा सम्बन्धी समस्या पहिचान, डेन्टल एक्स–रे तथा नन–सर्जिकल दाँत खोल्ने जस्ता सेवा उपलब्ध गराइएको अस्पतालले जनाएको छ।

स्थानीय सेवाग्राही दिवस खतिवडाले आफ्नी छोरीको उपचारका लागि अस्पताल पुगेका थिए। सेवा लिएपछि उनले गाउँमै गुणस्तरीय दन्त सेवा प्राप्त गर्न पाएकोमा खुसी व्यक्त गर्दै यसलाई ‘प्रशंसनीय पहल’ भनेका छन्।

हालै अस्पतालमा अत्याधुनिक दन्त चेयर जडान गरिएपछि बिरामीको संख्या र सेवाप्रतिको सन्तुष्टि दुवै बढेको अस्पताल प्रशासनले जनाएको छ।

सो सेवामा डा. सिपी गैरे, हेमराज गैरे र डा. सायरा ढकालसहितको प्राविधिक टोलीले नियमित रूपमा सेवा प्रदान गर्दै आएको छ।

दमक हस्पिटल एण्ड रिसर्च सेन्टर, दमकको प्राविधिक सहयोगमा सञ्चालन भइरहेको यो सेवा प्रत्येक आइतबार र बिहीबार उपलब्ध गराइन्छ।

दमक, १ कार्तिक–नेशनल लाइफ इन्स्योरेन्स कम्पनी दमक र उर्लाबारी शाखाले दमकमा शनिबार संयुक्त कार्यक्रमको आयोजना गरेर अभिकर्ता सम्मान गरेको छ ।

झापाको दमक र मोरङको उर्लाबारी शाखा कार्यालय मार्फत आर्थिक वर्ष २०८१।०८२ मा व्यवसाय गर्दै विभिन्न विद्यागततर्फ उत्कृष्ट हुने अभिकर्ताहरुलाई कार्यक्रममा सम्मान गरिएको हो । कम्पनीको केन्द्रीय कार्यालयबाट आर्थिक वर्ष २०८१।०८२ मा लक्षित व्यवसाय पुरा गर्ने देशभरकै शाखाहरुबाट दमक शाखा उत्कृष्ट पहिलो शाखाको रुपमा पुरस्कृत भएको छ ।

दमकस्थित कनकाइ पार्टी प्यालेसमा सम्पन्न अभिकर्ता सम्मान कार्यक्रमका प्रमुख अतिथिसमेत रहनुभएका नेशनल लाइफ इन्स्योरेन्स कम्पनीका उपकार्यकारी प्रमुख स्मृतीराज कडेलले दर्जनौ अभिकर्ताहरुलाई पुरस्कार वितरण गर्नुभएको थियाो ।

दमक शाखा कार्यालय प्रमुख तथा कम्पनीका बजार उपप्रवन्धक सुमन थुलुङ राईको अध्यक्षतामा कार्यक्रम सम्पन्न भएको हो । कार्यक्रममा राईले प्रमुख अतिथि, विशिष्ट अतिथिहरु, अतिथिहरु र कम्पनीमा कार्यरत सिनियर तथा जुनियर अभिकर्ताहरुलाई शब्दद्धारा स्वागत मन्तव्य राख्नुभएको थियो ।

उर्लाबारी शाखा कार्यालयबाट व्यवसाय गर्ने अभिकर्ताहरुलाई सम्मानपछि दमक शाखा कार्यालयबाट व्यवसाय गर्ने अभिकर्ताहरुलाई विभिन्न विद्यागत सम्मान तथा मायाको चीनो प्रदान गरिएको थियो ।

कार्यक्रमका प्रमुख अतिथि तथा कम्पनीका उपकार्यकारी प्रमुख स्मृतिराज कडेल, दमका शाखा प्रमुख तथा बजार उप–प्रवन्धक सुमन थुलुङ राई, उर्लाबारी शाखा प्रमुख मोहन कडेल, दमक शाखा कार्यालयका अभिकर्ता संघ अध्यक्ष नारायण भण्डारीले नेशनल लाइफ इन्स्योरेन्स कम्पनीले बीमा क्षेत्रमा पुर्र्याएको योगदानको चर्चा गर्नुभएको थियो ।

दमक, १ कार्तिक — तिहार नजिकिँदै गर्दा झापाको दमक लगायत देशभर झिलिमिली बत्तीको चटारो बढ्दै गएको छ। तर, यही विद्युतीय प्रकाशको चमकसँगै माटोका दियोहरू बिस्तारै हराउँदै गएका छन्।

विगतमा तिहारको मुख्य आकर्षण माटोका दियोहरू नै हुन्थे — जसले घर आँगन मात्र होइन, मौलिक संस्कृति र आत्मनिर्भर अर्थतन्त्रलाई पनि उज्यालो पार्थे। तर अहिले भने बजारमा झिलिमिली बत्तीहरूको अत्यधिक प्रयोगका कारण माटोका दियोहरू किन्ने ग्राहक नै हराउन थालेका छन्।

स्थानीय व्यवसायीहरूका अनुसार, पहिले तिहारको समयमा हजारौं दियो बिक्री हुन्थ्यो। अहिले भने थोरै मात्र माग हुने भएकाले उनीहरू बिस्तारै अन्य व्यवसायतर्फ लाग्न थालेका छन्। “पहिले भारतबाट पनि माटोका दियो ल्याउनुपर्थ्यो, अहिले त आफ्ना दियो पनि बिक्री हुँदैनन्,” दमकका एक व्यवसायीले दुखेसो पोखे।

दियोसँग जोडिएको धार्मिक र सांस्कृतिक मान्यता पनि हराउँदै गएको छ। पहिले तोरीको तेल वा घ्यू प्रयोग गरेर बनाइने दियो बाल्दा वातावरण शुद्ध हुने, नकारात्मक ऊर्जा हट्ने भन्ने विश्वास रहन्थ्यो। तर, अहिले ती परम्परा आधुनिकताका बीच हराउँदै गएका छन्।

विद्युतीय झिलिमिली बत्तीहरूले सजिलो र आकर्षक वातावरण बनाउने भए पनि यसले स्थानीय उत्पादनमा कमी ल्याएको छ। स्थानीय माटाका सामान बनाउनेहरू आत्मनिर्भर हुन नसक्ने अवस्थामा पुगेका छन्।

सांस्कृतिक विज्ञहरूका अनुसार, “झिलिमिली बत्तीले घर उज्यालो पार्छ, तर माटोको दियोले संस्कृति उज्यालो पार्थ्यो।” आधुनिकतासँगै मौलिकताका मूल्य बिर्सिँदै गएमा परम्परागत पहिचान नै संकटमा पर्ने चिन्ता उनीहरूको छ।

दमक, १ कार्तिक — तिहार नजिकिँदै गर्दा दमक नगरपालिकाभित्र फेरि पनि प्रतिबन्धित प्लास्टिकका फूलहरू बजारभरि देखिन थालेका छन्।

फूलको पर्व तिहार सुरु भएसँगै दमकका मुख्य चोक, गल्ली र ठेलाहरूमा छ्याप्छ्याप्ती रूपमा प्लास्टिकका माला र फूलहरू बिक्री भइरहेको देखिन्छ। सरकारले देशभर प्लास्टिकका फुलगुच्छा उत्पादन, आयात, बिक्री वितरण र भण्डारणमा पूर्ण प्रतिबन्ध लगाएको भए पनि स्थानीय बजारमा त्यसको खुलेआम उल्लंघन भइरहेको छ।

प्लास्टिकजन्य वस्तुले वातावरण र मानव स्वास्थ्यमा नकारात्मक असर पार्ने भन्दै सरकारले तथा स्थानीय तहहरूले बारम्बार सचेतना र प्रतिबन्धको नीति लागू गरे पनि दमक नगरपालिकाले अनुगमनमा खास ध्यान नदिएको देखिन्छ।

स्थानीय फुल व्यवसायीहरूले भने सस्तो र टिकाउ भएकै कारण बजारमा प्लास्टिकका फूलको माग बढेको बताएका छन्। तर यसले प्राकृतिक फूलहरूको व्यवसाय ओझेलमा पर्दै गएको छ।

तिहार र छठ जस्ता चाडपर्वमा प्लास्टिकजन्य फूल र माला बिक्री गरेमा एक लाख रुपैयाँसम्म जरिवाना हुने सरकारी चेतावनी जारी भए पनि बजारमा यसको कार्यान्वयन नदेखिँदा सरोकारवाला निकायप्रति प्रश्न उठ्न थालेको छ।

यस विषयमा स्थानीय प्रशासन र दमक नगरपालिकाले तत्काल प्रभावकारी अनुगमन र नियन्त्रण गर्नुपर्ने देखिन्छ।

असाेज ३०, दमक । पाँच दिनअघि देखि झापाको दमकबाट हराएका राजेन्द्र गुरुङ्गको खोजीका लागि सबैलाई सहयोग गर्न हेप्पी नेपाल दमकका अध्यक्ष कुमार गुरुङ्गले आग्रह गर्नु भएको छ ।

दमक १ स्थित हेप्पी नेपालकै कार्यालयमा आयोजित पत्रकार सम्मेलनमा संस्थाका स्वयसेवक राजेन्द्रको खोजी कार्यमा सबैले सहयोग गरिदिन आग्रह गर्नुभएको हो । विगत २-३ वर्षअघि देखि संस्थामा स्वंयसेवकको रुपमा कार्य गरी रहेका ५४ वर्षीय राजेन्द्र गत असोज २५ गते दिउसो हेप्पी नेपालबाट हराएको संस्थाका अध्यक्ष कुमार गुरुङ्गले बताउनु भयो ।

संस्थाकै सहकार्यमा राजेन्द्रको बहिनी मुनाले इलाका प्रहरी कार्यालय दमकमा हुलिया गरी सकेको हेप्पी नेपालले जनाएको छ । संस्था र राजेन्द्रको परिवारलबाट पनि झापा आसपास नातेदार साथी भाई सबैतिर खोजी गरी रहेको भए पनि अहिलेसम्म नभेटिएको अध्यक्ष कुमारले बताउनुभयो ।

शुरुमा अत्यधिक मादक पदार्थ प्रयोगकर्ता रहेका राजेन्द्रलाई हेप्पी नेपालको सुधार गृहमा राखेर कुलत त्यागेर सुध्रिएपछि सोही संस्थाको बफदार स्वयसेवक रहेर जिम्मेवारी पुरा गरी संस्थाका महासचिव सुरेन्द्र कुमार श्रेष्ठले जानकारी दिनुभयो ।

दमक – ५ जागृति टोल बस्ने राजेन्द्र गुरुङ एक्कासी कसैलाई थाहा नदिई दिउसो ३ बजे कार्यालयबाट हराएको बुझिएको छ । सोही पत्रकार सम्मेलनमा सहभागी राजेन्द्रकी बहिनी मुनाले पत्रकारहरुले राखेको प्रश्नको जवाफ दिदै अहिलेसम्म आफ्ना आफन्त नातागोता साथीभाई छरछिमेक सबैतिर खोजी गरी रहँदा हालसम्म नभेटिएको बताउनु भयो ।

कार्यालयमा सुरक्षागार्ड नराखेको र सोही समयमा सीसी क्यामेरा नचल्दा सोही समयमा मेरो दाजु हराउनुले केही शंका उब्जिएको राजेन्द्रको बहिनी मुना गुरुङ्गले गुनासो गर्नुभयो ।

सीसी क्यामेराको सन्दर्भमा हेप्पी नेपालका अध्यक्ष कुमारले जवाफ दिदै हेर्दा क्यामेरामा रेकर्ड भई रहेको तर त्यसमा लाग्ने ब्याट्री सकिएका कारण रेकर्ड नभएको पछि मात्र थाहा भएको बताउनु भयो । हेप्पी नेपालको सुरक्षागार्ड नेत्र भट्टराई रहेको जनाइएको छ । राजेन्द्र पनि २-३ वर्ष देखि स्वयंसेवकको काम गरिरहेको हुँदा उनको धेरै निगरानी नभएको संस्थाले जनाएको छ ।

गौरादह, ३० असोज–माछा मार्ने क्रममा डुबेर आज दिउँसो झापाको गौरादह–९ बैगुनधुरामा दुई दिदीवहिनीसहित तीन बालिकाको मृत्यु भएको छ ।

बैगुनधुरास्थित सिस्नेखोलामा माछा मार्ने क्रममा डुवेर स्थानीय अञ्जु मगरका दुई छोरी सात वर्षीया सुष्मा, नौ वर्षीया स्वीकृति र निर्मला परियारकी ११ वर्षीया छोरी रोश्नी परियारको मृत्यु भएको हो ।

उनीहरूको माछा मार्ने क्रममा खोला डुबेर मृत्यु भएको जिल्ला प्रहरी कार्यालयले जनाएको छ । प्रहरीले घटनास्थल पुगिसकेको र थप अनुसन्धान भइरहेको जनाएको छ ।