दमकमा मेसिनले हात काटिँदा एक जना कामदार घाइते

माघ १८, दमक / झापाको दमक नगरपालिका–४ स्थित चिया दोकान क्षेत्रमा रहेको न्यु पाथिभरा फर्निचर उद्योगमा काम गर्ने क्रममा एक जना कामदार गम्भीर घाइते भएका छन्।

मिति २०८२ साल १० महिना १७ गते बिहान करिब ०६:१५ बजे, मोरङको रतुवामाई नगरपालिका–४ निवासी वर्ष ४० का विर बहादुर ताजपुरिया काठ चिर्ने काम गरिरहेका बेला अचानक मेसिनले उनको बाँया हात काटिँदा (चुडिएको अवस्थामा) गम्भीर घाइते भएका हुन्।

घाइते ताजपुरियालाई तत्काल उपचारका लागि आम्दा अस्पताल दमक ल्याइएकोमा सामान्य उपचारपछि थप उपचारका लागि नोबेल अस्पताल विराटनगर रेफर गरिएको प्रहरीले जनाएको छ।

उक्त फर्निचर उद्योग दमक–४ निवासी युवराज बुढाथोकीले सञ्चालन गर्दै आएका छन्। घटनाबारे प्रहरी टोलीले थप अनुसन्धान गरिरहेको जनाएको छ।