दमक–९ मा करेन्ट सर्टका कारण भीषण आगलागी, करिब १ करोड ३० लाखको क्षति

पुस २५, दमक / झापाको दमक नगरपालिका–९ मा करेन्ट सर्टका कारण भीषण आगलागी भएको छ। दमक–९ निवासी पदम भण्डारीले सञ्चालन गर्दै आएको टिनको छानो र पक्की वालयुक्त स्वस्तिक थुप्पा फ्याक्ट्रीमा अचानक करेन्ट सर्ट भई आगलागी हुँदा फ्याक्ट्री पूर्ण रूपमा जलेर नष्ट भएको हो।
आगलागीले फ्याक्ट्रीसँगै जोडिएको भण्डारीकै तीनतले पक्की घरमा समेत आगो सल्किँदा घरभित्र रहेका सम्पूर्ण सरसामान जलेर नष्ट भएका छन्। घटनापछि दमक नगरपालिका, उर्लाबारी नगरपालिका, गौरादह नगरपालिका, पथरी शनिश्चरे नगरपालिका, शिवसताक्षी नगरपालिका तथा कमल गाउँपालिकाबाट आएको दमकल, स्थानीय बासिन्दा र इलाका प्रहरी कार्यालय दमकबाट खटिएको प्रहरी टोलीको संयुक्त प्रयासमा आगो निभाउने कार्य गरिएको थियो।
प्रहरीका अनुसार बिहान करिब ११:२५ बजे आगो पूर्ण रूपमा नियन्त्रणमा आएको थियोे । आगलागीबाट कुनै पनि मानवीय वा चौपाया क्षति नभएको जनाइएको छ।आगलागीका कारण फ्याक्ट्रीका सम्पूर्ण उपकरण तथा कच्चा पदार्थ र घरभित्रका सबै सरसामान जलेर नष्ट हुँदा अन्दाजी १ करोड ३० लाख रुपैयाँ बराबरको धनमाल क्षति भएको प्रारम्भिक अनुमान गरिएको छ। घटनाबारे थप अनुसन्धान भइरहेको प्रहरीले जनाएको छ।