फागुन १५, कमल / झापा जिल्लाको कमल गाउँपालिका–४ स्थित फोनिक्स इङ्गलिस स्कुल ले आज विविध कार्यक्रमका साथ आफ्नो वार्षिकोत्सव तथा अभिभावक दिवस भव्य रूपमा सम्पन्न गरेको छ। विद्यालय प्राङ्गणमा आयोजित कार्यक्रमको उद्घाटन कमल गाउँपालिका शिक्षा, युवा तथा खेलकुद शाखाका प्रमुख सूर्यप्रसाद न्यौपानेले गर्नुभएको थियो।
उद्घाटन मन्तव्यका क्रममा उहाँले विद्यालयले किताबीय ज्ञानसँगै व्यवहारिक सीपमा जोड दिएकाले विद्यार्थीहरूको समग्र विकासमा टेवा पुग्ने विश्वास व्यक्त गर्नुभयो। अतिरिक्त क्रियाकलापले विद्यार्थीको सिकाइ प्रक्रियामा सकारात्मक प्रभाव पार्ने उल्लेख गर्दै उहाँले यस्ता कार्यक्रमले स्थानीय संस्कार–संस्कृति तथा लोपोन्मुख सामग्रीबारे जानकारी दिलाउन महत्त्वपूर्ण भूमिका खेल्ने बताउनुभयो।
कार्यक्रममा विद्यार्थीहरूले विभिन्न संस्कार–संस्कृति झल्किने गीत, नृत्य तथा सांस्कृतिक प्रस्तुति प्रस्तुत गरेका थिए। “पढ्दै कमाउँदै” कार्यक्रमअन्तर्गत विद्युतिय सामग्री, हस्तकला, बाँसको चोयाबाट निर्मित डोको, डाकर, मुडा, साथै आर्टिटेक अन्तर्गत सपिङ महल र पुलका मोडेललगायत विद्यार्थीहरूले तयार पारेका विभिन्न सामग्रीको प्रदर्शनी गरिएको थियो। प्रदर्शनी अवलोकनका क्रममा अभिभावकहरूले विद्यार्थीहरूको सिर्जनात्मक क्षमता र व्यवहारिक सीपको प्रशंसा गरेका थिए।
विद्यालयका फाउण्डर प्रिन्सिपल बदिराम राईले विद्यालयले किताबी ज्ञान मात्र नभई प्रत्येक हप्ता विद्यार्थीको रुचिअनुसार व्यवहारिक शिक्षा प्रदान गर्दै आएको बताउनुभयो। उहाँका अनुसार यसले विद्यार्थीलाई आफ्नो संस्कार–संस्कृतिबारे जान्न, साथै दैनिक जीवनमा आवश्यक पर्ने सामग्री आफैं निर्माण गर्न सक्ने आत्मनिर्भर शिक्षा प्रदान गरिरहेको छ।
कार्यक्रममा वडा नं. ४ का अध्यक्ष चन्द्रप्रसाद भट्टराई, वडा सदस्य नवीन राई, नेपाल निजी तथा आवासीय विद्यालय संगठन (PABSON) कोशी प्रदेश सचिव गौरिमान फागो, पाब्सन कमल अध्यक्ष दीपक संग्रौला, सचिव त्रिलोचन गौतम, जिल्ला सदस्य युवराज बराल, सल्लाहकार विजयसेन थापा, केर्खा बजार व्यवस्थापन समितिका अध्यक्ष देवीप्रसाद दाहाल लगायतको उपस्थिति रहेको थियो। कार्यक्रम विद्यालयका शिक्षक भिमप्रसाद राईले सञ्चालन गर्नुभएको थियो। कार्यक्रममा पूर्व विद्यार्थीहरू जितेन साम्पङ राई , अश्विन राणा मगर , रोजित राई लगायतको उपस्थिति रहेको थियो ।
Leave a Reply