दमक, झापा — दमक–२ स्थित मानव सेवा आश्रमलाई जन्मदिनको विशेष अवसरमा दमक–१ निवासी रिया अधिकारीले करिब ८ हजार रुपैयाँ बराबरको हिटर हस्तान्तरण गरेकी छन्। पहिलो पाइला नेपाल दमक शाखामार्फत गरिएको यो सहयोगले जन्मदिनमा हुने अनावश्यक खर्चलाई निरुत्साहित गर्दै सामाजिक सेवामा लागिपर्ने उद्देश्य रहेको अधिकारीले बताइन्।
सहयोग हस्तान्तरण कार्यक्रममा पहिलो पाइला नेपाल दमक शाखाका अध्यक्ष राजु निरौला, केन्द्रीय सह–कोशाध्यक्ष दिवस खतिवडा, आश्रमकी उपाध्यक्ष बिना थापा, सञ्चालक सुमन श्रेष्ठ तथा रिया अधिकारीका श्रीमान् सुदीप पौडेल उपस्थित थिए।
सडकमा बसोबास गर्दै आएका २८ जना मानवहरूलाई संरक्षण दिइरहेको आश्रममा हिटर सहयोगले विशेष लाभ पुग्ने आश्रमका सञ्चालक सुमन श्रेष्ठले बताए। उनले रिया अधिकारीलाई धन्यवाद दिँदै जन्मदिनलाई सामाजिक सेवासँग जोडेर मनाउने कार्य अनुकरणीय रहेको पनि उल्लेख गरे।
जन्मदिनलाई अर्कै किसिमले अर्थपूर्ण बनाउँदै रिया अधिकारीले आश्रममा सेवा गर्न पाएकोमा खुशी व्यक्त गरिन्। कार्यक्रम सन्चालन संस्था अध्यक्ष राजु निरौलाले गरेका थिए।
Leave a Reply