दमक-सुजन गाैतम/ झापाको दमक नगरपालिका अन्तर्गत पर्ने वडा नम्बर ७, एक प्रगतिशील र व्यवस्थित वडाको रुपमा चिनिँदै गएको छ। कुल १.२३ वर्ग किलोमिटर क्षेत्रफलमा फैलिएको यस वडामा १८०१ घरधुरीका ७३८७ जनसंख्या (जनगणना २०७८ अनुसार) बसोबास गर्छन्।

महेन्द्र राजमार्गदेखि उत्तर, रतुवा खोलासम्म पश्चिम, नेपाल टेलिकम क्षेत्रसम्म दक्षिण र बसपार्क–नगरपालिका रोडबाट पूर्वसम्म फैलिएको यो वडा स्थानीय शासन प्रणाली अन्तर्गत २०७३ साल फागुन २७ गतेदेखि सक्रिय रहेको हो। हाल वडाको नेतृत्व भीमप्रसाद पौडेलको अध्यक्षतामा रहेको छ।

वडामा इन्दु खड्का (पौडेल), अतित वान्तवा राई, तारा रणपलहेली र मानबहादुर खवास सदस्यका रूपमा सक्रिय छन्। सचिव योगेश भट्टराई, सोसल मोबिलाइजर सरिता राई, तथा कार्यालय सहयोगी र सरसफाइ कर्मीहरूको सक्रियताले सेवा प्रवाह प्रभावकारी बनेको छ।

यस वडाको एक प्रमुख आर्थिक इन्जिनको रूपमा रहेको पशु हाटबजार हरेक बुधबार सञ्चालन हुँदै आएको छ। रतुवा खोलानजिकको उत्तरी हाटखोला क्षेत्रमा मौलिक स्वादका परिकारहरूले वडाको पहिचान झल्काएका छन्।

शिक्षा क्षेत्रमा वडाले प्राथमिकता दिँदै आएको छ। यहाँ चारवटा प्रमुख शैक्षिक संस्था—श्री पृथ्वी मावि, सिद्धार्थ इंग्लिस बोर्डिङ, ईस्टर्न स्टार बोर्डिङ र हलेसी लिटल एञ्जल्स स्कुल सञ्चालनमा छन्। हजारौं विद्यार्थीले शिक्षाको पहुँच पाएका छन्।

स्वास्थ्य सेवामा पनि दमक–७ अग्रपंक्तिमा रहेको छ। किओच दमक बाल अस्पताल बालस्वास्थ्यमा उत्कृष्ट सेवा दिँदै आएको छ भने ओम मेची अस्पताल महिलासम्बन्धी गुणस्तरीय स्वास्थ्यसेवामा समर्पित छ। रेडक्रस सोसाइटीको ब्लड बैंक तथा सर्पदंश उपचार सेवा वडाबासीका लागि सहयोगी सिद्ध भएको छ।

वडाले बिपद् व्यवस्थापनमा समेत उदाहरणीय काम गरेको छ। रतुवा खोलामा तटबन्ध निर्माण गरी बाढीको जोखिम न्यूनीकरण गर्नुका साथै सौन्दर्यीकरण, वाकिङ ट्र्याक र ८० फिटको सडक निर्माणमार्फत जीवनस्तर सुधारमा योगदान दिइएको छ।सुकुम्बासी परिवारहरूलाई नमुना बस्तीमा पुनर्वास गरिँदा सामाजिक समावेशिता सुनिश्चित गरिएको वडा अध्यक्ष पौडेल बताउँछन्।

सामाजिक सुरक्षामा केन्द्रित रहँदै वडा कार्यालयले ‘सेफ हाउस’ निर्माण गरी वृद्धवृद्धा, अशक्त र गरिब नागरिकका लागि सुरक्षित आश्रयको व्यवस्था गरेको छ।

यस वडामा २७ वटा टोल विकास संस्था सक्रिय छन्। ती संस्थाहरूले स्वास्थ्य, शिक्षा, बालमैत्री समाज निर्माणमा कार्य गर्दै आइरहेका छन्। यही अभियान अन्तर्गत वडा छिट्टै नै ‘बालमैत्री वडा’ घोषणाको अन्तिम तयारीमा रहेको जानकारी प्राप्त भएको छ।

वडाले चालु आर्थिक वर्षमा मात्र भौतिक पूर्वाधारका क्षेत्रमा उल्लेखनीय प्रगति गरेको छ। ढल, कल्भर्ट, रेलिङसहितको सिँढी र टायल बाटो निर्माणका कामहरू सम्पन्न भएका छन्।

सामाजिक र आर्थिक विकासमा समेत वडा सक्रिय रहँदै आएको छ। विभिन्न तालिम, उद्यमशीलता प्रवर्द्धन कार्यक्रम तथा सार्वजनिक सेवामा पहुँच वृद्धिका कार्यक्रम सञ्चालन हुँदै आएका छन्।

दमक वडा नम्बर ७ आज सामाजिक, आर्थिक र भौतिक विकासको समुचित संयोजनसहित समृद्धिको यात्रामा अघि बढिरहेको नमुना वडाको रूपमा स्थापित हुँदैछ।