दमक / झापाको दमक नगरपालिका वडा नम्बर ७ मा मुस्लिम समुदायका विद्यार्थीहरूलाई लक्षित गरी स्टेशनरी तथा खेलकुद सामग्री वितरण गरिएको छ।
दमक–७ स्थित राधा माधव टोलको मदरसा शहबाजिया स्कुलमा अध्ययनरत मुस्लिम समुदायका विद्यार्थीहरूलाई प्रभु बैंकको सामाजिक उत्तरदायित्व कार्यक्रमअन्तर्गत सामग्री हस्तान्तरण गरिएको हो।कार्यक्रम वडा नं. ७ को समन्वयमा सम्पन्न भएको हो।
विद्यालयमा अध्ययनरत ६८ जना विद्यार्थीहरूलाई शैक्षिक सामग्री तथा खेलकुदका सामान प्रदान गरिएको प्रभु बैंकका दमक शाखा प्रमुख रोशन संग्रौलाले जानकारी दिनुभयो।उहाँका अनुसार आर्थिक रूपमा कमजोर तथा शैक्षिक रूपमा पछाडि रहेका मुस्लिम समुदायका बालबालिकालाई सशक्त बनाउने उद्देश्यले करीब २० हजार रुपैयाँ बराबरको सामग्री वितरण गरिएको हो।
कार्यक्रममा दमक नगरपालिका वडा नम्बर ७ का वडा सचिव योगेश भट्टराई, वडा सदस्य अतित बान्तवा राई, दमक यातायात व्यवस्थापन शाखाका व्यवस्थापक भूवन दाहाल, प्रभु बैंकका कर्मचारी कमल भट्टराई, अमृत बिष्ट लगायतको उपस्थिति रहेको थियो।
स्थानीय समुदायले यस्ता सहयोगले विद्यार्थीहरूलाई हौसला मिल्ने र उनीहरूको पठनपाठनमा सकारात्मक प्रभाव पर्ने विश्वास व्यक्त गरेका छन्।
