भदौ ७, दमक / झापाको दमकमा माङ्जाबुङ दमक सेवा समाजको वार्षिक साधारण सभा तथा तीज विशेष कार्यक्रम सम्पन्न भएको छ। शनिबार दमक–१ स्थित डी टाउन होटलमा एक कार्यक्रमका बीच वार्षिक उत्सव मनाइएको हो।

पाँचथर जिल्लाबाट दमक आएर बसोबास गर्नेहरूले स्थापना गरेको यस समाजले एक वर्षे गतिविधि समीक्षा गर्दै साधारण सभा सम्पन्न गरेको हो। कार्यक्रममा संस्थाका कोषाध्यक्ष लोकबहादुर बस्नेतले वार्षिक प्रतिवेदन प्रस्तुत गर्नुभएको थियो। समाजले पाँचथरबाट आएका व्यक्तिहरूलाई विभिन्न कठिनाइमा सहयोग गर्दै आएको र संस्थाको पात्रोमा विज्ञापन दिने सहयोगी दाताहरूलाई सम्मान गरिएको अध्यक्ष कुमार बस्नेतले जानकारी दिनुभयो।

कार्यक्रममा प्रमुख अतिथि रूपमा संघीय मामिला तथा आर्थिक मामिला प्रदेश सांसद इन्द्रबहादुर आङ्बो (मौसम)उपस्थित रहनुभएको थियो भने विशिष्ट अतिथि दमक नगरपालिका वरिष्ठ प्रमुख प्रशासकीय अधिकृत यज्ञराज निरौला हुनुहुन्थ्यो। कार्यक्रममा बोल्दै सांसद आङ्बोले पूर्वाधारको विकासले ग्रामीण बसोबासको स्वरूप परिवर्तन भइरहेको र पहाडी जिल्लाहरू क्रमशः उजाड हुँदै गएकोमा चिन्ता व्यक्त गर्नुभयो। उहाँले नेपालको अर्थतन्त्र ग्रामीण अर्थतन्त्रमा आधारित रहेको उल्लेख गर्नुभयो।

कार्यक्रममा राप्रपा दमक–७ का वडाध्यक्ष विक्रम सुब्बा खानदेन, श्री सिद्ध सरस्वती माध्यमिक विद्यालयका पूर्व प्रधानाध्यापक नीलकण्ठ सापकोटा, युना एण्ड युनिस्टेड सप्लायर्सका सञ्चालक हरि तिवारी, संस्थाका आर्थिक संयोजक सुभाष चन्द्र गर्तौला लगायतको उपस्थिति थियो।

सहसचिव मानबहादुर खड्काको सञ्चालनमा भएको उक्त कार्यक्रम समाजका अध्यक्ष कुमार बस्नेतको अध्यक्षतामा सम्पन्न भएको थियोे ।