पोखरा – डाइनामिक पब्लिक लाइब्रेरी (DPL) नेपाल अन्तर्गत DPL गण्डकी प्रदेश, DPL पोखरा र लायन्स क्लब इन्टरनेशनल डिस्ट्रिक्ट ३२५ के नेपाल अन्तर्गतका लायन्स क्लब अफ पोखरा युनिटी चौतारी र लायन्स क्लब अफ पोखरा डाइनामिकको संयुक्त आयोजनामा तथा इस्कोन पोखराको सहयोगमा ‘द आर्ट अफ माइन्ड कन्ट्रोल– मानसिक स्वास्थ्य र आध्यात्मिक उपचार’ सम्बन्धी कार्यक्रम सम्पन्न भएको छ।

शनिबार पोखरा–५ मालेपाटनस्थित वडा सदन भवनमा आयोजित उक्त कार्यक्रम DPL पोखराकी अध्यक्ष मनिका गिरीको सभापतित्वमा सम्पन्न भएको हो। कार्यक्रममा सशस्त्र प्रहरी बल कालिका गणका गणपति श्री तिमिल्सिनाले प्रमुख अतिथिको रूपमा मन्तव्य राख्नुभएको थियो।

कार्यक्रममा जनप्रतिनिधि, विभिन्न आमा समूह, टोल विकास समिति अध्यक्षहरू, नेपाल रेडक्रस सोसाइटी लगायत विभिन्न संघसंस्थाबाट प्रतिनिधित्व गर्दै करिब १५० जनाको सक्रिय सहभागिता रहेको थियो। मानसिक स्वास्थ्य र आध्यात्मिक सन्तुलनका लागि चेतना अभिवृद्धि गर्ने उद्देश्यका साथ कार्यक्रम आयोजना गरिएको हो।

कार्यक्रमका बारेमा जानकारी दिंदै DPL नेपाल पोखरा गण्डकीका असाइन उपाध्यक्ष आयुष बटाजुले आउँदो शनिबार बुटवलमा DPL Butwal को आयोजनामा भव्य साहित्यिक साँझ कार्यक्रम गरिने जानकारी समेत दिनुभएको छ।