दमक, साउन १६ – दमक नगरपालिकाले केही दिनअघि गरेको अनुगमनका क्रममा पूर्वी नेपाल डेरीमा ढुसी लागेको खुवा भेटिएको थियो, जसलाई तत्काल नष्ट गरिएको थियो। उक्त घटनालाई लिएर विभिन्न सञ्चारमाध्यममा समाचार प्रकाशन तथा प्रसारण भइरहेका छन्। तर डेरी सञ्चालकले ती समाचारहरू वास्तविकता विपरीत रहेको बताएका छन्।
पूर्वी नेपाल डेरी उद्योगका सञ्चालक हेमचन्द्र खनालले आज दमकमा पत्रकार सम्मेलन गर्दै अनुगमनमा भेटिएको खुवा बजारमा बिक्रीका लागि नभएको स्पष्ट पारे। उनका अनुसार उक्त खुवा बुटवलस्थित अमुल डेरी एण्ड बेभरेज नेपाल प्रालि सँगको समझदारी अनुसार उत्पादन गरिएको हो।
२०८१ फागुन १३ गते पूर्वी नेपाल कृषि तथा दुग्ध विकास केन्द्र प्रालि (प्रथम पक्ष) र अमुल डेरी एण्ड बेभरेज नेपाल प्रालि (दोस्रो पक्ष) बीच आपसी सहकार्यको सम्झौता भएको थियो। उक्त सम्झौता अनुसार पूर्वी नेपाल डेरीले खुवा र पनिर उत्पादन गर्ने, भने अमुल कम्पनीले आइसक्रिम र अन्य डेरी सामग्री उत्पादन गरी आपसमा वितरण गर्ने सहमति थियो।
सञ्चालक खनालका अनुसार सम्झौता भएअनुसार उत्पादन गरिए पनि अमुल कम्पनीले समयमा खुवा नउठाएपछि भण्डारणमा समस्या उत्पन्न भएको हो। तर ती खुवा दमकका पसलमा कहिल्यै बिक्री नगरिएको स्पष्ट पारिएको छ।
हाल उद्योगमा दही, मोही, छुर्पी लगायतका डेरी वस्तुहरू नियमित रूपमा उत्पादन भइरहेका छन्। साथै, उद्योगले अमुल कम्पनीसँगको सम्झौता रद्द गरिसकेको र हाललाई खुवा तथा खुवाजन्य उत्पादन स्थगित गरिएको जानकारी दिएको छ।
