दमक, साउन १६ – अपाङ्गता भएका व्यक्ति तथा उनीहरूका परिवारलाई स्वरोजगारसँग जोड्ने उद्देश्यले झापाको दमकमा ‘बाटेको मच्छडधुप’ उत्पादन, संकलन तथा बजारीकरणका लागि बिक्री केन्द्र स्थापना गरिएको छ।
दमक नगरपालिका र पाथिभरा हेल्थ एण्ड वेलनेस फाउण्डेशनको सहकार्यमा २ महिनासम्म आवश्यक सीप विकास प्रशिक्षणपश्चात्, दमक अपाङ्ग सहयोग समितिको संयोजनमा दमक–४ ताराबारीस्थित प्रस्तावित एकीकृत अपाङ्ग पुर्नस्थापना केन्द्रमा शुक्रबार बिक्री केन्द्रको उद्घाटन गरिएको हो।
उद्घाटन कार्यक्रममा दमक नगरपालिका प्रमुख रामकुमार थापा, उपप्रमुख रेगिना भट्टराई प्रशाई, कार्यपालिका सदस्य शारदा भट्टराई, फाउण्डेशन अध्यक्ष विष्णुप्रसाद पोखरेल लगायतको उपस्थिति थियो।
कार्यक्रममा नगर प्रमुख थापाले यस्तो कार्य नगरको लागि उदाहरणीय रहेको उल्लेख गर्दै नियमित उत्पादन र बजारीकरणमा नगरपालिकाले आवश्यक सहयोग गर्ने प्रतिबद्धता व्यक्त गरे। “नगरपालिकाले बिक्रीका लागि निशुल्क सटर प्रदान गर्नेछ र यो उत्पादनलाई आफ्ना कार्यक्रमहरूमा उपहारका रूपमा प्रयोग गरिनेछ,” उनले भने।
दमक उपप्रमुख रेगिना भट्टराई प्रशाईले अपाङ्गता भएका तथा आश्रित परिवारको मेहनत र उत्पादनप्रति खुसी व्यक्त गर्दै नगरपालिकाको निरन्तर साथ रहने बताइन्। “यो नगरको ब्राण्ड हो, सबैले मिलेर यसलाई अघि बढाउनु पर्छ,” उनले आग्रह गरिन्।
प्रादेशिक आयुर्वेद अस्पताल लखनपुरका निर्देशक डा. सिद्धार्थ ठाकुरले प्राकृतिक जडिबुटी प्रयोग गरेर निर्मित यो धुप मानव स्वास्थ्यमा हानिकारक नरहेको बताए। “डेंगुजस्ता रोगबाट बच्न यो उपयोगी छ र यसको निर्यात सम्भावना पनि प्रशस्त छ,” उनले भने।
फाउण्डेशन अध्यक्ष विष्णुप्रसाद पोखरेलले अपाङ्गता भएका व्यक्तिहरूलाई स्वरोजगारमा जोड्न निरन्तर काम गरिरहेको बताउँदै, “यो उत्पादनलाई नेपालकै एक नयाँ ब्राण्डको रूपमा अगाडि बढाउने हाम्रो लक्ष्य हो,” भने। साथै उनले दिब्यदृष्टि भेनेरेसन एण्ड एग्रो कन्सर्नमार्फत बजारीकरणमा सहयोग गरिने जानकारी गराए।
कार्यक्रम सञ्चालन दमक नगरपालिका सामाजिक शाखा प्रमुख केशव प्रशाईले गरेका थिए। कार्यक्रममा कार्यपालिका सदस्य एवं सामाजिक विकास समिति संयोजक शारदा भट्टराई, दमक अपाङ्ग सहयोग समितिकी निमित्त अध्यक्ष मनमाया तिम्सिनालगायतले पनि आ–आफ्ना धारणा राखेका थिए।
