दमक, साउन १७ — झापाको दमक नगरपालिका वडा नम्बर १० मा अवस्थित इन्द्रेणी तालमा हरेक हप्ता सरसफाइ अभियान जारी रहेको छ। स्थानीय युवा रोहित राईको संयोजन र इन्द्रेणी ताल संरक्षण समितिका अध्यक्ष अम्बिका खनालको नेतृत्वमा सुरु गरिएको अभियानमा दमक तथा आसपास क्षेत्रका नागरिकहरूको उल्लेख्य सहभागिता रहेको छ।

उर्लाबारीबाट डम्बर राई, अभियन्ता बिजय आङबुहाङ, पत्रकार विजय धिमाल र तेजन खड्कासहितका व्यक्तिहरू समेत सक्रिय रूपमा अभियानमा सहभागी भई ताल वरपरको झारपात, प्लास्टिकजन्य फोहोर हटाउने काममा जुटिरहेका छन्। सरसफाइ अभियानले ताललाई सफा, स्वच्छ र पर्यटकीय दृष्टिले आकर्षक बनाउन मद्दत पुर्‍याएको सहभागीहरूको भनाइ छ।

समितिका अध्यक्ष अम्बिका खनालले इन्द्रेणी ताललाई “प्रकृतिको देन र समुदायको गौरव” भन्दै यसको संरक्षण र विकासका लागि हरेक शनिबार नियमित रूपमा अभियान जारी राख्ने बताएका छन्। संयोजक रोहित राईले ताल क्षेत्रको सौन्दर्य थप बढाउन नाउ सञ्चालनको तयारी भइरहेको जानकारी दिए।

“सफा ताल, हरियाली वातावरण र जलयात्राको अनुभव दिने उद्देश्यले अब हामी तालमा नाउ सञ्चालन गर्न लागेका छौं,” राईले भने। स्थानीय नेतृत्व, युवाहरूको सक्रियता र सामुदायिक समर्थनले इन्द्रेणी ताललाई पर्यटकीय गन्तव्यको रूपमा स्थापित गर्न बल पुग्दै गएको अभियानकर्ताहरूको विश्वास छ।