दमक, साउन १९ – झापाको दमक नगरपालिका वडा नं ५ स्थित धनेश्वर महादेव मन्दिरको प्राङ्गणमा श्रावण महिनाको तेस्रो सोमबार विशेष प्रसाद वितरण कार्यक्रम सम्पन्न भएको छ। पहिलो पाइला नेपाल दमक शाखाको अगुवाइमा रोटरी क्लब अफ दमक, लायन्स क्लब अफ दमक, DPL लगायतका संघसंस्थाहरूको संयुक्त आयोजनामा तथा इलाका प्रहरी कार्यालय दमकको सहकार्यमा मन्दिरमा जल चढाउन आएका भक्तजनहरूलाई फलफुल र पानीसहित प्रसाद वितरण गरिएको हो।

उक्त कार्यक्रममा अमेरिका निवासी सामाजिक अभियन्ता धनञ्जय भट्टराईको विशेष सहयोग रहेको थियो। भट्टराईले अमेरिकाबाट सहयोग गर्दै पहिलो पाइला नेपाल दमक शाखामार्फत धनेश्वर मन्दिरमा प्रसाद वितरण गराएका हुन्। कार्यक्रममा पहिलो पाइला नेपाल दमक शाखाका अध्यक्ष राजु निरौलाले आगामी सोमबार पशुपति मन्दिरमा समेत प्रसाद वितरण गरिने जानकारी दिनुभयो। उहाँले साउन महिनाको प्रत्येक सोमबार दमक र आसपासका मन्दिरहरूमा प्रसाद वितरण गर्दै आइरहेको बताउनुभयो।

कार्यक्रममा संस्थाका उपाध्यक्ष नवराज खड्का, सचिव सन्जु निरौला, केन्द्रीय सदस्य मेघनाथ फुएल, क्लब हिमालयन टाइगरका अध्यक्ष रेवतराज भण्डारी, युना एन युनिस ट्रेन्ड सप्लायर्सका सञ्चालक हरि तिवारी, दमक उद्योग वाणिज्य संघका वरिष्ठ उपाध्यक्ष राजु खड्का, दमक होटल व्यवसायी संघका सचिव भूपेन्द्र निरौला, देबु गडतौला, पूजा दाहाल, सन्जिब रिमाल, बिमल बराल, जुनु रेग्मी, सन्जु शिवाकोटी लगायतको उपस्थिति रहेको थियो। अमेरिकामा रहेर पनि नेपालका धार्मिक, सामाजिक कार्यमा निरन्तर सहयोग गर्दै आउनुभएका भट्टराईको योगदानप्रति सहभागीहरूले धन्यवाद व्यक्त गरेका थिए।