साउन २५ , ताप्लेजुङ / शनिबारदेखि सुरु भएको अन्तर्राष्ट्रिय आमन्त्रण तेस्रो ताप्लेजुङ गोल्डकप फुटबल प्रतियोगिताको उद्घाटन कार्यक्रममा सिक्किमको प्रसिद्ध सांस्कृतिक सम्पदा सिंघी नृत्य पहिलोपटक ताप्लेजुङमा प्रस्तुत गरियो। आयोजक लाखे जात्रा सञ्चालक समितिले छिमेकी राष्ट्र भारतको सिक्किमबाट विशेष रूपमा कलाकारहरू ल्याएर यो नृत्य देखाएको हो।
सिंघी नृत्य हिम चित्तेको प्रतीकात्मक रुपसँग सम्बन्धित सिक्किमको मौलिक नृत्य हो, जसले हिमाल, प्रकृति र संरक्षणको सन्देश दिन्छ। विशेष पोशाक र मुखौटा लगाएर प्रस्तुत गरिएको यस नृत्यले उद्घाटन समारोहमा उपस्थित दर्शकलाई मन्त्रमुग्ध बनायो।
उद्घाटनमा सिंघी नृत्यसँगै च्याब्रुङ, लाखे, चण्डी, तामाङ सेलो लगायतका सांस्कृतिक नृत्यहरू पनि प्रस्तुत गरिए। तर, पहिलोपटक ताप्लेजुङमा प्रस्तुत सिंघी नृत्य उद्घाटन समारोहको मुख्य आकर्षण बन्यो।
यससँगै उद्घाटन खेलमा द योङ ब्रदर्स क्लब इटहरीले आयोजक टोली तेल्लोक स्पोर्टिङ क्लबलाई २–१ गोलअन्तरले पराजित गर्दै विजयी सुरुवात गरेको छ। खेलमा सुरुवाती अग्रता लिएको आयोजक टोलीले थप गोल गर्न नसकेपछि हार बेहोर्नु परेको हो।
यस वर्षको प्रतियोगितामा विजेताले सात लाख दुई हजार ८२ रुपैयाँ नगदसहित ट्रफी, पदक र प्रमाणपत्र पाउनेछ भने उपविजेताले तीन लाख ५० हजार ८२ रुपैयाँ पाउनेछ। सर्वोत्कृष्ट खेलाडीलाई १५० सिसीको यामाहा मोटरसाइकल पुरस्कार स्वरूप प्रदान गरिनेछ। प्रतियोगितामा भारतको सिलगुढीस्थित लेजण्ड फुटबल एकेडेमीसहित आठ टोली सहभागी छन्।
