भदौ ६, दमक / पठन संस्कृतिको प्रवद्र्धन र सेवाग्राहीलाई पठनमार्फत मानसिक सान्त्वना दिने उद्देश्यले दमक–५ स्थित ओम शान्ति डेन्टल हस्पिटलमा मिनि लाइब्रेरी स्थापना गरिएको छ।
डिपीएल कमलको पहलमा स्थापना गरिएको उक्त लाइब्रेरीमा लायन्स क्लब अफ गोल्डले पुस्तक प्रदान गरी सहयोग गरेको हो। कार्यक्रममा स्वागत मन्तव्य डिपीएल नेपालका उपाध्यक्ष कमल गैरेले गरेका थिए भने डिपीएल नेपालका अध्यक्ष अनु भण्डारी प्रमुख अतिथि रहनुभएको थियो।
संविधानसभा सदस्य दीपक कार्कीले प्रमुख वक्ताको रूपमा मन्तव्य व्यक्त गर्नुभयो। उहाँले पठन–पाठनको संस्कृति हराउँदै गएको वर्तमान अवस्थामा यस्ता प्रयासहरूले सकारात्मक प्रभाव पार्ने विश्वास व्यक्त गर्नुभयो।
डिपीएल नेपालका संस्थापक अध्यक्ष भेसराज न्यौपानेले सामाजिक सञ्जालको अत्यधिक प्रयोगका कारण पुस्तकमुखी संस्कृति ओझेलमा परेको बताउँदै मिनि लाइब्रेरीले पठन संस्कृतिलाई पुनः जीवन्त बनाउन मद्दत पुर्याउने धारणा व्यक्त गर्नुभयो।
ओम शान्ति डेन्टल हस्पिटलकी डा. मल्लिका श्रेष्ठले बिरामीहरूको उपचारमा केही समय लाग्ने भएकाले प्रतीक्षा गर्ने समयमा पुस्तक पढ्न पाउने सुविधा निकै उपयोगी हुने बताउनुभयो। साथै, लायन्स क्लब अफ गोल्डका अध्यक्ष डा. हेमराज गैरेले बुक कर्नरमा राखिएका पुस्तकहरू एक महिना पछि नयाँ पुस्तकसँग परिवर्तन गरिने जानकारी दिनुभयो।
कार्यक्रमको अध्यक्षता डिपीएल कमलका कार्यवाहक अध्यक्ष शम्भु निरौलाले गर्नुभएको थियो भने सञ्चालन वरिष्ठ उपाध्यक्ष दिवस खतिवडाले गर्नुभएको थियो। कार्यक्रममा डिपीएल गौरादहका अध्यक्ष ध्रुव गिरी, लायन्स क्लब अफ गोल्डका कोषाध्यक्ष डा. राजेश श्रेष्ठ, सदस्य डा. टङ्क न्यौपाने, डा. स्मारक दाहाल, रिजन चेयर नवीन ताम्राकार लगायतको उपस्थिति थियो।
