भदौ ६, दमक / उर्लाबारी–९ र दमक–१० सेतुमारि जोड्ने मावा पुलमा हाल धमाधम मर्मत कार्य भइरहेको छ। संरचनालाई बलियो बनाउन ढुङ्गा, ग्याबियन बक्स र माटो प्रयोग गरेर मजबुतीकरणको काम भइरहेको कारण पुलमा सवारीसाधन तथा पैदल यात्रु दुवैको आवतजावत पूर्ण रूपमा रोकिएको हो।

पुल बन्द भएपछि स्कुले बालबालिका, बिरामी बोकेका एम्बुलेन्सदेखि सर्वसाधारणसम्मले वैकल्पिक बाटो प्रयोग गर्नुपर्ने बाध्यता आएको छ। स्थानीय टंक थक्लुङले भने, “अब गुणस्तरीय रूपमा काम सम्पन्न हुनुपर्छ, नत्र फेरि केही वर्षमै समस्या दोहोरिन सक्छ।”

करिब ४ करोड ४० लाखको लागतमा २०७१ सालमा बनेको मावा पुल संरक्षणको अभावमा जीर्ण बनेको थियो। लामो समयदेखि जोखिमपूर्ण रूपमा प्रयोग हुँदै आएको पुलमा अहिले भइरहेको मर्मतले स्थानीयवासीलाई दीर्घकालीन समाधानको आशा दिएको छ।