भदौ १८, कमल / कमल गाउँपालिका–५ मा रहेको स्मारिका सामुदायिक बोर्डिङ स्कूलमा बुधबार एकदिने नि:शुल्क स्वास्थ्य जाँच शिविर सम्पन्न भएको छ। विद्यालयको आयोजनामा एन्जल फाउन्डेशनको प्राविधिक सहयोगमा सम्पन्न शिविरमा पाईल्स, फिस्टुला, फिसर, मलद्वार दुख्ने, पोल्ने, चिलाउने, कब्जियत, मासु पलाउने, मलद्वारबाट रगत आउने लगायतका समस्या सम्बन्धी उपचार तथा ल्याब सेवा उपलब्ध गराइएको थियो।

स्मारिका सामुदायिक बोर्डिङ स्कूलका फाउन्डर प्रिन्सिपल गुणराज गिरीका अनुसार विद्यालयले विद्यार्थी र अभिभावकलाई लक्षित गर्दै स्वास्थ्यसँगै शिक्षामा पनि चासो देखाउँदै यस्ता कार्यक्रम सञ्चालन गर्दै आएको छ। शिविर प्रमुख प्रकाश राजवंशीले देशको कुल जनसंख्याको झण्डै दुई करोड मानिसमा गुप्त रोगसम्बन्धी समस्या देखिने भएकाले एन्जल फाउन्डेशनले विद्यालय, सहकारी तथा लघुवित्त संस्थामा यस्ता स्वास्थ्य कार्यक्रम सञ्चालन गर्दै आएको जानकारी दिनुभयो।

कार्यक्रममा सहभागी अभिभावक युवराज कार्की र वृन्दाप्रसाद आचार्यले टाढा नगइ विद्यालयमै सहज रूपमा स्वास्थ्य सेवा पाएकोमा खुसी व्यक्त गर्नुभयो।यस शिविरमा करिब ३५ जना अभिभावक तथा विद्यार्थीले स्वास्थ्य सेवा लिएका थिए। साथै, उपचारका लागि एन्जल फाउन्डेशनले ५० प्रतिशत छुटको व्यवस्था गरेको थियो।सन् २०६६ सालमा स्थापना भएको स्मारिका सामुदायिक बोर्डिङ स्कूलमा हाल ९०० विद्यार्थी अध्ययनरत छन्।