भदौ १६, दमक / जन्मदिनलाई मात्र रमाइलो र फजुल खर्चमा सीमित गर्ने परम्परालाई तोड्दै पहिलो पाइला नेपाल दमक शाखाका उपाध्यक्ष लबराज खडकाले आफ्नो जन्मदिनलाई समाजसेवामुखी बनाएका छन्।

खडकाले यस वर्षको जन्मदिनमा दमक–२ स्थित मानव उदार सेवा आश्रममा आश्रित विपन्न मानवलाई खाद्यान्न सामग्री वितरण गरेर खुसी बाँडेका हुन्। उनको यस पहलले आश्रममा बस्नेहरूलाई सानो भए पनि ठूलो सहयोग पुगेको आश्रम परिवारले जनाएको छ।

सहयोग हस्तान्तरण कार्यक्रममा बोल्दै खडकाले भने, “जन्मदिनमा हुने अनावश्यक खर्चलाई नियन्त्रण गर्दै समाजका आवश्यकता भएका व्यक्तिलाई सहयोग गर्नु नै सबैभन्दा अर्थपूर्ण कार्य हो। यसले आत्मसन्तुष्टि मात्र होइन, अरूलाई पनि समाजसेवातर्फ प्रेरित गर्छ। खडकाको सामाजिक उत्तरदायित्वपूर्ण यो कदमले स्थानीयस्तरमा सकारात्मक सन्देश दिएको छ। स्थानीयवासीहरूका अनुसार, यस्तो पहलले अरूलाई पनि आफ्ना खुसीका क्षणहरू समाजको हितमा प्रयोग गर्न उत्प्रेरित गर्नेछ।

सहयोग हस्तान्तरण कार्यक्रममा पहिलो पाइला नेपाल दमकका सल्लाहकार गणेश प्रधान, केन्द्रीय सदस्य मेघनाथ फुयाल, दिवस खतिवडा, क्लब हिमालयन टाइगरका केन्द्रीय अध्यक्ष रेवत चन्द्र भण्डारीलगायतको उपस्थितिमा सम्पन्न भएको थियो। कार्यक्रमको अध्यक्षता पहिलो पाइला नेपाल दमक शाखा अध्यक्ष राजु निरौलाले गरेका थिए।