भदौ २२, दमक / झापाको दमक नगरपालिका वडा नम्बर ७ मा रहेको ज्वाई–जेठान हस्तकला उद्योगले वाद्ययन्त्र उत्पादनमार्फत स्थानीय स्तरमै रोजगारी सिर्जना गर्दै अन्तर्राष्ट्रिय बजारमा समेत पहुँच बढाएको छ।

वि.सं २०७५ सालदेखि निरन्तर सञ्चालनमा रहेको ज्वाई–जेठान हस्तकला उद्योगले ढ्याङ्ग्रो, डम्फु, मादल, डमरु लगायतका वाद्यवदनका सामग्रीहरू निर्माण गर्दै आएको छ। विशेष गरी बौद्ध धर्मावलम्बी तथा लामाहरूले प्रयोग गर्ने यी सामग्रीको माग नेपालभरि मात्र नभई भुटान, चीन र भारतमा समेत भइरहेको छ।

“हामीले स्थानीय स्रोतसाधन प्रयोग गरेर हस्तनिर्मित वाद्यवदनका सामग्री उत्पादन गर्दै आएका छौँ। अहिले यो उत्पादित सामग्री देशभित्रका बौद्धिस्ट क्षेत्र मात्र नभई छिमेकी मुलुकमा पनि निर्यात हुँदै आएको छ।”उद्योगबाट उत्पादन भएका सामग्रीहरू दमक–८ स्थित युना एन्ड युनाइटेड सप्लायर्समार्फत पनि बिक्री वितरण भइरहेको सञ्चालक हरि तिवारीले जानकारी दिनुभयो।

स्थानीय स्तरमै उत्पादन भएको वाद्ययन्त्र अन्तर्राष्ट्रिय बजारमा पुगेसँगै यसले नेपालको सांस्कृतिक सम्पदा र परम्परागत कला प्रवर्द्धनमा टेवा पुगेको छ।सांस्कृतिक सम्पदा जोगाउँदै, स्थानीयलाई रोजगारी दिँदै अन्तर्राष्ट्रिय बजारमा समेत विस्तार भएको दमकको ज्वाई–जेठान हस्तकला उद्योगले उदाहरणीय काम गरेको छ।