भदौ १८, दमक / झापाको दमकस्थित शिखा बचत तथा ऋण सहकारी संस्थाको १४औं वार्षिक साधारण सभा बिहीबार सम्पन्न भएको छ। दमक–६ स्थित पशुपति मन्दिरको सभाहालमा सम्पन्न कार्यक्रममा प्रमुख अतिथि झापा जिल्ला सहकारी सङ्घका अध्यक्ष प्रेमकुमार कोइराला रहनुभएको थियो।

विशिष्ट अतिथिमा जिल्ला सहकारी सङ्घका सञ्चालक सदस्य तथा फागुनन्द सहकारी संस्थाका अध्यक्ष पदम लिम्बु, सूर्यमुखी बचत तथा ऋण सहकारी संस्थाका अध्यक्ष चुडामणि ओझा, दमक–६ का वडाध्यक्ष टेकबहादुर थापा लगायतको उपस्थिति रहेको थियो।

कार्यक्रममा संस्थाका अध्यक्ष तेजकुमार श्रेष्ठले वार्षिक प्रतिवेदन प्रस्तुत गर्दै सहकारी क्षेत्रलाई तीन खम्बे अर्थनीतिको आधार स्तम्भको रूपमा सरकारले स्वीकार गरिसकेको बताउनुभयो। उहाँका अनुसार सहकारीमार्फत बचत परिचालन, लगानी अभिवृद्धि तथा ग्रामीण विकासमा संयोजनकारी भूमिका निर्वाह गर्ने लक्ष्यसहित सहकारीलाई सुदृढीकरण गर्ने नीति लिइएको छ।

लेखा समितिको प्रतिवेदन प्रस्तुत गर्दै संयोजक विवेक मैनालीले आर्थिक वर्ष २०८१/८२ मा संस्थाको कुल खर्च ३ करोड ८२ लाख २४ हजार ६ सय ५१ रुपैयाँ ६८ पैसा, कुल आम्दानी ४ करोड ४ लाख ५५ हजार ४ सय २९ रुपैयाँ ३० पैसा र खुद नाफा १२ लाख १५ हजार ५ सय ६८ रुपैयाँ ५१ पैसा रहेको जानकारी दिनुभयो। यसै वर्षमा संस्थाको सेयर पुँजी ३ करोड ८ लाख ६६ हजार ५ सय रुपैयाँ पुगेको पनि बताइयो।

सभामा उत्कृष्ट कारोबारकर्ता ६८ जना, जेष्ठ सदस्य बचतकर्ता २८ जना तथा उत्कृष्ट बाल बचतकर्ता ४५ जना गरी जम्मा १४१ जनालाई दोसल्ला, प्रमाणपत्र, ब्याग र नगदसहित सम्मान गरिएको थियो।कार्यक्रम सचिव तीर्थराज चाम्लिङ राईको सञ्चालनमा अध्यक्ष तेजकुमार श्रेष्ठको अध्यक्षतामा सम्पन्न भएको हो।