भदौ १७, दमक / प्याब्सन दमक नगर समितिद्वारा आयोजित पालिका स्तरीय अतिरिक्त क्रियाकलाप प्रतियोगिताको पुरस्कार वितरण कार्यक्रम सोमबार सम्पन्न भएको छ।
दमक–८ स्थित अर्गानिक कृषि भण्डारको सभा हलमा भएको कार्यक्रममा सभाध्यक्षता प्याब्सन दमकका उपाध्यक्ष मित्र खत्रीले गर्नुभयो। कार्यक्रममा प्रमुख अतिथि प्याब्सन केन्द्रीय सदस्य श्रवणकुमार पोखरेल, विशिष्ट अतिथि एल.डी. राईसहित पदाधिकारी र विभिन्न विद्यालयका प्रधानाध्यापकहरूको उपस्थिति थियो।
यसअघि शनिबार दमक–२ स्थित सनराईज मोडल स्कुलमा सम्पन्न प्रतियोगितामा नगरका ३४ विद्यालयका करिब ८१६ विद्यार्थीले १२ विधामा प्रतिस्पर्धा गरेका थिए। सोमबार सम्पन्न कार्यक्रममा विजयी विद्यार्थीहरूलाई प्रमाणपत्र तथा पुरस्कार प्रदान गरिएको थियो।
कार्यक्रमको सञ्चालन प्याब्सन दमकका सचिव लक्ष्मी नेपालले गर्नुभएको थियो। अतिथिहरूले यस्ता गतिविधिले विद्यार्थीको प्रतिभा प्रकट गर्न, सहशैक्षिक क्षमता वृद्धि गर्न र विद्यालयबीच स्वस्थ प्रतिस्पर्धा बढाउन टेवा पुग्ने बताएका छन् ।
