भदौ १९, दमक / मेची महाकाली बुहारी संयुक्त आवाजले आफ्नो छैठौं स्थापना दिवस विशेष सामाजिक कार्यक्रमसहित मनाएको छ। झापाको दमक–९ स्थित दिपज्योति उराउटोलमा आयोजित कार्यक्रममा २० विपन्न परिवारलाई खाद्यान्नसहित लत्ताकपडा वितरण गरिएको हो।
कार्यक्रममा प्रमुख अतिथि दमक–९ का वडा अध्यक्ष कुबेर प्रसाद भट्टराईले महिलाहरु पुरुष सरह सामाजिक जिम्मेवारी पूरा गर्न सक्षम रहेको उदाहरण प्रस्तुत भएको भन्दै संस्थाको कार्यप्रति प्रशंसा गर्नुभयो। उहाँले समाज सुधार र सहयोगका कार्यमा महिलाहरु सक्रिय रूपमा लाग्नु सकारात्मक कदम भएको टिप्पणी गर्नुभयो।
केन्द्रीय अध्यक्ष चन्द्रकला काफ्लेले संस्थाले कुनै बाह्य आर्थिक सहयोग नलिइ सदस्यहरुको सानो–सानो योगदानबाटै सामाजिक कार्य गर्दै आएको जानकारी दिनुभयो। घरभित्र मात्रै सीमित हुने परम्परालाई तोड्दै समाजमा योगदान गर्ने अवसर प्रदान गर्न संस्था क्रियाशील रहेको उहाँको भनाइ थियो।
कार्यक्रममा प्रति परिवार एक बोरा चामल, एक बोरा भुजा र एउटा साडी वितरण गरिएको थियो। कार्यक्रम संस्थाको झापा जिल्ला अध्यक्ष गंगा भट्टराई, दमक उपशाखा अध्यक्ष एलिसा ओली लगायत पदाधिकारी र सदस्यहरुको उपस्थितिमा सम्पन्न भएको हो।
देशभर ५६ शाखा सञ्चालनमा रहेको मेची महाकाली बुहारी संयुक्त आवाजले स्थापना कालदेखि नै थुप्रै सामाजिक गतिविधि गर्दै आएको छ। कार्यक्रम सञ्चालन दमक उपशाखा सचिव सुमन भुर्तेलले गर्नुभएको थियो।
