भदौ १९, कमल / कमल गाउँपालिका–२ मा कुष्ठरोग खोजपड्ताल घरदैलो कार्यक्रम सम्पन्न भएको छ । स्थानीय बासिन्दामाझ पुगेर कुष्ठरोगका लक्षण, कारण, सरुवा हुने तरिका र उपचारबारे जनचेतना अभिवृद्धि गर्ने उद्देश्यले गरिएको अभियानमा शंका लागेका व्यक्तिहरूको प्रारम्भिक स्वास्थ्य परीक्षण समेत गरिएको थियो ।

कार्यक्रम कमल नगर अस्पतालका प्रमुख दिपक प्रसाद दहालको नेतृत्वमा अहेव पुर्ण कुमार ताजपुरिया, अहेव पन्जिका थापा मगर “रुजु”, कमल अपाङ्गता समितिका पदाधिकारी, महिला स्वास्थ्य स्वयंसेविका र टोल विकास समितिका प्रतिनिधिहरूको सक्रियतामा सञ्चालन गरिएको हो । अभियान भाद्र १७ गते थापा टोल र नवोदय टोलबाट सुरु भई समयगढ, प्रगती, ज्योति टोल, हलफल टोल, सेतुमारी, भुत्लुङ्ग र देविचौन टोलसम्म पुगेको थियो ।

यसअघि वडा सदस्य कल्पना राई, NLF अफिसर डी.बी. गुरुङलगायत सरोकारवालाको उपस्थितिमा अभिमुखीकरण कार्यक्रम सम्पन्न गरिएको थियो । कार्यक्रममा वडा अध्यक्ष अशोक सुब्बाले यस्ता अभियानले कुष्ठरोगप्रति फैलिएको भ्रम, त्रास र विभेद अन्त्य गर्न महत्वपूर्ण भूमिका खेल्ने विश्वास व्यक्त गरे ।

कार्यक्रम सफल बनाउन नेपाल कुष्ठरोग सङ्गति (NLF) झापाको सक्रियता उल्लेखनीय रह्यो । NLF ले प्रविधिक मार्गदर्शन, जनचेतनामूलक सामग्री र तालिम प्राप्त जनशक्ति उपलब्ध गराएको थियो । कमल गाउँपालिका अध्यक्ष हुकुम सिह राईले NLF को सहकार्यप्रति आभार प्रकट गर्दै “यस्ता अभियानले कुष्ठरोग नियन्त्रण र उन्मूलनतर्फ ठोस योगदान पुर्‍याउनेछन्,” भने ।

घरदैलो अभियानमार्फत कुष्ठरोगका कारण, लक्षण, उपचार र सामाजिक विभेद अन्त्य गर्ने उपायबारे जानकारी गराइनुका साथै शंका लागेका व्यक्तिहरूको प्रारम्भिक स्वास्थ्य परीक्षण गरिएको थियो । सहभागीहरूले यस्ता कार्यक्रमले दीर्घकालीन रूपमा स्वस्थ, सचेत र विभेद–मुक्त समाज निर्माणमा योगदान पुर्‍याउने अपेक्षा व्यक्त गरेका छन् ।