भदौ २०, दमक / लायन्स क्लब अफ दमक माउन्ट एभरेस्ट र लियो क्लब अफ दमक माउन्ट एभरेस्टको संयुक्त आयोजनामा शुक्रबार बिहानदेखि दमकको नमुना मार्गमा विशेष सरसफाई तथा फोहोर व्यवस्थापन अभियान सुरु गरिएको छ।‘हाम्रो ठाउँ हामी आफै बनाउ, सफा दमक सुन्दर दमक’ नारासहित सुरु गरिएको यो अभियानलाई निरन्तरता दिँदै हरेक शुक्रबार बिहान सरसफाई कार्यक्रम संचालन गरिने क्लबले जनाएको छ।
कार्यक्रममा लायन्स क्लबका पूर्व अध्यक्षज्यूहरूको विशेष उपस्थिति रह्यो। कार्यक्रममा। कार्यक्रममा बोल्दै क्लबका पूर्व अध्यक्ष लायन भगवान बस्नेतले समुदायमा जागरण फैलाउन यस्ता अभियानले ठूलो योगदान पुर्याउने विश्वास व्यक्त गर्नुभयो । हालका अध्यक्ष लायन प्रकाश शाहले सरसफाई केवल बाहिरी सौन्दर्यका लागि नभई जीवनशैली र संस्कृतिसँग सम्बन्धित कुरा भएको भन्दै अभियानलाई निरन्तरता दिन सबैलाई आग्रह गर्नुभयो।
यस अभियानलाई स्थानिय बासिन्दा, युवाहरु र सामाजिक संघ–संस्थाले समेत सक्रिय साथ दिनुपर्ने क्लबले जनाएको छ । युवाको उत्साह, स्थानीयको सक्रियता र सबैको एकताबद्ध प्रयासले दमकको नमूना मार्ग थप आकर्षक र सफा बन्ने अपेक्षा समेत गरिएको छ। दमकको नमूना मार्ग केवल यात्रुहरूलाई सुविधा दिने सडक मात्र होइन, यो शहरको सौन्दर्य र पहिचानसँग जोडिएको ठाउँ हो। दैनिक सयौं मानिस ओहोर–दोहोर गर्ने यो बाटो सफा हुँदा शहरको छाप नै फरक देखिन्छ।नियमित सरसफाईले केवल सडक सफा राख्ने मात्र होइन, धुलो प्रदूषण कम गर्ने, संक्रमण फैलन नदिने र सार्वजनिक स्वास्थ्यलाई मजबुत बनाउन पनि ठूलो योगदान पुर्याउछ।
क्लबका पदाधिकारीका अनुसार यो अभियानलाई दीगो बनाउन प्रत्येक शुक्रबार बिहानलाई “सफा शुक्रबार” घोषणा गर्दै निरन्तरता दिइनेछ। साथै, आगामी दिनमा विद्यालयका विद्यार्थी, सामाजिक संस्था र अन्य क्लबहरूसँग सहकार्य गरी अझ ठूलो अभियान सञ्चालन गर्ने तयारी गरिएको छ। नमुना मार्गमा आज सुरु भएको यो अभियान केवल एक दिनको काम होइन, यो निरन्तरता पाउने प्रतिबद्धता हो। यसरी निरन्तरता पाइरह्यो भने केही महिनामै दमक प्रदेश नं. १ मात्र हैन, देशकै सफा र सुन्दर शहरको रूपमा चिनिने विश्वास गरिएको छ।
