असाेज ७, दमक – युवा तथा विद्यार्थीहरूको आत्मरक्षा र शारीरिक सुदृढता अभिवृद्धि गर्ने उद्देश्यले स्थापना भएको दमक तेक्वान्दो दोजाङले आफ्नो पहिलो वार्षिकोत्सव सोमबार एक विशेष कार्यक्रमका बीच सम्पन्न गरेको छ।
कार्यक्रममा दोजाङलाई यहाँसम्म ल्याउन सहयोग गर्ने व्यक्तिहरू, सदस्यहरू र सल्लाहकारहरूको उपस्थितिमा केक काटेर खुशी प्रकट गरिएको थियो। सोही अवसरमा प्रशिक्षकहरूलाई उत्साहवर्द्धन स्वरूप प्रमाणपत्र र जर्सी प्रदान गरिएको थियो भने उत्कृष्ट खेलाडीलाई नगद पुरस्कार तथा खदा दोजाङका सल्लाहकार एवं पूर्व खेलाडी गजु देवानले प्रदान गर्नुभएको थियो।
दोजाङका अध्यक्ष जितु धिमालका अनुसार, स्थापना भएदेखि नै दोजाङले उल्लेखनीय उपलब्धिहरू हासिल गरेको छ। झापा जिल्ला स्तरीय तेक्वान्दो खेलमा दोस्रो स्थान प्राप्त गर्न सफल भएको र नेपाल तेक्वान्दो एशोसियसनले भदौ १५ देखि १७ गतेसम्म आयोजना गरेको प्रतियोगितामा पुम्से विधातर्फ पनि जित हात पारेको उनले जानकारी दिनुभयो।
अध्यक्ष धिमालले आगामी दिनमा दोजाङलाई अझ व्यवस्थित र सक्षम बनाउँदै राष्ट्रिय तथा अन्तर्राष्ट्रिय प्रतियोगितामा पनि उत्कृष्ट प्रदर्शन गर्ने लक्ष्य रहेको बताउनुभयो।