असाेज २७, चितवन / चितवनका बिबेक तिमल्सिना सामाजिक सेवामा जीवन समर्पण गर्ने ती युवामध्ये एक हुन्, जसले सेवा र मानवियता लाई शब्दमा होइन, कर्ममा उतार्दै आएका छन्।
कहिले उनी वृद्धाश्रम पुगेर अवेलामा एक्लिएका आमाबुबालाई माया र सम्मानले अँगालो हालिरहेका हुन्छन्, त कहिले दुबईमा दलालले फसाएका नेपाली कामदारहरूलाई खोज्दै आवास, कानुनी सहायता र आवश्यक परे नेपाल फर्काउने काममा व्यस्त रहन्छन्।
परदेशमा अलपत्र परेका नेपालीहरूको उद्धार र सहयोगमा सक्रिय तिमल्सिनाको भनाइ छ — “परदेशमा अलपत्र परेका ती नेपालीहरू मेरा लागि अपरिचित होइनन्, उनीहरू नै मेरा दाजुभाइ, दिदीबहिनी हुन्।”
मानवियताको यो गहिरो भावना नै तिमल्सिनाको प्रेरणाको स्रोत बनेको छ। कुनै पद, पुरस्कार वा प्रचारको अपेक्षा बिना निरन्तर सेवामा समर्पित उनी आज हजारौं बिथोलिएका नेपालीहरूको आशा, आवाज र भरोसा बनेका छन्।
उनको यो सामाजिक प्रतिबद्धता र निस्वार्थ सेवाभावले बिबेक तिमल्सिनालाई चितवनको सीमाभन्दा टाढा, देश–देशान्तरमा समेत परिचित नाम बनाइदिएको छ।