तोपगाछी (झापा), असोज २८ / कमल गाउँपालिका–०२ तोपगाछीस्थित कमल नगर अस्पतालमा अत्याधुनिक डेन्टल चेयर सहितको आधुनिक दन्त स्वास्थ्य सेवा सुरु गरिएको छ। अब गाउँकै अस्पतालमा दाँतसम्बन्धी समस्या भएका बिरामीहरूले सहज र गुणस्तरीय उपचार सेवा पाउने भएका छन्।
स्वास्थ्य सेवा विस्तारका क्रममा कमल गाउँपालिका अध्यक्ष हुकुमसिंह राईको निरन्तर पहलमा, स्वास्थ्य सेवा विभागमार्फत निवर्तमान स्वास्थ्य तथा जनसंख्या मन्त्री प्रदीप पौडेलबाट प्राप्त डेन्टल चेयर र कम्प्रेसर मंगलबार अस्पतालमा जडान गरिएको हो।
अध्यक्ष राईले जडान कार्यको स्थलगत अनुगमन गर्दै अस्पतालमा थप गुणस्तरीय र प्रभावकारी स्वास्थ्य सेवा विस्तारमा जोड दिनुभएको छ। उहाँले अस्पतालका स्वास्थ्यकर्मी र महिला स्वास्थ्य स्वयंसेविकासँग छलफल गर्दै “स्वास्थ्य सेवा भावनासहित दिनु नै हाम्रो पहिलो दायित्व हो,” भन्दै प्रशंसा र निर्देशन दुवै गर्नुभयो।
यसअघि हरेक आइतबार र बिहीबार सञ्चालन हुँदै आएको दन्त सेवा अब अत्याधुनिक उपकरणसहित अझ सुदृढ र सहज बनेको छ। सो सेवा सञ्चालनमा दमक हस्पिटल एण्ड रिसर्च सेन्टर, दमकका दन्त विशेषज्ञहरूको प्राविधिक सहयोग रहनेछ।
डा. सिपी गैरे, डा. हेमराज गैरे र डा. सायरा ढकाल नेतृत्वको टोलीले हरेक आइतबार र बिहीबार कमल नगर अस्पतालमै दन्त जाँच, उपचार तथा परामर्श सेवा प्रदान गर्नेछन्। साथै, स्वास्थ्य बीमा अन्तर्गत दन्त उपचार सेवा समेत उपलब्ध गराइने अस्पतालले जनाएको छ।
कमल–०२ का वडा अध्यक्ष तथा अस्पताल सञ्चालन तथा व्यवस्थापन समिति सदस्य अशोक सुब्बाले नयाँ सेवा सुरु भएपछि स्थानीयस्तरमै दन्त उपचार सहज र प्रभावकारी बनेको बताउनुभयो।
स्थानीय बासिन्दाहरूले भने, “अब दाँत उपचारका लागि टाढा दमक वा बिर्तामोड धाउन नपर्ने भयो,” भन्दै सेवाको सुरुवातप्रति खुशी व्यक्त गरेका छन्।
