कार्तिक ९ , विराटनगर। कोशी प्रदेशका मुख्यमन्त्री हिक्मत कुमार कार्कीले हिमाली र पहाडी जिल्लाका सम्पूर्ण माध्यमिक विद्यालयहरूमा आवश्यक पूर्वाधार र सूचना प्रविधि (आइसिटी) निर्माण गर्ने घोषणा गर्नुभएको छ।
शनिबार धनकुटाको सहिद भूमि गाउँपालिकामा आयोजित कार्यक्रममा मुख्यमन्त्री कार्कीले खेतान फाउन्डेसनको सहयोगमा १० वर्षभित्र पूरा गर्ने गरी विद्यालय पूर्वाधार सुधार कार्यक्रम अघि बढाइने बताउनुभयो।
उहाँले खेतान फाउन्डेसनले सहिद भूमि गाउँपालिका–६ मा निर्माण गरेको ठाकुरदेवी माध्यमिक विद्यालयको नयाँ भवन उद्घाटन गर्दै उक्त घोषणा गर्नुभएको हो। ९२ लाख रुपैयाँ लागतमा निर्माण भएको आठ कोठे भवन सीपी फाउन्डेसनले निर्माण गरेको हो।
मुख्यमन्त्री कार्कीले विद्यालय निर्माणको पहल आफूले आफ्नो निर्वाचन क्षेत्रमा नगरी शहीदहरूको सम्मान र सहिद भूमि क्षेत्रको विकासका लागि यहाँबाट सुरुवात गरिएको बताउनुभयो।
फाउन्डेसनका संस्थापक सीपी खेतानका अनुसार आगामी १० वर्षभित्र करिब १५ अर्ब रुपैयाँको लगानीमा कोशी प्रदेशका हिमाली तीन र पहाडी आठ जिल्लाका करिब ५०० विद्यालयहरूमा आधुनिक पूर्वाधार र आइसिटी प्रणाली निर्माण गरिनेछ।
यसका लागि कोशी प्रदेश सरकार, स्थानीय पालिका र खेतान फाउन्डेसनबीच सहकार्य हुने जनाइएको छ। कानुनी प्रक्रिया पूरा भएपछि सम्झौता औपचारिक रूपमा हुने र कार्यक्रम सुरु हुने तयारी गरिएको छ।
कार्यक्रममा सहिद भूमि गाउँपालिका र सीपी फाउन्डेसनबीच पालिकालाई “नमुना पालिका” बनाउने समझदारी पत्रमा हस्ताक्षर पनि गरिएको छ। यस अन्तर्गत करिब २ देखि ३ अर्ब रुपैयाँ लगानी गरी विद्यालय, स्वास्थ्य चौकी, सडक कालोपत्रे तथा लघु उद्यमशीलता प्रवर्द्धनका काम हुने जनाइएको छ।
सो अवसरमा ह्युमन प्राक्टिस फोरमले पनि मुख्य सहयोगीको रूपमा ३ अर्ब रुपैयाँको लगानी गर्न सहमति जनाएको छ।
कार्यक्रममा मुख्यमन्त्री कार्की, सीपी खेतान, विदेशी दातृ संस्थाका प्रतिनिधिहरू, सहिद भूमि गाउँपालिकाका अध्यक्ष मनोज राई लगायतको उपस्थिति रहेको थियो।
अध्यक्ष राईले यो सम्झौताले धनकुटाको सहिद भूमि पालिकालाई नमुना विकास पालिकाका रूपमा स्थापित गर्ने विश्वास व्यक्त गर्नुभयो। स्थानीयवासीहरूले पनि यो पहलले २०३६ सालको खोकु–छिन्ताङ हत्याकाण्डपछि पछाडि परेको क्षेत्रको विकासमा नयाँ युग सुरु हुने अपेक्षा व्यक्त गरेका छन्।
