गौरादह, मङ्सिर १२ / बैगुन्धुरा–९, खजुरबारि स्थित लेखनाथ आधारभूत विद्यालयमा अध्ययनरत बिपन्न वर्गका ८० जना विद्यार्थीलाई शैक्षिक, खेलकुद तथा खाजाको सामाग्री वितरण गरिएको छ। पहिलो पाइला नेपाल दमक शाखाले आज एक कार्यक्रमका बीच उक्त सामग्री हस्तान्तरण गरेको हो।

विद्यालय व्यवस्थापन समितिका अध्यक्ष लिलमबहादुर निरौलाको अध्यक्षतामा सम्पन्न कार्यक्रममा गौरादह नगरपालिका–९ का वडासदस्य केदार धिताल प्रमुख अतिथि रहनु भएको थियो। कार्यक्रमलाई सम्बोधन गर्दै उहाँले बिपन्न वर्गका विद्यार्थी अध्ययनरत विद्यालयमा पहिलो पाइलाले देखाएको सहयोगप्रति प्रशंसा गर्दै आगामी दिनमा पनि निरन्तर साथको अपेक्षा व्यक्त गर्नुभयो।

कार्यक्रममा पहिलो पाइला नेपाल दमक शाखाका अध्यक्ष राजु निरौला, केन्द्रीय सदस्य मेघनाथ फुयाल, सल्लाहकार छवि घिमिरे, उपाध्यक्ष लबराज खड्का, सदस्य देबु गर्तौला, पुजा दाहाल, सोनु चौधरी, जुनु रेग्मी, रक्षा पाण्डे, निशा अधिकारी, शुस्मा कार्की लगायतको उपस्थिति रहेको थियो। विद्यालयका प्रधानाध्यापक अर्जुन पौडेलले स्वागत मन्तव्य राख्दै सहयोगले विद्यार्थीको उत्साह वृद्धि भएको बताउनुभयो। साथै उपाध्यक्ष लबराज खड्का र केन्द्रीय सदस्य मेघनाथ फुयालले संस्थाको क्रियाकलापबारे प्रकाश पार्नुभयो।

कार्यक्रममा ३०० कपी, पेन्सिल, दिवाकालिन खाजा, एक थान फुटबल र केही पुस्तक हस्तान्तरण गरिएको सदस्य पुजा दाहालले जानकारी दिनुभयो।यस कार्यक्रमको सौजन्य दमक–५ स्थित मनदिप मोबाइल तथा हनुमान पाउरोटी उद्योगले गरेको बताइएको छ।