पुष २३, दमक / खयरबारी युवा क्लबको पहलमा “खयरबारी युवा क्लबको पहिचान–मुक्तिघाट बनाउने हाम्रो अभियान” भन्ने उद्देश्यसहित मुक्तिघाट तथा बहुउद्देश्यीय भवन निर्माण कार्य सुरु गरिएको छ। २०८२ साल मङ्सिर ९ गते शिलान्यास गरिएको उक्त भवन निर्माणका लागि रत्नकुमारी खनालले जग्गादान गर्नुभएको हो। भवन निर्माणको अनुमानित लागत ३० लाख रुपैयाँ रहेको क्लबले जनाएको छ।
क्लबका अनुसार लागत जुटाउन बडा दशैंमा चिठा कार्यक्रम, शुभ दीपावलीमा देउसी–भैलो, तथा तेस्रो चरणमा देश–विदेशमा रहनुभएका सहयोगीहरूलाई आह्वान गरी रकम सङ्कलन गरिएको हो। हालसम्म १० लाख रुपैयाँ सङ्कलन भइसकेको र सहयोग रकम आउने क्रम जारी रहेको अध्यक्ष राम शाही ठकुरीले जानकारी दिनुभयो। तत्कालका लागि दुईतले मल्टीपर्पोज भवन निर्माण गरिनेछ। भवनको माथिल्लो तलामा फलैचा तथा खाजा खाने व्यवस्था, र तल्लो तलामा ट्वाइलेट, बाथरूम तथा इस्टर रुम रहने योजना रहेको छ। निर्माण कार्य आउँदो वैशाखसम्म सम्पन्न गर्ने लक्ष्य राखिएको छ।
क्लबले सहयोगी दाताहरूलाई प्रोत्साहनस्वरूप सम्मानको व्यवस्था पनि गरेको छ। रु. १ देखि ४,९९९ सम्म सहयोग गर्ने दातालाई उद्घाटन सत्रमा सम्मान, रु. ५,००० देखि ९,९९९ सम्म सहयोग गर्ने दातालाई कदरपत्रसहित सम्मान, रु. १०,००० वा सोभन्दा माथि सहयोग गर्ने दातालाई शिलालेखमा नाम उल्लेख गरी कदरपत्रसहित सम्मान गरिने जनाइएको छ।
अध्यक्ष ठकुरीका अनुसार यस अभियानमा स्थानीय सरकारबाट हालसम्म कुनै आर्थिक सहयोग प्राप्त नभएको र समुदाय तथा शुभेच्छुकहरूको सहयोगमै निर्माण अघि बढाइएको छ। क्लबले मुक्तिघाट निर्माणलाई सामाजिक उत्तरदायित्वको महत्वपूर्ण परियोजनाका रूपमा लिँदै सबै सहयोगी हातहरूलाई साथ दिन पुनः आह्वान गरेको छ।
