माघ ३, झापा / कमल गाउँपालिका–५ स्थित सितापुरी उत्तरमा रहेको किराँत समुदायको ऐतिहासिक साकेला थानमा प्रतीकात्मक सुप्तुलुङ, माङ्पा सामा र बुम्छुत का छुट्टाछुट्टै प्रतिमा अनावरण गरिएको छ।
कमल गाउँपालिका अध्यक्ष हुकुमसिंह राईले औपचारिक कार्यक्रमका बीच ती प्रतिमाहरूको अनावरण गरेका हुन्। अनावरणसँगै उक्त प्रतिमाहरू किराँत राई यायोक्खा झापा जिल्ला समितिलाई हस्तान्तरणसमेत गरिएको छ।
किराँत राई यायोक्खा कमल गाउँ समितिको पहलमा स्वदेश तथा विदेशमा रहेका किराँतसम्बद्ध सहयोगदाताहरूको आर्थिक सहयोगबाट प्रतिमाहरू निर्माण गरिएको हो। कार्यक्रमका अवसरमा यायोक्खा कमलतर्फबाट प्रतिमा निर्माण समिति संयोजक भिमराज राईले यायोक्खा झापाका अध्यक्ष गणेश राईलाई सम्पदा हस्तान्तरण गरे। अध्यक्ष राईले संरचनाहरूको संरक्षण, आवश्यक रेखदेख तथा सदुपयोग गर्ने प्रतिबद्धता व्यक्त गरे।
यायोक्खा कमल गाउँ समिति सदस्य भिमराज राईका अनुसार प्रतिमा निर्माणका लागि ८ लाख ६४ हजार रुपैयाँ खर्च भएको छ। साथै उनले निर्माण प्रक्रियामा भएको आम्दानी तथा खर्चको विवरणसमेत सार्वजनिक गरेका थिए।
कार्यक्रमका प्रमुख अतिथि अध्यक्ष हुकुमसिंह राईले साकेला थानको रक्षा र किराँत सम्पदाको संरक्षणका लागि सबै किराँत धर्मावलम्बीहरू एकजुट हुनुपर्ने आवश्यकता औंल्याए। यस्ता पहलहरूले नयाँ पुस्तामा किराँत धर्म, संस्कृति र पहिचानप्रति अभिप्रेरणा जगाउने विश्वास व्यक्त गरे।
प्रथम किराँत राजा यलम्बरले शुरु गरेको येले सम्वत ५०८६ नयाँ वर्ष तथा माघे संक्रान्तिको अवसरमा शुभकामना आदान–प्रदानसहित सम्पन्न कार्यक्रममा स्थानीय किराँत धर्मप्रेमी तथा सामाजिक अगुवाहरूको उल्लेखनीय सहभागिता रहेको थियो। विशिष्ट अतिथिका रूपमा कोशी प्रदेशका पूर्व सांसद अर्जुन राईले शुभकामना मन्तव्य राखेका थिए।
किराँत राई यायोक्खा कमल गाउँ समिति अध्यक्ष हरिचन्द्र राईको अध्यक्षतामा सम्पन्न कार्यक्रममा स्वागत मन्तव्य सल्लाहकार संयोजक सन्तोष राईले राखेका थिए भने कार्यक्रम सञ्चालन सदस्य चन्द्रप्रकाश राईले गरेका थिए।
