माघ ८, दमक / दमक ट्राफिक प्रहरी कार्यालयको भवनमा सवारी दुर्घटना न्यूनीकरणसम्बन्धी अन्तरक्रिया कार्यक्रम सम्पन्न भएको छ। कार्यक्रम ने.प्र.रा.सु. तथा ट्रा.व्य.का. इटहरी, सुनसरीका कार्यालय प्रमुख प्रहरी उपरीक्षक दिपक गिरीको प्रमुख आतिथ्यतामा सम्पन्न भएको हो।

कार्यक्रममा दमक ट्राफिक प्रहरी कार्यालयका कार्यालय प्रमुख प्रहरी नायब निरीक्षक विजय राई, दमक नगरपालिका वडा नं. २ का वडा अध्यक्ष प्रजापति सापकोटा , लायन्स क्लब तथा लियो क्लबका विभिन्न पदाधिकारीहरू, बस व्यवसायी संघ, अटो तथा ई–रिक्सा संघका अध्यक्षहरू, मझौला ट्याक्सी स्टेन्डका अध्यक्ष, यातायात तथा ट्राफिक व्यवस्थापन समितिका प्रतिनिधि, स्थानीय जनप्रतिनिधि, समाजसेवी तथा भद्रभलाद्मीहरूको उल्लेखनीय सहभागिता रहेको थियो।

अन्तरक्रियामा सवारी दुर्घटनाका कारण, न्यूनीकरणका उपाय, ट्राफिक नियमको प्रभावकारी कार्यान्वयन, चालक तथा यात्रुको सचेतना अभिवृद्धि र सरोकारवालाबीचको समन्वयलाई थप मजबुत बनाउने विषयमा छलफल गरिएको थियो। सहभागीहरूले दुर्घटना न्यूनीकरणका लागि संयुक्त प्रयास आवश्यक रहेको धारणा व्यक्त गरेका थिए।

कार्यक्रमबाट ६५ जना सहभागीहरू प्रत्यक्ष रूपमा लाभान्वित भएका छन्। आयोजकले यस्ता कार्यक्रमले सडक सुरक्षा प्रवर्द्धनमा महत्वपूर्ण योगदान पुर्‍याउने विश्वास व्यक्त गरेका छन्।