माघ १४, दमक / नेपाली कांग्रेस झापा क्षेत्र नम्बर ५ र त्यसअन्तर्गतका सबै इकाई नेतृत्वले संयुक्त विज्ञप्ति जारी गर्दै तत्कालीन दमक नगर सभापति प्रकाश प्रसाईंलाई पार्टी अनुशासनको कारबाही गरिएको जानकारी दिएका छन्।
नेपाली कांग्रेस वडा, नगर, प्रदेश (ख) तथा प्रतिनिधिसभा क्षेत्रीय समिति झापा–५ को संयुक्त बैठकको निर्णयअनुसार प्रतिनिधिसभा सदस्यको उम्मेदवारी मनोनयन मिति माघ ६ गतेदेखि लागू हुने गरी प्रसाईंलाई पार्टीको साधारण सदस्यतासमेत नरहने गरी कारबाही गरिएको आज सार्वजनिक विज्ञप्तिमा उल्लेख गरिएको छ।
विज्ञप्तिअनुसार मिति २०८२ माघ ६ गते तत्कालीन दमक नगर सभापति प्रकाश प्रसाईंले नेपाली कांग्रेस परित्याग गरी अर्को दलमा प्रवेश गरेपछि पार्टी विधान र निर्णयअनुसार अनुशासनात्मक कारबाही प्रक्रिया अघि बढाइएको हो।
नेपाली कांग्रेस सुशासनसहित समुन्नत नेपाल निर्माणको अभियानमा दृढ संकल्पित रहेको उल्लेख गर्दै दमक नगर कार्यसमितिले पार्टी हितविपरीत गतिविधि गर्ने जो–कोहीमाथि कडा कारबाही गरिने स्पष्ट पारेको छ।
प्रेस विज्ञप्तिमा पार्टीको दोस्रो विशेष महाधिवेशनबाट पारित “बलियो कांग्रेस, बदल्छौं देश” भन्ने मूल नारालाई आत्मसात गर्दै आगामी २०८२ फागुन २१ गते हुने प्रतिनिधिसभा सदस्य निर्वाचनमा पार्टी एकताबद्ध भएर अघि बढ्ने प्रतिबद्धता व्यक्त गरिएको छ।
लोकतान्त्रिक पार्टीमा प्रवेश र बहिर्गमन स्वाभाविक प्रक्रिया भए पनि पार्टी हितविरुद्धका गतिविधिप्रति सचेत रहनुपर्ने आवश्यकता औंल्याउँदै वडा तहदेखि क्षेत्रभरिका कार्यकर्तालाई भ्रामक, कपोलकल्पित तथा प्रतिगमनकारी गतिविधिबाट सजग रहन विज्ञप्तिमार्फत आग्रह गरिएको छ।
विज्ञप्तिमा वडा नं. ६ का वडा सभापति मणिकुमार बढाथोकी, कार्यवाहक नगर सभापति प्रेम भट्टराई, प्रदेश (ख) सभापति रवि केसी न्यौपाने तथा प्रतिनिधिसभा क्षेत्र नं. ५ झापाका क्षेत्रीय सभापति ढुण्डीराज भण्डारीको हस्ताक्षर रहेको छ।
